ନାଗପୁର,୧୯।୧୧(ପି.ଟି.): କୋଭିଡ୍-୧୯ କାରଣରୁ ପାଖାପାଖି ୮ ମାସର ବ୍ରେକ୍ ପରେ ବିଦର୍ଭ ରଣଜୀ ଟ୍ରଫି ସମ୍ଭାବ୍ୟ ଖେଳାଳିମାନେ ଚଳିତ ସପ୍ତାହରେ ଟ୍ରେନିଂ ଆରମ୍ଭ କରିବାକୁ ଯାଉଛନ୍ତି। ଜାନୁୟାରୀରେ ସୟଦ ମୁସ୍ତାକ ଅଲି ଟ୍ରଫି (ଜାତୀୟ ଟି୨୦ ଚାମ୍ପିୟନଶିପ୍) ସହ ଭାରତର ଘରୋଇ ସେସନ ଆରମ୍ଭ ହେବାର ସମ୍ଭାବନା ରହିଛି। ଦୁଇଥର ରଣଜୀ ଚାମ୍ପିୟନ ରହିଥିବା ଓ ଇରାନୀ କପ୍ ଚାମ୍ପିୟନଶିପ ହାସଲ କରିଥିବା ଏହି ଦଳ ଯଥାଶୀଘ୍ର ଟ୍ରେନିଂ ଆରମ୍ଭ କରିବା ଲକ୍ଷ୍ୟରେ ରହିଛନ୍ତି। ଆରଟି- ପିସିଆର୍ ଟେଷ୍ଟ ପରେ ଗୁରୁବାର କିମ୍ବା ଶୁକ୍ରବାରଠାରୁ ଟ୍ରେନିଂ ଆରମ୍ଭ ହେବ ବୋଲି ବିଦର୍ଭ କ୍ରିକେଟ ଆସୋସିଏଶନ (ଭିସିଏ) ଅଧ୍ୟକ୍ଷ ଆନନ୍ଦ ଜୟସ୍ବାଲ କହିଛନ୍ତି। ତେଣୁ ବିଭାଗୀୟ କର୍ତ୍ତୃପକ୍ଷଙ୍କଠାରୁ ଆବଶ୍ୟକ ଅନୁମତି ନିଆଯାଇଛି ବୋଲି ସେ କହିଛନ୍ତି। ଇନ୍ଡୋର ଏକାଡେମୀରେ ନେଟ୍ସ ଓ ଛୋଟ ଛୋଟ ବ୍ୟାଚ୍ରେ ଫିଲ୍ଡିଂ ସେସନର ଆୟୋଜନ ହେବ ବୋଲି ସେ କହିଛନ୍ତି। ଉଲ୍ଲେଖଥାଉ କି, ଫୈଜ ଫଜଲଙ୍କ ନେତୃତ୍ୱରେ ବିଦର୍ଭ ରଣଜୀ ଟ୍ରଫି ଜିତିବା ସହ ଇରାନୀ ଟ୍ରଫି ମଧ୍ୟ ହାସଲ କରିଥିଲା। ଟ୍ରେନିଂ ନେଇ ବିସିସିଆଇ ମଧ୍ୟ ସବୁ ରାଜ୍ୟ ଆସୋସିଏଶନଗୁଡିକ ପାଇଁ ଏସ୍ଓପି ଜାରି କରିଛି।
