ମେଲବୋର୍ନ, ୧।୨(ଏପି): ଟିକେଟ ଚାହିଦା ବୃଦ୍ଧି ପାଇବାରୁ ଆଗାମୀ ଫିଫା ମହିଳା ଫୁଟ୍ବଲ ବିଶ୍ୱକପ୍ରେ ଅଷ୍ଟ୍ରେଲିଆର ଆୟର୍ଲାଣ୍ଡ ବିପକ୍ଷ ଓପନିଂ ମ୍ୟାଚର ଭେନ୍ୟୁ ବଦଳା ଯାଇଛି। ଏହି ମ୍ୟାଚ ପ୍ରକୃତରେ ସିଡ୍ନୀର ନ୍ୟୁ ଆଲିଏଞ୍ଜ୍ ଷ୍ଟାଡିୟମରେ ଖେଳାଯିବାର କାର୍ଯ୍ୟକ୍ରମ ରହିଥିଲା। ଏହାର ଆସନ କ୍ଷମତା ୪୨,୫୦୦ ରହିଛି। ବର୍ତ୍ତମାନ ଏହି ମ୍ୟାଚ ଷ୍ଟାଡିୟମ ଅଷ୍ଟ୍ରେଲିଆରେ ଖେଳାଯିବ, ଯାହାର ଆସନ କ୍ଷମତା ୮୨,୦୦୦ରୁ ଅଧିକ। ଷ୍ଟାଡିୟମ ଅଷ୍ଟ୍ରେଲିଆ ହେଉଛି ପୂର୍ବତନ ଅଲିମ୍ପିକ ଷ୍ଟାଡିୟମ। ଅଗଷ୍ଟ ୨୦ରେ ବିଶ୍ୱକପ୍ ଫାଇନାଲ ମଧ୍ୟ ସେଠାରେ ଖେଳାଯିବ। ଟୁର୍ନାମେଣ୍ଟକୁ ଅଷ୍ଟ୍ରେଲିଆ ଓ ନ୍ୟୁଜିଲାଣ୍ଡ ମିଳିତ ଭାବେ ଆୟୋଜନ କରୁଛନ୍ତି। ମହିଳା ଫୁଟ୍ବଲ ବିଶ୍ୱକପ୍ ଜୁଲାଇ ୨୦ରେ ଆରମ୍ଭ ହେବ। ପ୍ରଥମ ଦିବସର ପ୍ରଥମ ମ୍ୟାଚ ନ୍ୟୁଜିଲାଣ୍ଡ ଓ ନରଓ୍ବେ ମଧ୍ୟରେ ଅକ୍ଲାଣ୍ଡର ଇଡେନପାର୍କରେ ଖେଳଯିବ। ସେହିଦିନ ପରବର୍ତ୍ତୀ ମ୍ୟାଚ ଅଷ୍ଟ୍ରେଲିଆ ଓ ଆୟର୍ଲାଣ୍ଡ ମଧ୍ୟରେ ଖେଳାଯିବ। ଫିଫାର ମହିଳା ଫୁଟ୍ବଲ ମୁଖ୍ୟ ଅଧିକାରୀ ସରାଇ ବେୟାରମାନ କହିଛନ୍ତି, ମହିଳା ବିଶ୍ୱକପ୍ର ଉଦ୍ଘାଟନୀ ଦିବସରେ ଦୁଇଟି ମ୍ୟାଚକୁ ୧ ଲକ୍ଷରୁ ଅଧିକ ଦର୍ଶକ ଉପଭୋଗ କରିବେ।
