ବରଗଡ଼,୮।୨(ପ୍ରେମାନନ୍ଦ ଖମାରୀ): ଓଡ଼ିଶା ପ୍ରାଣୀ ଚିକିତ୍ସା ସେବା ସଂଘ ପକ୍ଷରୁ ଆନ୍ଦୋଳନ ଜାରି ରହିଛି। ଏଥିରେ ସଂଘର ବରଗଡ଼ ଜିଲା ଶାଖା ମଧ୍ୟ ସାମିଲ ହୋଇଛି । ଗତ ଜାନୁଆରୀ ୧୮ତାରିଖରୁ ପ୍ରାଣୀ ଚିକିତ୍ସକମାନେ ସମୂହ ଛୁଟିରେ ରହି ଜିଲା ମୁଖ୍ୟ ପ୍ରାଣୀ ଚିକିତ୍ସାଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଜାରି ରଖିଛନ୍ତି । ଆନ୍ଦୋଳନକୁ ୩ ସପ୍ତାହ ବିତିଯାଇଛି । ହେଲେ ପ୍ରାଣୀ ଚିକିତ୍ସକଙ୍କ ଦାବି ସମୂହ ଉପରେ କିଛି ନିର୍ଯାସ ବାହାରି ପାରିନାହିଁ। ଅନ୍ୟପଟେ ଲୋକେ ପ୍ରାଣୀ ଚିକିତ୍ସା ବିଭାଗ ଯୋଗାଉଥିବା ସେବାରୁ ବଞ୍ଚତ୍ତ ହୋଇଛନ୍ତି। ପ୍ରାଣୀ ଚିକିତ୍ସା ସେବା ନ ପାଇ ଲୋକେ ହଟହଟା ହେବା ସହିତ ଏହାକୁ ନେଇ ଅସନ୍ତୋଷ ବଢ଼ିବାରେ ଲାଗିଛି। ଗୁରୁବାର ପ୍ରାଣୀ ଚିକିତ୍ସା ସେବାରୁ ବଞ୍ଚିତ ବିଭିନ୍ନ ଗ୍ରାମର ଲୋକେ ଜିଲାପାଳ ଆଦିତ୍ୟ ଗୋୟଲ ଏବଂ ଜିଲା ମୁଖ୍ୟ ପ୍ରାଣୀ ଚିକିତ୍ସାଧିକାରୀଙ୍କ କାର୍ଯ୍ୟାଳୟରେ ଅବସ୍ଥାପିତ ଭାରପ୍ରାପ୍ତ ଅଧିକାରୀ ଡା. ପି. ସି. ଜେନାଙ୍କୁ ଫେରାଦ ହୋଇଥିଲେ ଏବଂ ସ୍ମାରକପତ୍ର ପ୍ରଦାନ ସହିତ ସେମାନଙ୍କ ସମସ୍ୟା ଉପରେ ଅବଗତ କରିଥିଲେ।
ବରପାଲି ବ୍ଲକ ଅଧୀନ ସତଲମା ଗ୍ରାମର ଦୀପାଳି ପୂଜାରୀ ପ୍ରଶାସନର ଦ୍ୱାରସ୍ଥ ହୋଇ ଜଣାଇଛନ୍ତି, ସେ ମୁଖ୍ୟମନ୍ତ୍ରୀ କୃଷି ଉଦ୍ୟୋଗ ଯୋଜନା(ଏମ୍କେୟୁୱାଇ)ରେ ଏକ ଗାଈଫାର୍ମ କରିଛନ୍ତି । ଫାର୍ମରେ ବର୍ତ୍ତମାନ ୨୦ଟି ଗାଈ ଅଛନ୍ତି । ସମୂହ ଛୁଟିରେ ଥିବାରୁ ପ୍ରାଣୀ ଚିକିତ୍ସକମାନେ ଫାର୍ମ ପରିଦର୍ଶନ କରିବାକୁ ଆସୁନାହାନ୍ତି । ଫଳରେ ଗାଈମାନଙ୍କର ବୀମା ହୋଇ ପାରୁ ନ ଥିବାବେଳେ ଗାଈମାନଙ୍କୁ କୌଣସି ଚିକିତ୍ସା ସେବା ମଧ୍ୟ ମିଳି ପାରୁନାହିଁ । ଏହାସହିତ ଗାଈମାନଙ୍କ କୃତ୍ରିମ ପ୍ରଜନନ ସୁବିଧା ମଧ୍ୟ ହୋଇପାରୁ ନ ଥିବା ସେ ଅଭିଯୋଗ କରିଛନ୍ତି।
ସେହିପରି ବରପାଲି ବ୍ଲକ ଅନ୍ତର୍ଗତ ଧୀରପୁର ଗ୍ରାମର ମାଁ ସମଲେଶ୍ୱରୀ ସ୍ବୟଂ ସହାୟକ ଗୋଷ୍ଠୀର ଏକ ପ୍ରତିନିଧି ଦଳ ମଧ୍ୟ ଜିଲାପାଳ ଏବଂ ଜିଲା ମୁଖ୍ୟ ପ୍ରାଣୀ ଚିକିତ୍ସାଧିକାରୀଙ୍କୁ ଫେରାଦ ହୋଇଥିଲେ। ଉକ୍ତ ସ୍ବୟଂ ସହାୟକ ଗୋଷ୍ଠୀ ଏକ ଛେଳିଫାର୍ମ କରିଛନ୍ତି। ପ୍ରଥମ ପର୍ଯ୍ୟାୟରେ ଛେଳି ଗୁହାଳ ନିର୍ମାଣ କରିଛନ୍ତି । କିନ୍ତୁ ପ୍ରାଣୀ ଚିକିତ୍ସକମାନେ ସମୂହ ଛୁଟିରେ ରହିଥିବାରୁ ପରିଦର୍ଶନରେ ଆସୁନାହାନ୍ତି। ଫଳରେ ସେମାନେ ପ୍ରଥମ ପର୍ଯ୍ୟାୟ ରିହାତି ମଧ୍ୟ ଏପର୍ଯ୍ୟନ୍ତ ପାଇ ପାରି ନ ଥିବା ଗୋଷ୍ଠୀର ସଭାନେତ୍ରୀ ଆରତୀ ମହାରଣା, ସମ୍ପାଦିକା ବେଦମତୀ ଖଟୁଆଙ୍କ ନେତୃତ୍ୱରେ ଅନ୍ୟ ସଦସ୍ୟାମାନେ କହିଛନ୍ତି।
ସେହିପରି ବିଜେପୁର ବ୍ଲକ ଅନ୍ତର୍ଗତ ବୁରୋମୁଣ୍ଡା ଗ୍ରାମର ମାଁ ଘଣ୍ଟେଶ୍ୱରୀ ସ୍ବୟଂ ସହାୟକ ଗୋଷ୍ଠୀ ମଧ୍ୟ ଅନୁରୂପ ଅଭିଯୋଗ କରିଛି । ସେମାନେ କରଜ କରି ୩୨ଟି ଛେଳି କିଣିସାରିଛନ୍ତି । ତେବେ ଉକ୍ତ ଗୋଷ୍ଠୀକୁ ପ୍ରଥମ ପର୍ଯ୍ୟାୟ ସରକାରୀ ସହାୟତା ମିଳିସାରି ଥିବାବେଳେ ପ୍ରାଣୀ ଚିକିତ୍ସକଙ୍କ ଆନ୍ଦୋଳନ ଯୋଗୁ ଦ୍ୱିତୀୟ ପର୍ଯ୍ୟାୟ ସହାୟତାରୁ ବଞ୍ଚତ୍ତ ଥିବା ସେମାନେ ଅଭିଯୋଗ କରିଛନ୍ତି । ଗୋଷ୍ଠୀର କଳନି ମଲ୍ଲିକ, ଶାନ୍ତିଲତା ବିଶି, ଉପମା ସାହୁ, ଯାମିନୀ ମଲ୍ଲିକ, ସଞ୍ଜୁଲତା ସାହୁ ପ୍ରମୁଖ ସ୍ମାରକପତ୍ର ପ୍ରଦାନ ପାଇଁ ଜିଲାପାଳ ଏବଂ ଜିଲା ମୁଖ୍ୟ ପ୍ରାଣୀ ଚିକିତ୍ସାଧିକାରୀଙ୍କ କାର୍ଯ୍ୟାଳୟକୁ ଆସିଥିଲେ।
ଉଲ୍ଲେଖଯୋଗ୍ୟ, କେନ୍ଦ୍ର ସରକାରଙ୍କ ଅଧୀନରେ କାର୍ଯ୍ୟରତ ପ୍ରାଣୀ ଚିକିତ୍ସକମାନଙ୍କ ସହ ସମାନ ପଦୋନ୍ନତି ସୁବିଧା, କେନ୍ଦ୍ର ହାରରେ ଏନ୍ପିଏ, ରାଜ୍ୟରେ ପ୍ରାଣୀ ଗଣନା ଓ ଜନସାଧାରଣଙ୍କ ଆବଶ୍ୟକତା ଆଧାରରେ ଡାକ୍ତର ପଦବୀ ସୃଷ୍ଟି, ଡାକ୍ତର ନିଯୁକ୍ତି, କ୍ୟାଡ଼ର ପୁନର୍ଗଠନ ଆଦି ଦାବି ନେଇ ପ୍ରାଣୀ ଚିକିତ୍ସା ସେବା ସଂଘ ଦୀର୍ଘଦିନରୁ ସରକାରଙ୍କ ଦୃଷ୍ଟି ଆକର୍ଷଣ କରିଆସୁଛି । ମାତ୍ର ସେ ଦିଗରେ କିଛି ପଦକ୍ଷେପ ନେଉ ନ ଥିବା ଅଭିଯୋଗ କରି ସେମାନେ ସମୂହ ଛୁଟିକୁ ଓହ୍ଲାଇଛନ୍ତି। ପ୍ରାଣୀ ଚିକିତ୍ସକଙ୍କ ଆନ୍ଦୋଳନ ଯୋଗୁ ପ୍ରାଣୀ ଚିକିତ୍ସା ସେବା ଏବଂ ଅନ୍ୟ ବିଭାଗୀୟ କାର୍ଯ୍ୟ ପ୍ରଭାବିତ ହୋଇଛି ।