ଇମୋଲା (ଇଟାଲି), ୧୯ା୪-ରେଡବୁଲ୍ର ମାକ୍ସ ଭର୍ଷ୍ଟାପେନ୍ ଇମିଲିଆ ରୋମାଗ୍ନା ଫର୍ମୁଲା ଓ୍ବାନ୍ ଗ୍ରାଁ ପ୍ରି କାର୍ ରେସ୍ ଜିତିଛନ୍ତି। ଚଳିତବର୍ଷ ଏହା ତାଙ୍କର ପ୍ରଥମ ଏବଂ କ୍ୟାରିୟରର ୧୧ତମ ଟାଇଟଲ ବିଜୟ। ରେସ୍ ଆରମ୍ଭରେ ରେଡ୍ ଫ୍ଲାଗ୍ ଯୋଗୁ ସେ କିଛିଟା ନର୍ଭସ ହୋଇଯାଇଥିଲେ, ମାତ୍ର ପରେ ତ୍ରୁଟିହୀନ ଡ୍ରାଇଭିଂ ସହ ୨୨ ସେକେଣ୍ଡ ବ୍ୟବଧାନରେ ରେସ୍ ଜିତିଥିଲେ। ମର୍ସିଡିଜର ଲୁଇସ୍ ହାମିଲଟନ ଦ୍ୱିତୀୟ ଓ ମ୍ୟାକ ଲରେନର ଲାଣ୍ଡୋ ନୋରିସ ତୃତୀୟ ହୋଇଥିଲେ। ଫେରାରିର ଦୁଇ ଡ୍ରାଇଭର ଚାଲର୍ସ ଲେକ୍ରେକ୍ ଓ କାର୍ଲୋସ ସେଞ୍ଜ ଜୁନିୟର ଯଥାକ୍ରମେ ୪ର୍ଥ ଓ ୫ମ ସ୍ଥାନ ଅଧିକାର କରିଥିଲେ। ନୋରିସଙ୍କ ଟିମ୍ମେଟ ଡାନିଏଲ ରିକାର୍ଡୋ ଓ ଆଷ୍ଟନ ମାର୍ଟିନର ଲାନ୍ସ ଷ୍ଟ୍ରୋଲ୍ ୬ଷ୍ଠ ଓ ୭ମରେ ରହିଥିଲେ। ପିଏରେ ଗାସ୍ଲି (ଆଲ୍ଫା ତୌରି), କିମି ରାଇକୋନେନ (ଆଲ୍ଫା ରୋମିଓ) ଓ ଏଷ୍ଟିବାନ ଓକନ (ଆଲ୍ପାଇନ୍) ଯଥାକ୍ରମେ ୮ମ, ୯ମ ଓ ୧୦ମ ହୋଇଥିଲେ। ରବିବାର ରେସ୍ ଆରମ୍ଭରେ ବର୍ଷା ହୋଇଥିଲା। ବିଭିନ୍ନ କାରଣରୁ ଭାଲଟେରି ବୋଟାସ, ସେବାଷ୍ଟିଆନ ଭେଟେଲ, ଜର୍ଜ ରସେଲ ଓ ନିକୋଲାସ ଲତିଫି ରେସ୍ ଶେଷ କରିପାରି ନ ଥିଲେ।