ରାଉରକେଲା ଅଫିସ୍,୨୮ା୫: ରାଉରକେଲାର ଧାର୍ମିକ ପୀଠ ବେଦବ୍ୟାସରେ ଥିବା ମନ୍ଦିର ଗୁଡିକରେ ଠାକୁରଙ୍କୁ ଅନ୍ନଭୋଗ ଲାଗି ହେଉ ନ ଥିବା ଅଭିଯୋଗ ହୋଇଛି। ବେଦବ୍ୟାସ ପୀଠରେ ଜଗନ୍ନାଥ ମନ୍ଦିର, ବାଲୁଙ୍କେଶ୍ୱର ମନ୍ଦିର, ବିଶ୍ୱନାଥ ମନ୍ଦିର, ଶାନ୍ତ ଶେଖର ମନ୍ଦିର, ରାଧାକୃଷ୍ଣ ମନ୍ଦିର, ସରସ୍ବତୀ କୁଣ୍ଡ ଆଦି ଦେବଦେବୀଙ୍କ ୧୨ଟି ମନ୍ଦିର ରହିଛି। ମାତ୍ର କୌଣସି ମନ୍ଦିରରେ ଠାକୁରଙ୍କୁ ଅନ୍ନ ମଣୋହୀ ଲାଗି ହେଉନାହିଁ କି ଭକ୍ତମାନଙ୍କୁ ମିଳୁନାହିଁ। ରାଉରକେଲାର ଅନ୍ୟ ମନ୍ଦିରରେ ଅନ୍ନ ମଣୋହୀ ଲାଗି ହେଉଥିବା ବେଳେ ବେଦବ୍ୟାସ ପୀଠରେ ଅନ୍ନ ପ୍ରସାଦ ଉପଲବ୍ଧ ନ ହେବା ଯୋଗୁ ଭକ୍ତଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଏ ନେଇ ଜନୈକ ବ୍ୟକ୍ତି ନିଜ ନାମ ଗୋପନ ରଖି କହିଛନ୍ତି, ବେଦବ୍ୟାସ ପୀଠର କୌଣସି ମନ୍ଦିରରେ ଅନ୍ନଭୋଗ ଲାଗି ହେଉନାହିଁ। କେବଳ ନଡିଆ ଓ କଦଳୀ ଭୋଗରେ ଦେବଦେବୀଙ୍କ ଭୋଗ ଅର୍ପଣ ନୀତି ସମ୍ପନ୍ନ ହେଉଛି । ବେଦବ୍ୟାସ ପୀଠ ବିକାଶ ମଞ୍ଚର ଯୁଗ୍ମ ସମ୍ପାଦକ ବିଭୂତି ଦାଶ କୁହନ୍ତି, ରାଉରକେଲା ହନୁମାନ ବାଟିକାରେ ୨୩ ମନ୍ଦିରରେ ଭକ୍ତଙ୍କୁ ଦୈନିକ ଅନ୍ନ ମଣୋହୀ ମିଳୁଛି। ଏଥିସହିତ ରାଉରକେଲା ଟାଉନଶିପ୍ ଓ ସେକ୍ଟର ଅଞ୍ଚଳର ବିଭିନ୍ନ ଜଗନ୍ନାଥ ମନ୍ଦିରରେ ଅନ୍ନ ମଣୋହୀ ଉପଲବ୍ଧ ହେଉଛି। ମାତ୍ର ବେଦବ୍ୟାସ ପୀଠରେ ଭକ୍ତଙ୍କ ପାଇଁ ଏହି ବ୍ୟବସ୍ଥା ନ ହେବା ପାଇଁ ଚିନ୍ତାର ବିଷୟ। ଏ ଦିଗରେ ଜିଲା ପ୍ରଶାସନ ପକ୍ଷରୁ ବିହିତ ପଦକ୍ଷେପ ଗ୍ରହଣ କରାଯିବା ଆବଶ୍ୟକ ବୋଲି ସେ କହିଥିଲେ। ଏ ସମ୍ପର୍କରେ ସୁନ୍ଦରଗଡ଼ ଜିଲାପାଳ ହର୍ଷଦ ପରାଗ ଗାଭାଲିଙ୍କୁ ପଚାରିବାରୁ ବେଦବ୍ୟାସ ପୀଠରେ ଅନ୍ନ ପ୍ରସାଦ ବ୍ୟବସ୍ଥା ଉପରେ ବିହିତ ପଦକ୍ଷେପ ନିଆଯିବ ବୋଲି ସେ କହିଥିଲେ। ସେହିପରି ଦେବୋତ୍ତର ବିଭାଗର ଏକ୍ଜିକ୍ୟୁଟିଭ ଅଫିସର ଗୋଲାପ କୌଶିକ ଅଭିଯୋଗକୁ ଭିତ୍ତିହୀନ ବୋଲି କହିଛନ୍ତି। ମନ୍ଦିର ପୂଜକ ମାନଙ୍କ ଦ୍ୱାରା ସମସ୍ତ ଦେବଦେବୀଙ୍କ ଅନ୍ନ ମଣୋହୀ ବ୍ୟବସ୍ଥା କରାଯାଇଛି। ଅର୍ଡର ନ ଦେଲେ ଅନ୍ନ ପ୍ରସାଦ ମିଳେ ନାହିଁ ବୋଲି ସେ କହିଥିଲେ।