କେନ୍ଦୁଝର,୧୩।୨(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଫାଷ୍ଟ ଟ୍ରାକ୍ କୋର୍ଟ ବିଚାରପତି ବିଜୟ କୁମାର ମିଶ୍ର ମଙ୍ଗଳବାର ଏକ ନାବାଳିକା ବଳାତ୍କାର ମାମଲାର ରାୟ ପ୍ରକାଶ କରିଛନ୍ତି। କୋର୍ଟ କାଞ୍ଜିପାଣି ଥାନା ଅଧୀନ ବୁଢିଘର ଗ୍ରାମର ଅଭିଯୁକ୍ତ ମୁରଲୀଧର ଜୁଆଙ୍ଗ(୨୦)ଙ୍କୁ ଦୋଷୀ ସାବ୍ୟସ୍ତ କରି ୨୦ ବର୍ଷ ସଶ୍ରମ କାରାଦଣ୍ଡରେ ଦଣ୍ଡିତ କରିଛନ୍ତି। ଏପରିକି ୨୦ ହଜାର ଟଙ୍କା ଜରିମାନା ନିର୍ଦ୍ଦେଶ ଦେଇଛନ୍ତି। ଜରିମାନା ଅନାଦାୟ ଅଭିଯୁକ୍ତଙ୍କୁ ଅଧିକ ୬ମାସ କାରାଦଣ୍ଡ ଶୁଣାଇଛନ୍ତି। ସେହିପରି ପୀଡିତାଙ୍କୁ ୮ଲକ୍ଷ ଟଙ୍କା ଅନୁକମ୍ପା ରାଶି ପ୍ରଦାନ କରିବାକୁ କୋର୍ଟ ରାୟରେ ଉଲ୍ଲେଖ କରିଛନ୍ତି।
ସୂଚନାଯୋଗ୍ୟ, ୨୦୨୨ରେ ପୀଡ଼ିତା ଦଶମ ଶ୍ରେଣୀର ପଢୁଥିଲେ। ସେ ଖରାଛୁଟିରେ ହଷ୍ଟେଲରୁ ଗଁାକୁ ଆସିଥିଲେ। ହେଲେ ଦିନେ ପୀଡ଼ିତାଙ୍କୁ ଏକୁଟିଆ ପାଇ ମୁରଲୀଧର ଜୋରଜବରଦସ୍ତ ବଳାତ୍କାର କରିଥିଲେ। ଏପରିକି ଘଟଣା ସଂକ୍ରାନ୍ତରେ ଜଣାଇଲେ ଜୀବନରେ ମାରି ଦେବାକୁ ମଧ୍ୟ ଧମକ ଦେଇଥିଲେ । ଏଣୁ ଭୟରେ ନାବାଳିକା ଘରେ ଜଣାଇ ନ ଥିଲେ। ହେଲେ ସ୍କୁଲ ଖୋଲିବା ପରେ ସେ ହଷ୍ଟେଲକୁ ଯାଇଥିଲେ। ହଷ୍ଟେଲ ଓ୍ବାର୍ଡେନ ଛାତ୍ରୀଙ୍କ ଶାରୀରିକ ପରିବର୍ତ୍ତନ ଦେଖି ନାବାଳିକାଙ୍କ ମା’ ବାପାଙ୍କୁ ସ୍କୁଲକୁ ଡାକିଥିଲେ। ସେତିକିବେଳେ ନାବାଳିକା ଘଟଣା ସମ୍ପର୍କରେ କହିଥିଲେ। ପରେ ନାବାଳିକାଙ୍କ ଡାକ୍ତରୀ ପରୀକ୍ଷା ପରେ ସେ ଗର୍ଭବତୀ ଥିବା ଡାକ୍ତର କହିଥିଲେ। ଏନେଇ ନାବାଳିକା ଜଣକ କାଞ୍ଜିପାଣି ଥାନାରେ ଅଭିଯୋଗ କରିଥିଲେ। ପୋଲିସ ଏକ ମାମଲା (ନଂ.୧୩୨/୨୦୨୨) ରୁଜୁ କରି ତଦନ୍ତ ଆରମ୍ଭ କରିଥିଲା।
ପୋଲିସ ତଦନ୍ତ ପରେ ଅଭିଯୁକ୍ତଙ୍କୁ ଧରି ଡାକ୍ତରୀମାଇନା କରାଇଥିଲା। ଅଭିଯୁକ୍ତ ମୁରଲୀଧରଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ବିଚାରପତି ୧୨ଜଣ ସାକ୍ଷୀଙ୍କ ବୟାନ ଓ ପୋଲିସ ତଦନ୍ତ ରିପୋର୍ଟକୁ ଭିତ୍ତି କରି ଉକ୍ତ ରାୟ ପ୍ରକାଶ କରିଛନ୍ତି। ସରକାରଙ୍କ ପକ୍ଷରୁ ସ୍ବତନ୍ତ୍ର ପିପି ଜ୍ଞାନେନ୍ଦ୍ର ନାଥ ଜେନା ମାମଲା ପରିଚାଳନା କରିଥିଲେ।