ନୂଆଦିଲ୍ଲୀ,୭।୧୦: ଆସନ୍ତା ଟି-୨୦ ବିଶ୍ୱକପ ପାଇଁ ଉଇକେଟ କିପର ବ୍ୟାଟ୍ସମ୍ୟାନ ଦୀନେଶ କାର୍ତ୍ତିକ ଭାରତୀୟ ଦଳର ଅଂଶ ହୋଇଛନ୍ତି। ଏହି ବିଶ୍ୱସ୍ତରୀୟ ଟୁର୍ନାମେଣ୍ଟ ପାଇଁ ରୋହିତ ଶର୍ମାଙ୍କ ଅଧିନାୟକତ୍ୱରେ ଭାରତୀୟ ଦଳ ଅଷ୍ଟ୍ରେଲିଆରେ ପହଞ୍ଚିଛି। ଖେଳାଳିମାନେ ଟୁର୍ନାମେଣ୍ଟ ପୂର୍ବରୁ ପର୍ଥରେ ଟ୍ରେନିଂ କ୍ୟାମ୍ପ୍ରେ ଯୋଗ ଦେବେ। ଏହା ପରେ କିଛି ଅଭ୍ୟାସ ମ୍ୟାଚ ମଧ୍ୟ ଖେଳାଯିବ। ଏହି ସମୟରେ ସୋସିଆଲ ମିଡିଆରେ ରୋହିତ ଶର୍ମା ଏବଂ ଦୀନେଶ କାର୍ତ୍ତିକଙ୍କ ଏକ ଭିଡିଓ ଭାଇରାଲ ହୋଇଛି। ତେବେ ଏହି ଭିଡିଓ ଇନ୍ଦୋରରେ ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଖେଳାଯାଇଥିବା ସିରିଜର ତୃତୀୟ ତଥା ଅନ୍ତିମ ଟି -୨୦ ମ୍ୟାଚରୁ ଆସିଛି।
ସିରିଜର ତୃତୀୟ ତଥା ଅନ୍ତିମ ଟି-୨୦ ମ୍ୟାଚ ଇନ୍ଦୋରର ହୋଲକର ଷ୍ଟାଡିୟମରେ ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଖେଳାଯାଇଥିଲା। ଏହି ପରାଜୟ ପରେ ଭାରତର ଡଗଆଉଟର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଭାରତର ପରାଜୟ ପରେ ଡଗଆଉଟରେ ଉପସ୍ଥିତ ଥିବା ଦୀନେଶ କାର୍ତ୍ତିକ କରତାଳି ଦେବା ଆରମ୍ଭ କରିଥିଲେ। ଅଧିନାୟକ ରୋହିତ ଶର୍ମା ଏହା ଦେଖି ଦୀନେଶ କାର୍ତ୍ତିକଙ୍କୁ ପଛପଟୁ ଠେଲି ଦେଇଥିଲେ। ଅବଶ୍ୟ ସେ ମଜାରେ ଏପରି କରିଦେଇଥିଲେ। ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି।