ସୁନାବେଡ଼ା/ସେମିଳିଗୁଡ଼ା, ୨୬ା୧୨ (ସ୍ବ.ପ୍ର.):ଯେଉଁ ଲକ୍ଷ୍ୟ ଓ ଉଦ୍ଦେଶ୍ୟ ନେଇ ସୁନାବେଡ଼ା ହାଲ୍ ମ୍ୟୁଜିୟମ ସମ୍ମୁଖ ଜାତୀୟ ରାଜପଥ ପାର୍ଶ୍ୱରେ ଭେଣ୍ଡିଂ ଜୋନ୍ ନିର୍ମାଣ ହୋଇଥିଲା ତାହା ବିଫଳ ହେଇଛି। ଏବେ ସେହି ସ୍ଥାନ ଅଘୋଷିତ ବସ୍ଷ୍ଟାଣ୍ଡ ପାଲଟିଛି। ଯିଏ ପାରୁଛି ସେ ଆଣି ଗାଡ଼ି ପାର୍କିଂ କରୁଛି। ୨୦୧୦ରେ ପୌର ପରିଷଦ ପକ୍ଷରୁ ଲକ୍ଷାଧିକ ଟଙ୍କା ବ୍ୟୟରେ ନିର୍ମିତ ଏହି ଭେଣ୍ଡିଂ ଜୋନ୍ର ପୁନରୁଦ୍ଧାର ପାଇଁ ପୌର ପ୍ରଶାସନର ଚିନ୍ତା ନାହିଁ। ଏଠାରେ ଗୁଡାଏ ଦୋକାନ ଘର ସହ କିଛି ଖୋଲା ପିଣ୍ଡି ଚାଷୀଙ୍କ ଲାଗି ତିଆରି କରାଯାଇଥିଲା। ରହିଥିବା ଦୋକାନ ଘର ମଧ୍ୟରୁ ହାତ ଗଣତି କେତୋଟି ଦୋକାନ ଖୋଲା ରହୁଥିବା ବେଳେ ଅନେକ ଦୋକାନ ଘର ବନ୍ଦ ରହିଛି। ବିଭିନ୍ନ ପ୍ରକାର ବ୍ୟବସାୟ କରି ନିଜ ଗୁଜୁରାଣ ମେଣ୍ଟାଇବା ପାଇଁ କରାଯାଇଥିବା ଏହି ଦୋକାନ ଘର ଓ ପିଣ୍ଡି ଖାଲି ପଡିଛି। ଏବେ ଏହା ଟ୍ରକ୍ ଓ ପିକ୍ଅପ୍ ମାଲିକଙ୍କ କବ୍ଜାରେ ରହିିଛି। ସେମାନେ ଆରାମରେ ଆଣି ରାସ୍ତା ବନ୍ଦ କରି ନିଜ ଗାଡି ପାକିଂ କରୁଛନ୍ତି। ଭେଣ୍ଡିଂ ଜୋନ୍ ପାଖକୁ ଲାଗି ଗାଡି ପାର୍କିଂ ପାାଇଁ କିଛି ସ୍ଥାନ ଥିବା ବେଳେ ଗାଡି ଡ୍ରାଇଭରମାନେ ସେଠାରେ ଗାଡିର ଭଙ୍ଗାରଜା ସମଗ୍ରୀ ଆଣି ରଖୁଛନ୍ତି। ଭେଣ୍ଡିଂ ଜୋନ୍ ରାସ୍ତା ବନ୍ଦ ହେତୁ ସେଠକୁ କରବର ଲାଗି ଲୋକ ଯାଉନାହାନ୍ତି। ଫଳରେ ଯେଉଁ କେତେ ଜଣ ଦୋକାନ ଖୋଲିଛନ୍ତି ସେମାନେ ହାତବାନ୍ଧି ବସିଛନ୍ତି। ଅନ୍ୟପକ୍ଷରେ ଏଠାରେ ଥିବା କେତେକ ଖୋଲା ପିଣ୍ଡିକୁ କେତେଜଣ ବ୍ୟବସାୟୀ ନିଜ କବ୍ଜାରେ ରଖିଥିବା ଦେଖିବାକୁ ମିଳୁଛି। ପୌର ପ୍ରଶାସନ ଏଥିପ୍ରତି ଦୃଷ୍ଟି ଦେଇ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି। ଏ ସମ୍ପର୍କରେ ପୌର ପରିଷଦର କାର୍ଯ୍ୟ ନିର୍ବାହୀ ଅଧିକାରୀ ଗୋବିନ୍ଦ ଦନସେନାଙ୍କୁ ପଚାରିବାରୁ ସେ କହିଲେ, ଏ ଦିଗରେ ଆଗାମୀ ଦିନରେ ପୌର ପରିଷଦ ପକ୍ଷରୁ ନିଶ୍ଚିତ ରୂପେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।