ଖଡିଆଳ, ୮।୨(ଡି.ଏନ.ଏ.): ନୂଆପଡ଼ା ଜିଲା ଖଡିଆଳ ପୋଲିସ ଯୁବକଙ୍କୁ ଅପହରଣ ଘଟଣାର ରହସ୍ୟ ଉନ୍ମୋଚନ କରିଛି। ଅପହୃତ ଯୁବକଙ୍କୁ ଉଦ୍ଧାର କରାଯିବା ପରେ ୧୮୮୫ ମସିହାର ଭିକ୍ଟୋରିଆ ରୁପାଟଙ୍କା ପାଇଁ ଅପହରଣ କରାଯାଇଥିବା ପୋଲିସ ସ୍ପଷ୍ଟ କରିଛି।
ଘଟଣାରେ ୪ଜଣଙ୍କୁ ଗିରଫ କରାଯାଇଥିବା ସୋମବାର ଖଡିଆଳ ଏସ୍ଡିପିଓ ଅଫିସ ପରିସରରେ ଅନୁଷ୍ଠିତ ଖବରଦାତା ସମ୍ମିଳନୀରେ ନୂଆପଡା ଅତିରିକ୍ତ ଏସ୍ପି ସୁନୀଲ କୁମାର ଆଚାର୍ଯ୍ୟ ସୂଚନା ଦେଇଛନ୍ତି। ଗିରଫ ଅଭିଯୁକ୍ତମାନେ ହେଲେ ବଲାଙ୍ଗୀର ଜିଲା ଖପ୍ରାଖୋଲ ଥାନା କାପସିପଲ୍ଲୀ ଗାଁର ସାମନ୍ତ ଛତର (୩୪), ଯୁଗଳଚରଣ ଛତର (୪୨) ଓ ଡିଆପାଲି ଗାଁର ଭୁଲା କଟା (୩୭) ଏବଂ ନୂଆପଡ଼ା ଜିଲା ଖଡିଆଳ ଥାନା ଡୁଆଝର ଗାଁର ତିତିକ ବାଗ (୨୩)। ଏଥିସହ ଅପହରଣରେ ବ୍ୟବହୃତ ଏକ କାର୍ (ନଂ.ଓଡି୦୩ଜେ-୬୦୭୪) ସହ ୧୮୮୫ର ଭିକ୍ଟୋରିଆ ରୁପାଟଙ୍କା ଜବତ କରାଯାଇଛି। ମୁଖ୍ୟ ଅଭିଯୁକ୍ତ କୁହାଯାଉଥିବା ବଲାଙ୍ଗୀର ଜିଲାର ରାଜେଶ ସୁନା ଏବଂ ନୂଆପଡା ଜିଲା ଖଡିଆଳ ସହର ଛେଳିଆପଡାର ଓମ୍ ତାଣ୍ଡି ଫେରାର ଥିବା ଅତିରିକ୍ତ ଏସ୍ପି ଆଚାର୍ଯ୍ୟ ସୂଚନା ଦେଇଛନ୍ତି।
ପୋଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ କଳାହାଣ୍ଡି ଜିଲା ଜୁନାଗଡ ଥାନା ଖୁରସାଲିପଡା ଗାଁର ସୋମନାଥ ନିଆଲ ଏବଂ ତାଙ୍କ ସାଙ୍ଗ ଅଶ୍ୱିନୀ ବେମାଲ ଭିକ୍ଟୋରିଆ ରୁପାଟଙ୍କାକୁ ୧ ଲକ୍ଷ ଟଙ୍କାରେ ବିକ୍ରି କରିବା ପାଇଁ ରାଜେଶଙ୍କ ସହ ଡିଲ୍ କରିଥିଲେ। ଡିଲ୍ର ମଧ୍ୟସ୍ଥତା କରିଥିଲେ ଓମ୍ ତାଣ୍ଡି। ଗତ ୪ ତାରିଖରେ ଫାଇନାଲ ଡିଲ୍ ପାଇଁ ସହମତି ହେବା ପରେ ରାଜେଶ ତାଙ୍କର ୩ ସାଥୀ ଭୁଲା, ସାମନ୍ତ ଏବଂ ଯୁଗଳଚରଣ ଏକ କାର୍ରେ ଖଡିଆଳ ଆସିଥିଲେ। ସେଠାରେ ଏକ ହୋଟେଲରେ ସୋମନାଥ ଓ ଅଶ୍ୱିନୀଙ୍କ ସହ ଖାଇବା ପରେ ଓମ୍ଙ୍କ ଗେଷ୍ଟ ହାଉସରେ ଡିଲ୍ ହେଉଥିଲା। ଏହି ସମୟରେ ଅଶ୍ୱିନୀଙ୍କ ହାତରୁ ରୁପାଟଙ୍କା ଝାମ୍ପି ନେଇ ତିତିକ ଫେରାର ହୋଇଥିଲେ। ଅଶ୍ୱିନୀଙ୍କୁ ରାଜେଶଙ୍କ ୩ ସାଥୀ ଭୁଲା, ସାମନ୍ତ ଏବଂ ଯୁଗଳ ଜୀବନରେ ମାରି ଦେବାକୁ ଧମକ ଦେବା ସହ ଅପହରଣ କରି କଣ୍ଟାବାଞ୍ଜି ଆଡକୁ ନେଇଯାଇଥିଲେ। ଏ ନେଇ ଖଡିଆଳ ଥାନାରେ ସୋମନାଥ ଅଭିଯୋଗ ପରେ ପୋଲିସ ଘଟଣାର ତଦନ୍ତ ଆରମ୍ଭ କରିଥିଲା। ଖବରଦାତା ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ଖଡିଆଳ ଏସ୍ଡିପିଓ ସନ୍ତକ ଜେନା ଏବଂ ଆଇଆଇସି ଅନିରୁଦ୍ଦ ମୁଦୁଲି ଉପସ୍ଥିତ ଥିଲେ।