ନୂଆଦିଲ୍ଲୀ: ବର୍ତ୍ତମାନ ବିଭିନ୍ନ ବର୍ଗ ଯାନ ବିକ୍ରିରେ ଧୀରେ ଧୀରେ ଉନ୍ନତି ପରିଲକ୍ଷିତ ହେଉଛି। ଅକ୍ଟୋବର ମାସରେ ନୂଆ ଯାନ ବିକ୍ରି ବଢ଼ିବା ଯୋଗୁ ସେପ୍ଟେମ୍ବର ତୁଳନାରେ ପଞ୍ଜୀକରଣ ୫% ବୃଦ୍ଧି ପାଇଛି। ମାତ୍ର ଗତ ବର୍ଷ ଅକ୍ଟୋବର ବିକ୍ରିକୁ ତୁଳନା କଲେ ଚଳିତ ବର୍ଷ ସମାନ ସମୟରେ ବିକ୍ରି ୨୪% ନିମ୍ନରେ ରହିଛି। ଫେଡେରେଶନ ଅଫ୍ ଅଟୋମୋବାଇଲ ଡିଲର୍ସ ଆସୋସିଏଶନ(ଫାଡା) ପକ୍ଷରୁ ମିଳିଥିବା ଡାଟା ମୁତାବକ, ଗତ ବର୍ଷ ଅକ୍ଟୋବର ତୁଳନାରେ ୨ ଚକିଆ ଯାନ ବିକ୍ରି ୨୬% ନିମ୍ନରେ ରହିଛି। ଗତ ବର୍ଷ ଏହି ବର୍ଗରେ ବିକ୍ରି ୧୪.୨୩ ଲକ୍ଷ ୟୁନିଟ ରହିଥିଲା ବେଳେ ଚଳିତ ବର୍ଷ ଏହା ୧୦.୪୧ ଲକ୍ଷ ୟୁନିଟ ରହିଛି। ୩ ଚକିଆ ବର୍ଗରେ ୬୪.୦୫% ବିକ୍ରି ହ୍ରାସ ଦେଖାଯାଇଛି। ଏହା ଗତ ବର୍ଷ ଅକ୍ଟୋବରରେ ୬୩,୦୪୨ ୟୁନିଟ ଥିବା ବେଳେ ଚଳିତ ବର୍ଷ ସମାନ ମାସରେ ୨୨,୩୮୧ ୟୁନିଟକୁ ଖସିଛି। ସେହିଭଳି ବାଣିଜି୍ୟକ ଯାନ ବିକ୍ରି ୩୦.୩୨% ହ୍ରାସ ପାଇଛି। କେବଳ ଯାତ୍ରୀବାହୀ ଯାନ ବର୍ଗରେ ବିକ୍ରି ୮.୮୦% ନିମ୍ନରେ ରହିଛି। ଟ୍ରାକ୍ଟର ବିକ୍ରି ୫୫.୫୩% ଊର୍ଦ୍ଧ୍ୱରେ ରହିଥିବା ଜଣାପଡ଼ିଛି।
ଗତବର୍ଷ ଅକ୍ଟୋବର ନବରାତ୍ରି ଏବଂ ଦିଓ୍ବାଲି ବିକ୍ରି ତୁଳନାରେ ଚଳିତ ବର୍ଷ ବିକ୍ରି ସମାନ ସ୍ଥିତିରେ ନାହିଁ। ଶୋ’ରୁମ୍ଗୁଡିକୁ ଯାନ କ୍ରୟ କରିବା ନେଇ ଲୋକଙ୍କ ଯିବା ଆସିବା ବଢିଛି ହେଲେ ସେହି ବିକ୍ରି ସମ୍ପୂର୍ଣ୍ଣ ଉନ୍ନତ ହୋଇପାରିନାହିଁ। ଫାଡା ସଭାପତି ଭିଙ୍କେଶ ଗୁଲାଟି କହିଛନ୍ତି, ସେପ୍ଟେମ୍ବର ତୁଳନାରେ ଅକ୍ଟୋବରେ ବିକ୍ରି ସାମାନ୍ୟ ବଢିଛି। ମାତ୍ର ପୂର୍ବବର୍ଷ ତୁଳନାରେ ବିକ୍ରି ସମ୍ପୂର୍ଣ୍ଣ ଟ୍ରାକ୍କୁ ଫେରିନି। ଯାତ୍ରୀବାହୀ ବର୍ଗରେ ନୂଆ ଯାନଗୁଡ଼ିକର ବଜାର ପ୍ରବେଶ ଚାହିଦା ବଢାଇବା ଦିଗରେ ସହାୟକ ହୋଇଛି। ବଜାର ସ୍ଥିତି ଭଲ ରହିଥିବା ୪୩% ଡିଲର ମତ ରଖିଛନ୍ତି। ସେହିଭଳି ନଗଦ ସୁବିଧା ଉନ୍ନତ ରହିଥିବା ୪୩.୫% ଡିଲର କହିଛନ୍ତି। ସୂଚନାଯୋଗ୍ୟ ଲକ୍ଡାଉନ ଲାଗୁ ହେବା ଯୋଗୁ ଯାନ କିଣିବା ଲାଗି ଲୋକଙ୍କର କ୍ରୟ ମନୋଭାବରେ ପରିବର୍ତ୍ତନ ହୋଇଛି। ବଜାରରେ ଚାହିଦା ପ୍ରଭାବିତ ସ୍ଥିତିରେ ରହିଛି। ଲକ୍ଡାଉନ କଟକଣା ଉଠିବା ପରେ ଲୋକମାନେ ପୁଣି ଥରେ ଶୋ’ରୁମ୍କୁ ଯାଇ ଯାନ ସମ୍ପର୍କରେ ଅନୁସନ୍ଧାନ କରିପାରୁଛନ୍ତି।