ନୂଆଦିଲ୍ଲୀ,୩।୧୦ : ଉପରାଷ୍ଟ୍ରପତି ରାଜ୍ୟସଭା ଅଧ୍ୟକ୍ଷ ଜଗଦୀପ ଧନକର ସୋମବାର ଦିଲ୍ଲୀରେ ତାଙ୍କ ସରକାରୀ ବାସଭବନରେ ସଂସଦର ସମସ୍ତ ପ୍ରମୁଖ ଦଳର ନେତାଙ୍କ ପାଇଁ ରାତ୍ରୀ ଭୋଜନର ଆୟୋଜନ କରିଛନ୍ତି। କାର୍ଯ୍ୟଭାର ଗ୍ରହଣ କରିବା ପରେ ଏହା ତାଙ୍କର ପ୍ରଥମ ଭୋଜି। କୁହାଯାଉଛି ଏହି ଅବସରରେ ବିରୋଧୀ ଦଳ ଗୃହର ବିଭିନ୍ନ କମିଟିର ପୁନର୍ଗଠନ ପ୍ରସଙ୍ଗ ଉଠାଇ ସେମାନଙ୍କୁ ଅଧ୍ୟକ୍ଷ ପଦ ଦେବା ଦାବି ଉଠାଇ ପାରନ୍ତି। ସରକାର କିଛି ପରିବର୍ତ୍ତନ କରିବାକୁ ଚାହୁଁଥିବାବେଳେ ବିରୋଧୀ ଦଳଙ୍କ ପାଇଁ ଦୀର୍ଘ ଦଶନ୍ଧି ଧରି ରହିଆସିଥିବା ଆନ୍ତରିକତାକୁ ବଜାୟ ରଖିବାକୁ ସେମାନେ ଅନୁରୋଧ କରିବେ ବୋଲି କୁହାଯାଉଛି।
ଉପରାଷ୍ଟ୍ରପତିଙ୍କ ସଚିବାଳୟରେ ଥିବା ସୂତ୍ରରୁ ପ୍ରକାଶ ଯେ ଭୋଜିରେ ଯୋଗଦେବାକୁ ସଂସଦର ସମସ୍ତ ଦଳର ନେତାମାନଙ୍କୁ ନିମନ୍ତ୍ରଣ କରାଯାଇଛି। ପୂର୍ବତନ ଉପରାଷ୍ଟ୍ରପତି ଭେଙ୍କୟା ନାଇଡୁ ପଦରୁ ଅବସର ନେବା ପରେ ଧନକର ରାଜ୍ୟସଭା ଅଧ୍ୟକ୍ଷ ପଦ ପାଇଛନ୍ତି।
ଏହି ଭୋଜି ପାଇଁ ରାଜ୍ୟସଭାର ସମସ୍ତ ଦଳର ନେତା, ଗୃହର ନେତା, କେନ୍ଦ୍ର ମନ୍ତ୍ରୀ ପୀୟୁଷ ଗୋୟଲ, ସଂସଦୀୟ ବ୍ୟାପାର ମନ୍ତ୍ରୀ ପ୍ରହଲଦ ଯୋଶୀ ଏବଂ ଗୃହର ସଦସ୍ୟଙ୍କ ବ୍ୟତୀତ କେତେକ ବରିଷ୍ଠ କେନ୍ଦ୍ର ମନ୍ତ୍ରୀ ମଧ୍ୟ ଆମନ୍ତ୍ରିତ ହୋଇଛନ୍ତି।
