ବରଗଡ଼ ଅଫିସ୍,୮।୯: ବରଗଡ଼ ଏକ କୃଷିପ୍ରଧାନ ଜିଲା। ଧାନ ପରି ପରିବା ଉତ୍ପାଦନରେ ମଧ୍ୟ ଏହି ଜିଲା ପଛରେ ପଡ଼ିନାହିଁ। କିନ୍ତୁ ଧାନବିକ୍ରି ଭଳି ପରିବା ବିକ୍ରିରେ ମଧ୍ୟ ଚାଷୀଙ୍କୁ ଅଭାବୀ ବିକ୍ରିର ସମ୍ମୁଖୀନ ହେବାକୁ ପଡୁଛି। ବୁଧବାର ଜିଲାର ଚାଷୀମାନେ ପରିବା ଅଭାବୀ ବିକ୍ରିର ଅଭିନବ ପ୍ରତିବାଦ କରିଥିଲେ। ବରଗଡ଼-ସୋହେଲା ମଝିରେ ଥିବା ଦଶମାଇଲ ଛକର ୬ନମ୍ବର ଜାତୀୟ ରାଜପଥ ଉପରେ ବିଭିନ୍ନ ପ୍ରକାର ପରିବା ଗଦା କରି ଚାଷୀମାନେ ପଥଚାରୀଙ୍କୁ ତାହା ବାଣ୍ଟିଥିଲେ।
ପୂର୍ବ ନିର୍ଦ୍ଧାରିତ କାର୍ଯ୍ୟକ୍ରମ ଅନୁଯାୟୀ ଜୟ କିଷାନ ଆନ୍ଦୋଳନର ନେତୃତ୍ୱରେ ଶ୍ରୀଗିଡ଼ା, ସରକଣ୍ଡା, ସାମକଁଟା, କରୋଣ୍ଡଲା, ବାଇପାଲି, ଗର୍ଭନା, ଲେବିଡ଼ି, ନଅଗାଁ, ଚକରକେନ୍ଦ, କେନପାଲି, ଭାତବିଡ଼ା ଆଦି ଅଞ୍ଚଳର ଚାଷୀମାନେ ଦଶମାଇଲ ଛକରେ ସମବେତ ହୋଇଥିଲେ। ସେମାନେ ସାଙ୍ଗରେ ଆଣିଥିବା ବାଇଗଣ, ଭେଣ୍ଡି, ପୋଟଳ, କଖାରୁ, ଲଙ୍କା ଆଦି ପ୍ରାୟ ୫ କୁଇଣ୍ଟାଲର ପରିବା ରାଜପଥ ମଝିରେ ଗଦା କରିଥିଲେ। ରାସ୍ତାରେ ଯାଉଥିବା ଲୋକଙ୍କୁ ଅଟକାଇ ସେମାନେ ତାହା ଦୀର୍ଘ ୨ଘଣ୍ଟା ଧରି ବାଣ୍ଟିଥିଲେ। ଧାନ ଭଳି ପରିବାରେ ଅଭାବୀ ବିକ୍ରି ସ୍ଥିତି ଉପୁଜିବାରୁ ଏହା କରୋନା ତଥା ମରୁଡ଼ି କାଳରେ ଆର୍ଥିକ ସ୍ଥିତିକୁ ଦୋହଲାଇ ଦେଇଛି। ଜିଲାରେ ଶୀତଳ ଭଣ୍ଡାର ସ୍ଥାପନ, ଧାନ ଭଳି ବିଭିନ୍ନ ପନିପରିବାର ସହାୟକ ମୂଲ୍ୟ ନିର୍ଦ୍ଧାରଣ ଏବଂ ପରିବା ଅଭାବୀ ବିକ୍ରିର ସ୍ଥାୟୀ ସମାଧାନ ଦାବିରେ ଏଭଳି ପ୍ରତିବାଦ କରିଥିବା ଜୟ କିଷାନ ଆନ୍ଦୋଳନର ଚାଷୀନେତାମାନେ କହିଛନ୍ତି। ପଶ୍ଚିମ ଓଡ଼ିଶା କୃଷକ ସଂଗଠନ ସମନ୍ବୟ ସମିତି ଆବାହକ ଲିଙ୍ଗରାଜ ଯୋଗଦେଇ କହିଥିଲେ, ଉତ୍ପାଦିତ ପରିବାକୁ ସୁରକ୍ଷିତ ରଖିବା ପାଇଁ ଜିଲାରେ ଶୀତଳ ଭଣ୍ଡାର ସ୍ଥାପନ କରାଯାଇଥିଲେ ବର୍ତ୍ତମାନର ଅଭାବୀ ବିକ୍ରି ସମସ୍ୟା ଉପୁଜି ନ ଥାନ୍ତା। ଚାଷୀନେତା ରମେଶ ମହାପାତ୍ର କହିଛନ୍ତି, ଜିଲାର ଗ୍ରାମାଞ୍ଚଳରେ ଚାଷୀମାନେ ବାଇଗଣ କିଗ୍ରା ପ୍ରତି ୧ରୁ ୫ଟଙ୍କା, ପୋଟଳ କିଗ୍ରା ପ୍ରତି ୧୫ରୁ ୧୮, ଟମାଟୋ କିଗ୍ରା ପ୍ରତି ୧୫, ଜହ୍ନି କିଗ୍ରା ପ୍ରତି ୨ରୁ ୧୦, ଭେଣ୍ଡି କିଗ୍ରା ପ୍ରତି ୫ରୁ ୧୦, ଶିମ୍ବ କିଗ୍ରା ପ୍ରତି ୨୦ଟଙ୍କାରେ ବିକ୍ରି କରୁଛନ୍ତି। ତେବେ ଏହି ଦରରେ ଚାଷୀଙ୍କୁ ସେହି ଫସଲରେ କରିଥିବା ଖର୍ଚ୍ଚ ମଧ୍ୟ ଭରଣା ହେଉ ନ ଥିବା ମହାପାତ୍ର କହିଛନ୍ତି। ସରକାର ଏ ଦିଗରେ ପଦକ୍ଷେପ ନ ନେଲେ ଆଗକୁ ଆନ୍ଦୋଳନ ଆହୁରି ବ୍ୟାପକ ହେବ ବୋଲି ସେ ଚେତାବନୀ ଦେଇଛନ୍ତି।