ରାଇକିଆ,୩ା୧୨(ଡି.ଏନ୍.ଏ.): ସକାଳୁ ତାଜା ପନିପରିବା ସହ ରାସ୍ତା ପାଶର୍ବରେ ମହିଳାଙ୍କ ପନିପରିବା ବ୍ୟବସାୟର ଲମ୍ବା ଧାଡ଼ି। ଫୁଲ କୋବି, ବିନ୍ସ, ବନ୍ଧା କୋବିଠାରୁ ଆରମ୍ଭ କରି ବିଭିନ୍ନ ପ୍ରକାର ଶାଗ ବିକ୍ରି କରୁଛନ୍ତି ମହିଳା। ସତେଜ ପନିପରିବା ପାଇଁ ଗ୍ରାହକଙ୍କ ମଧ୍ୟ ଭିଡ଼ ଜମୁଛି। ପୂର୍ବରୁ ନିଜ ଜମିରେ ଚାଷ କରୁଥିବା ପନିପରିବାକୁ ବାହାର ବ୍ୟବସାୟୀଙ୍କୁ ବିକ୍ରି କରୁଥିଲେ। ଏବେ କିନ୍ତୁ ନିଜେ ବଜାରକୁ ପନିପରିବା ଆଣି ବିକ୍ରି କରି ଉଚିତ ଦର ପାଉଛନ୍ତି। ଏଥିରୁ ସ୍ବାବଲମ୍ବୀ ମଧ୍ୟ ହେଉଛନ୍ତି। ଏ ନେଇ ମହିଳା ଚାଷୀ ରୁନିମା ପ୍ରଧାନ କୁହନ୍ତି, ପୂର୍ବରୁ ଆମେ ବ୍ୟବସାୟୀଙ୍କୁ ସିଧାସଳଖ ବିକ୍ରି କରୁଥିଲୁ। ଏବେ କିନ୍ତୁ ବଜାରକୁ ଆସି ନିଜେ ବିକ୍ରି କରୁଛୁ। ଲକ୍ଡାଉନ ସମୟରେ ଉତ୍ପାଦିତ ପନିପରିବା ଗାଁରେ ରହି ବିକ୍ରି କରିବା ସମ୍ଭବପର ହେଲା ନାହିଁ । ଅଭାବୀ ବିକ୍ରିର ଶିକାର ହେଲୁ,ସେବେଠାରୁ ବଜାରକୁ ଆସି ସିଧାସଳଖ ପନିପରିବା ବିକ୍ରି କଲୁ। ଏହି ଧାରା ଆଜି ପର୍ଯ୍ୟନ୍ତ ଚାଲିଛି। ସଲାଙ୍ଗିଆ ଅଞ୍ଚଳରୁ ଆସିଥିବା ରଜନୀ ନାୟକ କୁହନ୍ତି, ନିତିଦିନିଆ ରୋଜଗାର ଦେଉଛି ପନିପରିବା। ଚଳିତ ବର୍ଷ ଲଘୁଚାପ ବର୍ଷା ଯୋଗୁ ବିନ୍ସ ଚାଷରେ ବ୍ୟାପକ କ୍ଷତି ହୋଇଥିଲା। ଏହି ସମୟରେ ଅନ୍ୟ ପରିବା ବିକ୍ରି କରି ପରିବାର ଚାଲିଥିଲା। ଏବେ କିନ୍ତୁ ବନ୍ଧା କୋବି, ମଟର ଭଲ ଚାଷ ହେଇଛି। ସେଥିରୁ ଭଲ ଦୁଇ ପଇସା ରୋଜଗାର ହେଉଛି।