ନୂଆଦିଲ୍ଲୀ, ୬।୮(ପି.ଟି.)- ସର୍ବଭାରତୀୟ ଫୁଟବଲ ଫେଡେରେଶନ (ଏଆଇଏଫଏଫ) ଆଗାମୀ କିଛି ବର୍ଷ ପାଇଁ ଜାତୀୟ ଫୁଟବଲ ଦଳଲାଗି ଜଣେ ଘରୋଇ କୋଚ୍ଙ୍କୁ ନିଯୁକ୍ତି ଦେବା ପ୍ରସଙ୍ଗରେ ଚିନ୍ତା କରୁଛି। ଏହାକୁ ସମର୍ଥନ କରିଛନ୍ତି ପୂର୍ବତନ ଅଧିନାୟକ ଭେଙ୍କଟେଶ୍ ଶନ୍ମୁଗମ୍। ସମ୍ପ୍ରତି ଶୀର୍ଷସ୍ତରର ଘରୋଇ କ୍ଲବ ଗୁଡ଼ିକରେ କାର୍ଯ୍ୟ କରୁଥିବା କୋଚ୍ଙ୍କର ଏହି ପଦଲାଗି ଦକ୍ଷତା ରହିଛି ବୋଲି ସେ କହିଛନ୍ତି। ଜଣେ ଭାରତୀୟଙ୍କୁ ଆଗାମୀ ୫ ବର୍ଷ ପାଇଁ ଜାତୀୟ ଦଳର ମୁଖ୍ୟ କୋଚ୍ ନିଯୁକ୍ତ କରିବା ପାଇଁ ଏଆଇଏଫଏଫ ଚିନ୍ତା କରୁଛି ବୋଲି ଏହାର ସାଧାରଣ ସମ୍ପାଦକ କୁଶାଲ ଦାସ କିଛିଦିନ ତଳେ କହିଥିଲେ।
ସାଧାରଣ ସମ୍ପାଦକଙ୍କଠାରୁଏପରି କଥା ଶୁଣିବା ଉତ୍ସାହଜନକ ବୋଲି ଏବେ ଭାରତୀୟ ଫୁଟବଲ ଦଳର ସହକାରୀ କୋଚ୍ ଥିବା ଶନ୍ମୁଗମ୍ ପ୍ରକାଶ କରିଛନ୍ତି। ” ମୋ ମତରେ ୫ ବର୍ଷ ବହୁତ ଲମ୍ବା ସମୟ। ଇଣ୍ଡିଆନ ସୁପରଲିଗ୍(ଆଇଏସଏଲ) ଓ ଆଥ-ଲିଗ୍ରେ ଅନେକ ଯୁବ ଭାରତୀୟ କୋଚ୍ ଭଲ ପ୍ରଦର୍ଶନ କରୁଛନ୍ତି। ସେମାନଙ୍କ ମଧ୍ୟରୁ କେହି ଏହିସ୍ଥାନ ପାଇଁ ଉପଯୁକ୍ତ ହେଇପାରିବେ। ତେବେ ଚ୍ୟାଲେଞ୍ଜର ମୁକାବିଲା ପାଇଁ ଘରୋଇ କୋଚ୍ମାନଙ୍କୁ ଅପ୍ଡେଟ ହେବାକୁ ପଡ଼ିବ। ”ଏହା ସହଜ ନୁହେଁ, ବଡ଼ ଚ୍ୟାଲେଞ୍ଜ। ଜଣେ କୋଚ୍ଭାବେ ଜ୍ଞାନର ପରିସୀମାକୁ ବଢ଼ାଇବାକୁ ପଡ଼ିବ ଏବଂ ଅପ୍ଡେଟ ରହିବାକୁ ହେବ। କ୍ଲବରେ କୋଚିଂ ଦେବା ଏବଂ ଜାତୀୟ ଦଳକୁ କୋଚିଂ ଦେବାରେ ଭିନ୍ନତା ରହିଛି। କମ୍ ସମୟ ମଧ୍ୟରେ ଜାତୀୟ ଦଳକୁ ପ୍ରସ୍ତୁତ କରିବା ବହୁତ କଷ୍ଟସାଧ୍ୟ“ ବୋଲି ଏହି ୪୧ ବର୍ଷୀୟ ପୂର୍ବତନ ମିଡ୍ଫିଲ୍ଡର ପ୍ରକାଶ କରିଛନ୍ତି। ଜଣେ କୋଚ୍ଙ୍କର ମ୍ୟାନ ମ୍ୟାନେଜମେଣ୍ଟ ଦକ୍ଷତା ଥିବା ଆବଶ୍ୟକ। ପିଲାଙ୍କ ମନୋବୃତ୍ତିକୁ ଦେଖି ସେମାନଙ୍କ ଯନତ୍ ନେବା ସହ ଆତ୍ମବିଶ୍ୱାସ ସୃଷ୍ଟି କରିବାକୁ ପଡ଼ିବ। ସମସ୍ତଙ୍କ ଆଗରେ ଜଣେ ଖେଳାଳିଙ୍କୁ ଉଚ୍ଚଭାଷାରେ କହିବା ଠିକ୍ ନୁହେଁ। ବ୍ୟକ୍ତିଗତ ଆଲୋଚନା ବିଶ୍ୱାସ ବୃଦ୍ଧି କରିଥାଏ। ଖେଳାଳିଙ୍କୁ ସମ୍ମାନର ସହ ବ୍ୟବହାର କରିବା ଉଚିତ। ମୁଝାମଣା ଭିତ୍ତିରେ ଏହା ହେବା ଆବଶ୍ୟକ। ଏହା ହେଲେ ଯାଇ ଜଣେ ଖେଳାଳି ନିକଟରୁ ଶ୍ରେଷ୍ଠ ପ୍ରଦର୍ଶନ ବାହାର କରିହେବ ବୋଲି ଶନ୍ମୁଗମ୍ କହିଛନ୍ତି। ୨୦୦୨ରେ ଏଆଇଏଫଏଫ ପ୍ଲେୟର ଅଫ୍ ଦି ଇୟର ପୁରସ୍କାର ପାଇଥିବା ଶନ୍ମୁଗମ୍ କୋଚ୍ମାନଙ୍କ ପାଇଁ ଏଜୁକେଶନ ସିଷ୍ଟମକୁ ପ୍ରଶଂସା କରିଛନ୍ତି।