ଛତ୍ରପୁର,୨୬ା୧୦(ଦିଲୀପ ସାମଲ)ଛତ୍ରପୁର ବାଳିକା ଉଚ୍ଚ ବିଦ୍ୟାଳୟ ସମ୍ମୁଖରେ ଥିବା ବହୁ ପୁରାତନ ମାର୍କେଟଟି ଦୀର୍ଘଦିନ ଧରି ଭଗ୍ନ ଅବସ୍ଥାରେ ପଡିରହିଛି। ଫଳରେ ପରିବା ବ୍ୟବସାୟୀମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ବ୍ୟବସାୟୀମାନେ ଏ ନେଇ ବାରମ୍ବାର ଅଭିଯୋଗ କରୁଥିଲେ ସୁଦ୍ଧା ସୁଫଳ ମିଳୁନାହିଁ। ଅନ୍ୟପକ୍ଷରେ ଟ୍ରାଫିକ୍ ସମସ୍ୟା ସୃଷ୍ଟି ହେଉଛି। ଛତ୍ରପୁରର ବ୍ୟବସାୟୀମାନେ ସୁବିଧାରେ ଯେଭଳି ଗୋଟିଏ ଜାଗାରେ ବସି ସୁବିଧାରେ ବ୍ୟବସାୟ କରିପାରିବେ ସେଥିଲାଗି ପ୍ରାୟ ୫୦ବର୍ଷ ତଳେ ବାଳିକା ଉଚ୍ଚ ବିଦ୍ୟାଳୟ ସମ୍ମୁଖରେ ପରିବା ମାର୍କେଟ କରାଯାଇଥିଲା। ସେଠାରେ ପ୍ରାୟ ୩୦ଟି ଘର ନିର୍ମାଣ କରାଯାଇ ବ୍ୟବସାୟୀମାନଙ୍କୁ ହସ୍ତାନ୍ତର କରାଗଲା। ୧୯୯୯ ମହାବାତ୍ୟାରେ ଘରଗୁଡିକ ସମ୍ପୂର୍ଣ୍ଣ ଭାଙ୍ଗିଯାଇଥିଲା। ମାତ୍ର ୪ରୁ ୫ଟି ଘର ବ୍ୟବହାର ଉପଯାଗୀ ଥିବା ବେଳେ ବଳକା ଘର ଗୁଡିକ ମରାମତି କରିବା ପାଇଁ ବ୍ୟବସାୟୀମାନେ ଏନଏସି କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିଥିଲେ। ବ୍ୟବସାୟୀମାନେ ରାସ୍ତା କଡରେ ବସି ବ୍ୟବସାୟ ଆରମ୍ଭ କରିଦେଇଥିଲେ। ଏହାଦ୍ୱାରା ଟ୍ରାଫିକ ଓ ପରିମଳ ସମସ୍ୟା ଦେଖାଗଲା। ପରିବା ବ୍ୟବସାୟୀମାନେ ରାସ୍ତାରେ ବସୁଥିବା ବେଳେ ଖରା, ବର୍ଷାରେ ବସୁଛନ୍ତି। ସେପଟେ ଟ୍ରାଫିକ୍ ଜାମରୁ ବିଦ୍ୟାଳୟ ଛାତ୍ରୀମାନେ ଯାତାୟତ ବେଳେ ଅସୁବିଧା ଭୋଗୁଛନ୍ତି। ତେଣୁ ପ୍ରଶାସନ ଏଥିପ୍ରତି ଧ୍ୟାନ ଦେବା ଜରୁରୀ ହୋଇପଡିଛି । ଭଗ୍ନ ଅବସ୍ଥାରେ ଥିବା ଘରଗୁଡିକ ନିର୍ମାଣ କରାଗଲେ ବ୍ୟବସାୟୀମାନେ ସୁବିଧାରେ ବସି ବ୍ୟବସାୟ କରିପାରିବେ ବୋଲି କହିଛନ୍ତି। ଅନ୍ୟପଟେ ମାର୍କେଟ କମ୍ପ୍ଲେକ୍ସକୁ ନୂତନ ଭାବେ ନିର୍ମାଣ କରିବା ପାଇଁ ଯୋଜନା କରାଯାଇଛି। ପ୍ରାୟ ଏକ କୋଟି ବ୍ୟାୟରେ ମାଛ ଓ ପନିପରିବା ମାର୍କେଟ ପାଇଁ ଭିତ୍ତିପ୍ରସ୍ତର ସ୍ଥାପନ କରାଯାଇଛି। ଏଥିଲାଗି ଡିପିଆର ପ୍ରସ୍ତୁତ ହୋଇଯାଇଥିବା ସୂଚନା ମିଳିଛି। ଭିତ୍ତିପ୍ରସ୍ତରର ୧୪ ମାସ ବିତିଯାଇଥିଲେ ସୁଦ୍ଧା କାର୍ଯ୍ୟ ଅଗ୍ରଗତି ହେଉ ନ ଥିବା ଅଞ୍ଚଳବାସୀ କହିଛନ୍ତି।