ମୁମ୍ବାଇ, ୨୯।୬: ଦେଶରେ କରୋନା ସଂକ୍ରମଣ ଯୋଗୁ ଲକ୍ଡାଉନ୍ ଘୋଷଣା କରାଯାଇଛି। ଏପରିସ୍ଥଳେ କୌଣସି ଫିଲ୍ମ ଅବା ଟିଭି ସିରିଏଲ୍ର ଶୁଟିଂ ବନ୍ଦ ରହିଛି। ନିଜ ପରିବାର ଭରଣପୋଷଣ ପାଇଁ ବଲିଉଡ୍ ଅଭିନେତା ଜାଭେଦ୍ ହୈଦର ମୁମ୍ବାଇ ରାଜରାସ୍ତାରେ ବସି ପରିବା ବିକୁଛନ୍ତି। ଏହାର ଏକ ଟିକ୍ଟକ୍ ଭିଡ଼ିଓ ଏବେ ସୋସିଆଲ ମିଡ଼ିଆରେ ଭାଇରାଲ ହୋଇଛି। ଅଭିନେତ୍ରୀ ଡଲି ବିନ୍ଦ୍ରା ନିକଟରେ ଏହି ଭିଡ଼ିଓକୁ ଶେୟାର କରିଛନ୍ତି। ଲକ୍ଡାଉନ୍ ଯୋଗୁ ଫିଲ୍ମ ଦୁନିଆ କିପରି ବଦଳି ଯାଇଛି ତାହା ସେ ଭିଡ଼ିଓ ମାଧ୍ୟମରେ ସୂଚିତ କରିଛନ୍ତି। ପିଲାଟି ଦିନରୁ ବିଭିନ୍ନ ଫିଲ୍ମରେ ଶିଶୁ କଳାକାର ଭାବେ ଜାଭେଦ୍ ବହୁ ନାମୀଦାମୀ ଅଭିନେତା ଏବଂ ଅଭିନେତ୍ରୀଙ୍କ ସହିତ ଅଭିନୟ କରିଛନ୍ତି। ତେବେ ଲକ୍ଡାଉନ୍ ସ୍ଥିତିରେ ସଭିଏଁ ବେକାର ହୋଇ ପଡ଼ିଛନ୍ତି। ତେଣୁ କିଛି ରୋଜଗାର କରିବା ଲାଗି ସେ ଏପରି କରୁଥିବା ଭିଡ଼ିଓରେ ପଚରାଯାଇଥିବା ଏକ ପ୍ରଶ୍ନର ଉତ୍ତର ଦେଇ ଏଭଳି କହିଛନ୍ତି। ସବୁ କାମ ସମାନ। କାମରେ କିଛି ଛୋଟ ଅବା ବଡ଼ ନାହିଁ। ମନଦେଇ କରୁଥିବା କାମ ସବୁବେଳେ ମହାନ ବୋଲି ଜାଭେଦ୍ କହିଛନ୍ତି। ଜଭେଦ୍ଙ୍କ ଭିଡ଼ିଓ ଭାଇରାଲ ହେବା ପରେ ତାଙ୍କ ଫଲୋଅର୍ସଙ୍କ ସଂଖ୍ୟା ୨୦ ଦିନରେ ବଢ଼ି ୯୧ ହଜାର ଛୁଇଁଛି। ପୂର୍ବରୁ ଏହା ୨ ହଜାର ଥିଲା। ଜାଭେଦ୍ଙ୍କ ପ୍ରଥମ ଫିଲ୍ମ ଖୁଦ୍ଗର୍ଜ ଥିଲା। ଏଥିରେ ଶତ୍ରୁଘ୍ନ ସିହ୍ନାଙ୍କ ସହିତ ଅଭିନୟ କରିଥିଲେ।