ବରଗଡ଼ ଅଫିସ୍,୧୯।୧୧: ପଦ୍ମପୁର ଉପନିର୍ବାଚନ ପାଇଁ ଆସନ୍ତା ଡିସେମ୍ବର ୫ତାରିଖରେ ଭୋଟ ଗ୍ରହଣ ହେବ। ଶୁକ୍ରବାର ଏଥିପାଇଁ ପ୍ରାର୍ଥିପତ୍ର ଯାଞ୍ଚ ପ୍ରକ୍ରିୟା ସରିଛି। ଏହାପରେ ନିର୍ବାଚନ ମଣ୍ଡଳୀରେ ପ୍ରାର୍ଥୀମାନଙ୍କ ପ୍ରଚାର ଜୋର୍ ଧରିବାରେ ଲାଗିଛି। ଭାଜପା ଏବଂ ବିଜେଡ଼ି ପ୍ରଚାରରେ ଲାଗିପଡ଼ିଥିବା ବେଳେ କଂଗ୍ରେସ ଦଳୀୟ କାର୍ଯ୍ୟକର୍ତ୍ତାଙ୍କୁ ନେଇ ବୈଠକ କରୁଛି ଏବଂ ଦିନେ ଦୁଇଦିନ ମଧ୍ୟରେ କଂଗ୍ରେସ ମଧ୍ୟ ପ୍ରଚାରକୁ ଜୋର୍ କରିବ ବୋଲି ସୂଚନା ମିଳିଛି।
ଭାଜପା ପ୍ରାର୍ଥୀ ପ୍ରଦୀପ ପୁରୋହିତ ଶୁକ୍ରବାର ପାଇକମାଳ ଏବଂ ଝାରବନ୍ଧ ବ୍ଲକର ବିଭିନ୍ନ ଗ୍ରାମକୁ ପ୍ରଚାର ଯାଇଥିଲେ। ସ୍ଥାନୀୟ ଲୋକଙ୍କୁ ଭେଟି ତାଙ୍କ ସପକ୍ଷରେ ଭୋଟ୍ ଦେବାକୁ ସେ ନିବେଦନ କରିଥିଲେ। ପାଇକମାଳ ବ୍ଲକ ଛେତଗାଁ ପଞ୍ଚାୟତ ଅନ୍ତର୍ଗତ କୁତ୍ରାମାଲ, ଝାରବନ୍ଧ ବ୍ଲକର ସଂକ୍ରୀ, ପ୍ରଧାନପାଲି, ତୁମରିପାଣି, ବୈତାଲି, ଟୁହୁଙ୍ଗିପଦର, ଗୋଠୁଗୁଡ଼ା ଆଦି ଗ୍ରାମରେ ସେ ପ୍ରଚାର କରିଥିଲେ।
ସେହିପରି ବିଜେଡ଼ି ପ୍ରାର୍ଥିନୀ ବର୍ଷା ସିଂ ବରିହା କଂସର ପଞ୍ଚାୟତର ବାନ୍ଦୁପାଲି, ଜମରତଲା, ଦହିଗାଁ ଅଦି ଗ୍ରାମରେ ପ୍ରଚାର କରିଥିଲେ। ଏଠାରେ ଦଳର ରାଜ୍ୟ ଉପସଭାପତି ପ୍ରସନ୍ନ ଆଚାର୍ଯ୍ୟ, ବିଧାୟକ ଦେବୀ ପ୍ରସାଦ ମିଶ୍ର, ସୁଶାନ୍ତ ସିଂ, ସୌଭିକ ବିଶ୍ୱାଳ, ଦେବୀରଞ୍ଜନ ତ୍ରିପାଠୀ, ଅନୁଭବ ପଟ୍ଟନାୟକ, ଶ୍ରୀମୟୀ ମିଶ୍ର ପ୍ରମୁଖ ଉପସ୍ଥିତ ଥିଲେ। ଜମଲା, ପଲସାପାଲି, ଜ୍ଞାନ ତଥା ମେଲଛାମୁଣ୍ଡା ପଞ୍ଚୟତର ବିଭିନ୍ନ ଗ୍ରାମରେ ଅନୁଷ୍ଠିତ ବିଜେଡ଼ି ପ୍ରାର୍ଥିନୀଙ୍କ ପ୍ରଚାରରେ ପ୍ରାର୍ଥିୀ ଘୋଷଣା ପୂର୍ବରୁ ଆଶାୟୀ ଚର୍ଚ୍ଚାରେ ରହିଥିବା ମହେନ୍ଦ୍ର ବଢ଼େଇ ସାମିଲ ହୋଇଥିଲେ। ବର୍ଷାଙ୍କୁ ଝିଅ ବୋଲି ସମ୍ବୋଧନ କରି ତାଙ୍କ ସପକ୍ଷରେ ଭୋଟ୍ ଦେବାକୁ ସେ ନିବେଦନ କରିଥିଲେ। ଏଠାରେ ଦଳର ପର୍ଯ୍ୟବେକ୍ଷକ ପ୍ରତାପ ଜେନା, ବରଗଡ଼ ବିଧାୟକ ଦେବେଶ ଆଚାର୍ଯ୍ୟ, ପୂର୍ବତନ ଏମ୍ପି ପ୍ରଦୀପ ମାଝି, ସଂଗ୍ରାମ ପଟ୍ଟନାୟକ, ବିଜୟ ନାୟକ, ସଞ୍ଜିତ ମହାନ୍ତି, ଶିଶିର ପରିଜା, ରୋମାଞ୍ଚ ରଞ୍ଜନ ବିଶ୍ୱାଳ ପ୍ରମୁଖ ଉପସ୍ଥିତ ଥିଲେ।
ପାଇକମାଳରେ ଦଳୀୟ କାର୍ଯ୍ୟକର୍ତ୍ତାଙ୍କୁ ନେଇ କଂଗ୍ରେସର ଏକ ବୈଠକ ବସିଥିଲା। ନିର୍ବାଚନ ରଣନୀତି ପାଇଁ ବୈଠକରେ ଆଲୋଚନା ହୋଇଥିବା ଜଣାପଡ଼ିଛି। ପ୍ରଦେଶ କଂଗ୍ରେସ ସଭାପତି ଶରତ ପଟ୍ଟନାୟକ, ବିଧାୟକ ସନ୍ତୋଷ ସିଂ ସାଲୁଜା, ଅଧିରାଜ ପାଣିଗ୍ରାହୀ, ଦଳୀୟ ପ୍ରାର୍ଥୀ ସତ୍ୟଭୂଷଣ ସାହୁ, ଜିଲା କଂଗ୍ରେସ ସଭାପତି ନିହାର ରଞ୍ଜନ ମହାନନ୍ଦ, ଯଜ୍ଞେଶ୍ୱର ବାବୁ, ପ୍ରଦୀପ ଦେବତା, ପାଣ୍ଡବ କର୍ଣ୍ଣ, ହରଦୀପ ସିଂ, ନିପନ ଦାଶ ପ୍ରମୁଖ ଉପସ୍ଥିତ ଥିଲେ।