୫୩ ବର୍ଷରେ ଏହି ପ୍ରସିଦ୍ଧ ଅଭିନେତ୍ରୀଙ୍କ ସରିଥିଲା ନିର୍ବନ୍ଧ: ବିବାହ ପୂର୍ବରୁ ଆତ୍ମହତ୍ୟା କରିଥିଲେ ଭାବି ସ୍ବାମୀ
43 ଭେଟେରାନ ଅଭିନେତ୍ରୀ ନନ୍ଦାଙ୍କର ଆଜି ହେଉଛି ୭ମ ମୃତ୍ୟୁ ବାର୍ଷିକୀ। ମାର୍ଚ୍ଚ ୨୫, ୨୦୧୪ରେ ମୁମ୍ବାଇରେ ସେ ଶେଷ ନିଶ୍ୱାସ ତ୍ୟାଗ କରିଥିଲେ। ବଲିଉଡ୍ରେ ତାଙ୍କର ଇମେଜ୍ ଛୋଟ ଭଉଣୀର ଥିଲା। ଅର୍ଥାତ୍ କ୍ୟାରିୟର ଆରମ୍ଭରେ ଅଧିକାଂଶ ସିନେମାରେ ସେ ସାନ ଭଉଣୀ ଚରିତ୍ରରେ ଅଭିନୟ କରୁଥିଲେ। କିନ୍ତୁ ପରେ ସେ ନିଜ ଇମେଜ ପରିବର୍ତ୍ତନ କରିଥିଲେ ଏବଂ ଫିଲ୍ମରେ ପ୍ରମୁଖ ଅଭିନେତ୍ରୀ ଭାବେ କାମ କରିଥିଲେ।
ନନ୍ଦା ତାଙ୍କ ସମୟର ସବୁଠାରୁ ସୁନ୍ଦରୀ ଅଭିନେତ୍ରୀଙ୍କ ମଧ୍ୟରୁ ଜଣେ। ମାତ୍ର ୫ ବର୍ଷ ବୟସରୁ ସେ ଅଭିନୟ କରିବା ଆରମ୍ଭ କରିଥିଲେ। ପରେ ୧୯୫୯ରେ ଫିଲ୍ମ ‘ଛୋଟ ବେହେନ’ରେ ବଲରାଜ ସାହାନୀ ଏବଂ ରହମାନଙ୍କ ସାନ ଭଉଣୀ ଚରିତ୍ରରେ ଅଭିନୟ କରି ଲୋକପ୍ରିୟ ହୋଇଥିଲେ। ତାଙ୍କର ଚରିତ୍ର ଦର୍ଶକଙ୍କୁ ଏତେମାତ୍ରାରେ ପସନ୍ଦ ଆସିଥିଲା ଯେ, ଲୋକେ ତାଙ୍କୁ ଶହ ଶହ ରାଖି ପଠାଇଥିଲେ। ଏହି ସମାନ ବର୍ଷ ରାଜେନ୍ଦ୍ର କୁମାରଙ୍କ ସହ ତାଙ୍କ ଫିଲ୍ମ ‘ଧୁଲ କା ଫୁଲ’ ମଧ୍ୟ ସୁପରହିଟ୍ ହୋଇଥିବା ବେଳେ ନନ୍ଦା ମଧ୍ୟ ରାତାରାତି ଲୋକପ୍ରିୟ ହୋଇଥିଲେ। ୧୯୬୧ରେ ଫିଲ୍ମ ‘ହମ୍ ଦୋନୋ’ରେ ତାଙ୍କୁ ପ୍ରମୁଖ ଚରିତ୍ରରେ ଦେଖିବାକୁ ମିଳିଥିଲା। ଏହି ଫିଲ୍ମ ହିଟ୍ ହେବା ପରେ ଫିଲ୍ମରେ ମୁଖ୍ୟ ଚରିତ୍ରରେ ତାଙ୍କୁ ଅଫର ମିଳିବାରେ ଲାଗିଲା। ବୟସ ବୃଦ୍ଧି ଯୋଗୁ ସେ ଫିଲ୍ମରେ କାମ କରିବା ଧିରେ ଧିରେ କମ କରିଦେଲେ। ପରେ ତାଙ୍କର ଅଧିକାଂଶ ଫିଲ୍ମ ଫ୍ଲପ୍ ହେବାକୁ ଲାଗିଲା। ତେଣୁ ସେ ଫିଲ୍ମ ଇଣ୍ଡଷ୍ଟ୍ରିରୁ ଦୂରେଇ ଗଲେ। ଫିଲ୍ମରେ ଏତେ ବ୍ୟସ୍ତ ରହୁଥିଲେ ଯେ, ନିଜ ବିଷୟରେ ଭାବିବାକୁ ତାଙ୍କ ପାଖରେ ସମୟ ନ ଥିଲା। ଏହାରି ମଧ୍ୟରେ ସେ ନିର୍ଦ୍ଦେଶକ ମନମୋହନ ଦେସାଈଙ୍କୁ ସେ ମନେ ମନେ ଭଲ ପାଇ ବସିଥିଲେ। ଦେସାଇ ମଧ୍ୟ ତାଙ୍କୁ ଭଲ ପାଉଥିଲେ। ହେଲେ ଉଭୟ କେବେ ହେଲେ ନିଜ ପ୍ରେମକୁ ପ୍ରକାଶ କରିପାରି ନ ଥିଲେ। ଶେଷରେ ମନମୋହନ ଅନ୍ୟ ଜଣଙ୍କୁ ବିବାହ କରିଥିଲେ। ମାତ୍ର କିଛି ବର୍ଷ ପରେ ତାଙ୍କ ସ୍ତ୍ରୀଙ୍କର ମୃତ୍ୟୁ ଘଟିଥିଲା। ପରେ ମନମୋହନ ନନ୍ଦାଙ୍କୁ ପ୍ରେମ ନିବେଦନ କରିଥିଲେ। ନନ୍ଦା ମଧ୍ୟ ଏହାକୁ ସ୍ବିକାର କରିଥିଲେ। ଏହି ସମୟରେ ନନ୍ଦାଙ୍କ ବୟସ ୫୨ ହୋଇଥିଲା। ୧୯୯୨ରେ ୫୩ ବର୍ଷୀୟା ନନ୍ଦା ମନମୋହନଙ୍କ ସହ ନିର୍ବନ୍ଧ କରିଥିଲେ। ମାତ୍ର ଭାଗ୍ୟ ଆଉ କିଛି ଚାହୁଁଥିଲା। ମନମୋହନ ନିଜ ରୋଗରେ ଭାଙ୍ଗିପଡ଼ି ଶେଷରେ ଆତ୍ମହତ୍ୟା କରିଥିଲେ। ଏହା ପରେ ନନ୍ଦା ଆଉ କାହାକୁ ବିବାହ କଲେ ନାହିଁ।