ରିଓ ଡି ଜେନିରୋ,୨୨।୬: କୋପା ଆମେରିକାରେ ସୋମବାର ଗୁପ୍ ବି’ରେ ଖେଳାଯାଇଥିବା ଅନ୍ୟଏକ ମ୍ୟାଚରେ ଭେନିଜୁଏଲା ଓ ଇକ୍ୱେଡର ପରସ୍ପରକୁ ଭେଟିଥିଲେ। କଡ଼ା ସଂଘର୍ଷପୂର୍ଣ୍ଣ ଏହି ମ୍ୟାଚ୍ ୨-୨ ଗୋଲରେ ଅମୀମାଂସିତ ରହିଥିଲା। ଇକ୍ୱେଡର ତରଫରୁ ଅର୍ଟନ ପ୍ରେସିଆଡୋ ୩୯ତମ ମିନିଟ୍ରେ ପ୍ରଥମ ଗୋଲ ସ୍କୋର କରିଥିଲେ। ପ୍ରଥମାର୍ଦ୍ଧ ଶେଷ ସୁଦ୍ଧା ଇକ୍ୱେଡର ଅଗ୍ରଣୀ ବଜାୟ ରଖିଥିଲା। ୫୧ତମ ମିନିଟ୍ରେ ଏଡସନ କାଷ୍ଟିଲୋ ଭେନିଜୁଏଲା ତରଫରୁ ଗୋଲ ଦେଇ ମ୍ୟାଚ୍କୁ ସମାନସ୍ତରକୁ ଆଣିଥିଲେ। ଏହାପରେ ଇକ୍ୱେଡର ପକ୍ଷରୁ ଗୋଞ୍ଜାଲୋ ପ୍ଲାଟା ଗୋଲ ଦେଇ ଦଳକୁ ଅଗ୍ରଣୀ କରାଇଥିଲେ। ଏହାପରେ ମ୍ୟାଚ୍ରେ ଜବରଦସ୍ତ ସଂଘର୍ଷ ଦେଖିବାକୁ ମିଳିଥିଲା। ଶେଷ ମୁହୂର୍ତ୍ତରେ ଇଞ୍ଜୁରି ଟାଇମର ଦ୍ୱିତୀୟ ମିନିଟ୍ରେ ତାରକା ଷ୍ଟ୍ରାଇକର ରୋନାଲ୍ଡ ହେର୍ନାଣ୍ଡିଜ୍ ଗୋଲ ଦେଇ ମ୍ୟାଚ୍କୁ ଅମୀମାଂସିତ କରାଇଥିଲେ। ଏଥିସହି ଭେନିଜୁଏଲା ୩ଟି ମ୍ୟାଚ୍ ଖେଳି ଦୁଇଟି ଡ୍ର ଓ ଗୋଟିଏ ପରାଜୟ ସହ ୨ ପଏଣ୍ଟ ହାସଲ କରି ଗ୍ରୁପ୍ ବି ପଏଣ୍ଟ ତାଲିକାର ଚତୁର୍ଥ ସ୍ଥାନରେ ରହିଛି। ଅନ୍ୟପଟେ ଇକ୍ୱେଡର ୨ଟି ମ୍ୟାଚ୍ ଖେଳି ଗୋଟିଏ ଲେଖାଏ ଡ୍ର ଓ ପରାଜୟ ସହ ୧ ପଏଣ୍ଟ ପାଇ ତାଲିକାର ପଞ୍ଚମ ତଥା ଅନ୍ତିମ ସ୍ଥାନରେ ରହିଛି।