ଲାସ୍ ଭେଗାସ, ୨୦ା୧୧ : ରେଡ୍ବୁଲ୍ର ମାକ୍ସ ଭର୍ଷ୍ଟାପେନ୍ ଲାସ୍ଭେଗାସ ଫର୍ମୁଲା ଓ୍ବାନ ମୋଟର ରେସ୍ ଗ୍ରାଁ ପ୍ରି ଜିତିଛନ୍ତି। ଚଳିତ ସିଜନରେ ଏହା ହେଉଛି ତାଙ୍କର ୧୮ତମ ରେସ୍ ବିଜୟ। ୩ଥର ବିଶ୍ୱ ଚାମ୍ପିୟନଙ୍କର ଏହା କ୍ରମାଗତ ୬ଷ୍ଠ ଏବଂ ମୋଟ ଉପରେ ୫୩ତମ ରେସ୍ ବିଜୟ। ରେସ୍ ଆରମ୍ଭରେ ଫେରାରିର ଚାଲର୍ସ ଲେକ୍ରେକ୍ଙ୍କୁ ଟ୍ରାକ୍ରୁ ବାହାରି ଯିବାକୁ ବାଧ୍ୟ କରିବା ଏବଂ ପରେ ମର୍ସିଡିଜ୍ର ଜର୍ଜ ରସେଲଙ୍କ ସହ ଧକ୍କା ପାଇଁ ତାଙ୍କୁ ୫ସେକେଣ୍ଡ ପେନାଲ୍ଟି ହୋଇଥିଲା। ଏହା ସତ୍ତ୍ୱେ ସେ ଲେକ୍ରେକଙ୍କୁ ପଛରେ ପକାଇ ରେସ୍ ଜିତି ନେଇଥିଲେ। ତାଙ୍କ ଟିମ୍ମେଟ ସର୍ଗିଓ ପେରେଜଙ୍କୁ ତୃତୀୟ ସ୍ଥାନରେ ସନ୍ତୁଷ୍ଟ ହେବାକୁ ପଡ଼ିଥିଲା। ଏହି ବିଜୟ ଦ୍ୱାରା ଭର୍ଷ୍ଟାପେନ୍ ସର୍ବକାଳିନ ବିଜୟୀ ତାଲିକାରେ ସେବାଷ୍ଟିଆନ ଭେଟଲଙ୍କ ସହ ମିଳିତ ତୃତୀୟ ସ୍ଥାନ ଅଧିକାର କରିଛନ୍ତି। ଗୋଟିଏ ସିଜନରେ ୨୧ଟି ରେସ୍ରୁ ରେଡ୍ବୁଲ୍ର ୨୦ତମ ବିଜୟ ଏକ ରେକର୍ଡ। ରେସ୍ର ୪ର୍ଥ ଓ ୧୦ମ ସ୍ଥାନ ମଧ୍ୟରେ ରହିଥିବା ଡ୍ରାଇଭରମାନେ ହେଲେ ଏଷ୍ଟିବାନ ଓକନ (ଅଲପାଇନ୍), ଲାନ୍ସ ଷ୍ଟ୍ରୋଲ୍ (ଆଷ୍ଟନ ମାର୍ଟିନ), କାର୍ଲୋସ ସେଞ୍ଜ ଜୁନିୟର (ଫେରାରି), ଲୁଇସ୍ ହାମିଲଟନ(ମର୍ସିଡିଜ୍), ଜର୍ଜ ରସେଲ (ମର୍ସିଡିଜ), ଫର୍ନାଣ୍ଡୋ ଆଲେଁାସୋ (ଆଷ୍ଟନ ମାର୍ଟିନ) ଏବଂ ଓସ୍କାର ପିଆଷ୍ଟ୍ରି (ମ୍ୟାକଲରେନ)। ୩ଦିନ ଧରି ଅନୁଷ୍ଠିତ ଏହି ଇଭେଣ୍ଟ ମୋଟ ୩୧୫,୦୦୦ ଦର୍ଶକଙ୍କୁ ଆକର୍ଷିତ କରିଥିଲା। ଖୁବ୍ ଜାକଜକମରେ ଅନୁଷ୍ଠିତ ସିଜନର ୨୧ତମ ରେସ୍ ପାଇଁ ଟିକେଟର ଦାମ୍ ଅଧିକ ରହିଥିଲା। ହେଟେଲଗୁଡ଼ିକ ସେମାନଙ୍କ ମୂଲ୍ୟ ବଢାଇ ଦେଇଥିଲେ।
