ଭାରତ ବହୁବିଧ ସଂସ୍କୃତିରେ ଭରପୂର। ଜାନୁଆରୀ ମଧ୍ୟବର୍ତ୍ତୀ ସମୟରେ ସୂର୍ଯ୍ୟଙ୍କର ଉତ୍ତରାୟଣ ଗତି ହୋଇଥାଏ। ଅର୍ଥାତ୍ ଶୀତ ସରିଯିବାର ଏହା ସଙ୍କେତ ଦିଏ। ଓଡ଼ିଶାରେ ଏହା ମକର ସଂକ୍ରାନ୍ତି ଭାବେ ପାଳନ କରାଯାଉଥିବା ବେଳେ ଆନ୍ଧ୍ରପ୍ରଦେଶରେ ସଂକ୍ରାନ୍ତି, ଆସାମରେ ମାଘ ବିହୁ, ତାମିଲନାଡୁରେ ପୋଙ୍ଗଲ, ପଞ୍ଜାବରେ ଲୋହରି, ଗୁଜରାଟରେ ଉତ୍ତରାୟଣ ଆଦି ଭିନ୍ନ ଭିନ୍ନ ନାମରେ ଉତ୍ସବ ପାଳନ ହୋଇଥାଏ। କୃଷିକୈନ୍ଦ୍ରିକ ଭାରତରେ ଏହା ଅମଳର ସମୟ ହୋଇଥିବାରୁ ସବୁଆଡ଼େ ଖାଦ୍ୟକୁ ନେଇ ଆନନ୍ଦ ପ୍ରକାଶ ପାଇଥାଏ। ହେଲେ କିଛି ଅଞ୍ଚଳରେ ଅଜବ ଧରଣର ପରମ୍ପରାକୁ ଗୁରୁତ୍ୱ ଦିଆଯାଇ ତାହାକୁ ଧୂମଧାମ୍ରେ ପାଳନ କରାଯାଉଥିବା ଦେଖିବାକୁ ମିଳୁଛି। ତାମିଲନାଡୁରେ ଜାଲିକାଟୁକୁ ନେଇ ବିବାଦ ଲାଗିରହିଥିବା ବେଳେ ଆନ୍ଧ୍ରପ୍ରଦେଶରେ ଆଉ ଏକ ନୂଆ ସମସ୍ୟା ସୃଷ୍ଟି ହୋଇଛି। ମକର ସଂକ୍ରାନ୍ତି ବେଳେ ଆନ୍ଧ୍ରପ୍ରଦେଶର ବହୁ ସ୍ଥାନରେ ଗଞ୍ଜା ଲଢ଼େଇ ହୋଇଥାଏ, ଯେଉଁଥିରେ ଅନେକ କୋଟି ଟଙ୍କାର ଖେଳ ହୁଏ। କିନ୍ତୁ ଏବେ ଭାରତର ବହୁ ସ୍ଥାନରେ କୁକୁଡ଼ାଙ୍କ ମଧ୍ୟରେ ଶ୍ୱାସପ୍ରଶ୍ୱାସଜନିତ ରୋଗ ବ୍ୟାପୁଛି। ତାହାକୁ ରାଣୀଖେତ ନାମ ଦିଆଯାଇଛି। ଏହି ରୋଗ ଦ୍ୱାରା ଆକ୍ରାନ୍ତ ହୋଇଥିବା ଗଞ୍ଜା ଆସନ୍ତା ସଂକ୍ରାନ୍ତି ସମୟରେ ଭଲଭାବେ ଲଢ଼ିପାରିବ ବୋଲି ମାଲିକମାନଙ୍କର ବିଶ୍ୱାସ ହେଉନାହିଁ। ସେଥିପାଇଁ ଏବେଠାରୁ ମାଲିକମାନେ ନିଜର ଲଢ଼ୁଆ ଗଞ୍ଜାଙ୍କୁ ଭିଟାମିନ ଏବଂ ମଣିଷ ଖାଉଥିବା ଭାଏଗ୍ରା ଦେବାକୁ ଆରମ୍ଭ କଲେଣି। ଉଲ୍ଲେଖଯୋଗ୍ୟ ଯେ ଭାଏଗ୍ରା ମୂଳତଃ ଉଚ୍ଚରକ୍ତଚାପ ଓ ହୃତ୍ପିଣ୍ଡ ସମ୍ବନ୍ଧୀୟ ରୋଗ ଉପଶମ ଲାଗି ପ୍ରସ୍ତୁତ କରାଯାଇଥିଲା। ପରୀକ୍ଷା ବେଳେ ଜଣାପଡ଼ିଲା ଯେ, ତାହା ସେହି ରୋଗ ପାଇଁ କାର୍ଯ୍ୟ କରୁନାହିଁ। କିନ୍ତୁ ପୁରୁଷଙ୍କ ଯୌନ କ୍ଷମତା ବହୁ ପରିମାଣରେ ବୃଦ୍ଧି ପାଇବାରୁ ଏହା ଉପରେ ଗବେଷଣା କରି ଉଦ୍ଭାବନ କରିଥିବା ଔଷଧୀୟ କମ୍ପାନୀ ଫାଇଜର ତାହାକୁ ଭିନ୍ନ ଭାବେ ବିକ୍ରି କଲା। ଫଳସ୍ବରୂପ ଭାଏଗ୍ରା ଔଷଧ ଜଗତରେ ଏକ ବିପ୍ଳବ ଆଣିଲା। ବିଶେଷଜ୍ଞଙ୍କ ମତରେ ଆନ୍ଧ୍ରର ଗଞ୍ଜାଗୁଡ଼ିକୁ ଭାଏଗ୍ରା ସହିତ ଷ୍ଟେରଏଡ୍ଯୁକ୍ତ ଖାଦ୍ୟ ଖାଇବାକୁ ଦିଆଯାଉଥିବାରୁ ତାହାର ନକାରାତ୍ମକ ଦିଗ ପରବର୍ତ୍ତୀ ସମୟରେ ଜଣାପଡ଼ିପାରେ। ଏହି ଗଞ୍ଜା ଓ କୁକୁଡ଼ାଗୁଡ଼ିକୁ ଯଦି ମଣିଷ ଖାଇବେ ତେବେ ସେମାନଙ୍କ ସ୍ବାସ୍ଥ୍ୟ ଉପରେ ପ୍ରଭାବ ପଡ଼ିପାରେ।
କୋଭିଡ୍-୧୯ର ଉତ୍ପତ୍ତି ଚାଇନାରୁ ହୋଇଥିବା ବିଶ୍ୱାସ କରାଯାଉଛି। ଖାଦ୍ୟ ଚାହିଦା ମେଣ୍ଟାଇବା ଲାଗି ସେଠାରେ କୁକୁଡ଼ାଠାରୁ ଆରମ୍ଭ କରି କୁକୁରଗୁଡ଼ିକୁ କିଭଳି କମ୍ ସମୟରେ ବଢ଼ାଇ ଦିଆଯାଇପାରିବ, ସେଥିଲାଗି ଅନେକ ପ୍ରକାର ଇଞ୍ଜେକଶନ ଦିଆଯାଉଥିବା ଭିଡିଓ ଡିଜିଟାଲ ଗଣମାଧ୍ୟମରୁ ଦେଖିବାକୁ ମିଳୁଛି। ଅର୍ଥାତ୍ ଏହି ଜୀବଗୁଡ଼ିକୁ ପ୍ରାକୃତିକ ଉପାୟରେ ବଢ଼ିବା ଲାଗି ସୁଯୋଗ ଦିଆଯାଉ ନାହିଁ। ଭାରତ ମଧ୍ୟ ଅନୁରୂପ ପଦ୍ଧତି ଅନୁସରଣ କରିବାରେ ବ୍ୟସ୍ତ। ସମ୍ଭବତଃ ସେଥିପାଇଁ ଦିନକୁ ଦିନ ନୂଆ ଭୂତାଣୁର ଆବିର୍ଭାବ ଘଟୁଛି। ବର୍ତ୍ତମାନ ବିଶ୍ୱତାପନ ଓ ଜଳବାୟୁ ପରିବର୍ତ୍ତନ, ପ୍ଲାଷ୍ଟିକ୍ଭର୍ତ୍ତି ପରିବେଶ ଓ ଧୂଳିଧୂଆଁରେ ଆଚ୍ଛାଦିତ ବାୟୁମଣ୍ଡଳରେ ପ୍ରଶ୍ୱାସ ନେବା କଷ୍ଟକର ହେଉଥିବା ବେଳେ ମଣିଷ ପ୍ରକୃତି ଓ ଜୀବଜନ୍ତୁଙ୍କ ଜୀବନକୁ ଦୁର୍ବିଷହରେ ପକାଇ ଆଗକୁ ଆହୁରି ଦୁର୍ଦ୍ଦିନକୁ ଡାକିଆଣୁଛି। କହିବାକୁ ଗଲେ ମଣିଷ ନିଜ ଗୋଡ଼ରେ କୁରାଢ଼ି ମାରୁଛି।
ସଂକ୍ରାନ୍ତି ଭଳି ପର୍ବ ପ୍ରକୃତି ସହିତ ସମ୍ପୂର୍ଣ୍ଣ ଭାବେ ଜଡ଼ିତ ଥିଲା। ମଣିଷର ଲୋଭ ସେହିସବୁ ପର୍ବପର୍ବାଣିକୁ ବିକୃତ ରୂପ ଦେବାକୁ ଆରମ୍ଭ କଲାଣି। ଜାଣତରେ ହେଉ ବା ଅଜାଣତରେ, ଯେଉଁସବୁ ଆଧୁନିକ ଉପାୟ ବ୍ୟବହାର କରି ମଣିଷ ଭାବୁଛି ତାହାର ଐତିହ୍ୟକୁ ଭିନ୍ନ ରୂପେ ଆଙ୍କିବ, ସେଥିରେ ଅନେକ ଦୁର୍ଦ୍ଦଶା ଘଟିପାରେ। ଉଦାହରଣସ୍ବରୂପ, କେନ୍ଦ୍ର ସରକାର ନିକଟରେ ପରିବର୍ତ୍ତନ କରିଥିବା ନ୍ୟାୟ ସଂହିତାକୁ ଦେଖିଲେ ଏକ ବିକୃତ ମାନସିକତାର ପରିଚୟ ମିଳୁଛି। ଏହି ନୂତନ ଆଇନ ବହିରୁ ବାଦ୍ପଡ଼ିଛି ଏକ ଗୁରୁତ୍ୱପୂର୍ଣ୍ଣ ଭାଗ। ପୂର୍ବରୁ ଥିଲା ମଣିଷ ଯଦି ପଶୁପକ୍ଷୀଙ୍କୁ ଯୌନ ନିର୍ଯାତନା ଦେଇଥାଏ, ତେବେ ତାହା ଦଣ୍ଡନୀୟ ଅପରାଧ ଭାବେ ପରିଗଣିତ ହେଉଥିଲା। ନୂଆ ଭାରତୀୟ ନ୍ୟାୟ ସଂହିତାରେ ସେହି ଆଇନକୁ ସମ୍ପୂର୍ଣ୍ଣ ଭାବେ ବାଦ୍ ପକାଇ ଦିଆଯାଇଛି। ଏହା ଫଳରେ ଅନେକ ନାମୀଦାମୀ ଲୋକଙ୍କୁ ସହଜରେ ପ୍ରଶ୍ୱାସ ନେବାର ସୁଯୋଗ ସୃଷ୍ଟି କରାଗଲା।
