ଆଜିକାଲି କେବଳ ଛୋଟପିଲା ନୁହନ୍ତି ଯୁବପିଢ଼ି ଭିଡିଓ ଗେମ୍ ଖେଳୁଛନ୍ତି। କେତେକେ ଏହାକୁ ଏକ ଅଭ୍ୟାସରେ ପରିଣତ କରିସାରିଛନ୍ତି। ଭିଡିଓଗେମ୍ ଖେଳିବାରୁ ମୁକୁଳିବା ପ୍ରାୟ କଷ୍ଟକର। ତେବେ ଏହାଦ୍ୱାରା ସେମାନଙ୍କର ବ୍ୟବହାର ପ୍ରଭାବିତ ହେବାର ଯଥେଷ୍ଟ ଆଶଙ୍କା ରହିଛି ବୋଲି କାଲିଫର୍ନିଆ ବିଶ୍ୱବିଦ୍ୟାଳୟର ବିଶେଷଜ୍ଞମାନେ ପ୍ରକାଶ କରିଛନ୍ତି। ପ୍ରାୟ ନିୟମିତ ଅଧିକ ସମୟ ଭିଡିଓଗେମ୍ ଖେଳୁଥିବା କିଛି ପିଲାଙ୍କର ଜୀବନଶୈଳୀକୁ ସର୍ଭେ ସମୟରେ ତର୍ଜମା କରାଯାଇଥିଲା। ଏହି ସମୟରେ ସେମାନଙ୍କର କଥାବାର୍ତ୍ତା ଶୈଳୀ, ବ୍ୟବହାର କିପରି ରହୁଛି ତାହାକୁ ତନ୍ନ ତନ୍ନ କରି ନିରୀକ୍ଷଣ କରିଥିଲେ ଉକ୍ତ ବିଶ୍ୱବିଦ୍ୟାଳୟର ବିଶେଷଜ୍ଞମାନେ। ସର୍ଭେ ପରିସରଭୁକ୍ତ ପିଲାମାନଙ୍କ ମଧ୍ୟରୁ ଅଧିକାଂଶ ପିଲାଙ୍କର ବ୍ୟବହାରରେ ପରିବର୍ତ୍ତନ ସେମାନେ ଦେଖିବାକୁ ପାଇଥିଲେ। ଏହାପଛରେ ଆବଶ୍ୟକତାଠାରୁ ଅଧିକ ସମୟ ଭିଡିଓଗେମ ଖେଳିବା ଦାୟୀ ବୋଲି ଏହି ବିଶ୍ୱବିଦ୍ୟାଳୟର ବିଶେଷଜ୍ଞମାନେ ମତ ଦେଇଛନ୍ତି।