ରାୟଗଡ଼ା ଅଫିସ,୧୯ା୭:ରାୟଗଡ଼ା ଜିଲା କାଶୀପୁରରେ ଝାଡ଼ାବାନ୍ତି ବ୍ୟାପିବା ଘଟଣାରେ ସୋମବାର ଆର୍ଏମ୍ଆର୍ସି ଲ୍ୟାବ୍ର ମଳ ରିପୋର୍ଟ ପହଞ୍ଚିଛି। ଅଞ୍ଚଳବାସୀ ଭିବ୍ରିଓ କଲେରାରେ ଆକ୍ରାନ୍ତ ହୋଇଥିବା ରିପୋର୍ଟରୁ ସ୍ପଷ୍ଟ ହୋଇଥିବା ଜିଲାପାଳ ସ୍ବଧା ଦେବ ସିଂ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ଝାଡ଼ାବାନ୍ତିରେ ମୃତ୍ୟୁ ସଂଖ୍ୟା ୭ ଥିବାବେଳେ ଏବେ ବି ୫୦ରୁ ଊର୍ଦ୍ଧ୍ୱ ଆକ୍ରାନ୍ତ ଜିଲାର ବିଭିନ୍ନ ଡାକ୍ତରଖାନାରେ ଚିକିତ୍ସାଧୀନ ଅଛନ୍ତି।
କଲେରାକୁ ପ୍ରତିହତ କରିବା ପାଇଁ କାଶୀପୁର ବ୍ଲକର ସମସ୍ତ ପଞ୍ଚାୟତରେ ଲୋକଙ୍କୁ ସଚେତନ କରାଯାଉଛି। ଅନ୍ୟ ଲୋକମାନେ ଯେପରି ଆକ୍ରାନ୍ତ ନ ହେବେ ଏବଂ ଚକିିତ୍ସାଧୀନ ଆକ୍ରାନ୍ତ ଯେପରି ଗୁରୁତର ନ ହେବେ ସେଥିପ୍ରତି ଗୁରୁତ୍ୱ ଦିଆଯାଉଥିବା ଜିଲାପାଳ କହିଛନ୍ତି। ଲକ୍ଷଣ ଦେଖାଯିବା ମାତ୍ରେ ସେମାନଙ୍କ ଚିକିତ୍ସା କରାଯାଉଛି। ଜିଲା ପ୍ରଶାସନ ପକ୍ଷରୁ ଏଥିପାଇଁ ଏକ ହେଲ୍ପଲାଇନ ନମ୍ବର ୯୪୩୭୪୪୮୭୪୭ ଜାରି କରାଯାଇଛି। ଆଶା, ଅଙ୍ଗନଓ୍ବାଡି କର୍ମୀମାନେ ଗ୍ରାମାଞ୍ଚଳରେ ଲୋକଙ୍କୁ ସଚେତନ କରୁଛନ୍ତି। ନଦୀ ଏବଂ କୂଅର ଦୂଷିତ ପାଣି ବ୍ୟବହାର ନ କରିବାକୁ ପରାମର୍ଶ ଦିଆଯାଇଛି। ପାନୀୟ ଜଳର ସୁବିଧା ପାଇଁ ଟ୍ୟାଙ୍କର ଯୋଗେ ଜଳ ଯୋଗାଣ କରାଯାଉଛି। ଗ୍ରାମରେ ଥିବା ସମସ୍ତ ଜଳ ଉତ୍ସରୁ ଜଳର ନମୁନା ସଂଗ୍ରହ କରାଯାଇ ପରୀକ୍ଷା କରାଯାଉଛି। ଆଗାମୀ ୩ ଦିନରେ ରିପୋର୍ଟ ଆସିବ। ଯେଉଁ ଉତ୍ସର ପାଣି ପିଇବା ଯୋଗ୍ୟ ଜଣାପଡ଼ିବ, ପରେ ତାହାକୁ ବ୍ୟବହାର କରିବା ପାଇଁ ଗ୍ରାମବାସୀଙ୍କୁ ପରାମର୍ଶ ଦିଆଯିବ ବୋଲି ଜିଲାପାଳ ସିଂ କହିଛନ୍ତି। ଏହା ବ୍ୟତୀତ ଗ୍ରାମବାସୀଙ୍କୁ ପାଣି ଫୁଟାଇ ପିଇବାକୁ ସଚେତନ କରାଯାଉଛି। ବିଶେଷକରି ସର୍ବାଧିକ ଆକ୍ରାନ୍ତ ହୋଇଥିବା ଡୁଡୁକାବାହାଲ ଗ୍ରାମର ଲୋକେ ସୁଷମ ଖାଦ୍ୟ ଖାଇବା ସହ କିପରି ବିଶୁଦ୍ଧ ଜଳ ବ୍ୟବହାର କରିବେ ସେଥିପ୍ରତି ଦୃଷ୍ଟି ଦିଆଯାଉଥିବା କୁହାଯାଇଛି। ସେହିପରି ସିଡିଏମ୍ଓ ଲାଲମୋହନ ରାଉତରାୟ ସୂଚନା ଦେଇ କହିଛନ୍ତି, ଏକାଧିକ ସ୍ବାସ୍ଥ୍ୟ ଟିମ୍ ପଠାଯାଇଛି। ମଙ୍ଗଳବାର ଠାରୁ ଅସ୍ଥାୟୀ ଶିବିର କରି ଚିକିତ୍ସା କରାଯିବ ବୋଲି ରାଉତରାୟ କହିଛନ୍ତି।
