ଲାଞ୍ଜିଗଡ,୫।୨(ରମେଶ ଚନ୍ଦ୍ର ନାୟକ): କଳାହାଣ୍ଡି ଜିଲା ଲାଞ୍ଜିଗଡ଼ ବ୍ଲକ ବାତେଲିମା ପଞ୍ଚାୟତସ୍ଥିତ ବାଣୀପଙ୍ଗା ସରକାରୀ ଏସ୍ଏସ୍ଡି ଆବାସିକ ବାଳିକା ଉଚ୍ଚ ବିଦ୍ୟାଳୟରେ ଶିକ୍ଷକ ଛାତ୍ରୀମାନଙ୍କୁ ଚଲାଇ ଥାନାକୁ ଆଣିବା ଅଭିଯୋଗରେ ଶନିବାର ଛାତ୍ରୀଙ୍କ ଅଭିଭାବକ ସ୍କୁଲ ସାମ୍ନାରେ ଧାରଣା ଦେଇଥିବା ଘଟଣାରେ ଶିକ୍ଷକଙ୍କୁ ଅନ୍ୟ ସ୍କୁଲ୍କୁ ବଦଳି କରିଛନ୍ତି ଜିଲାପାଳ।
ସୂଚନାନୁସାରେ ବିଦ୍ୟାଳୟରେ ଗତ ଗୁରୁବାର ଖେଳ ଶିକ୍ଷକ ବିଳମ୍ବରେ ଆସିବା ଓ ବିଦ୍ୟାଳୟ ଭିତରେ ସରପଞ୍ଚ ଭିଡିଓ ବନାଇବା ନେଇ ସ୍କୁଲର ଖେଳ ଶିକ୍ଷକ ଓ ସରପଞ୍ଚଙ୍କ ମଧ୍ୟରେ ଛକାପଞ୍ଝା ଦେଖିବାକୁ ମିଳିଥିଲା। ଏହାକୁ ନେଇ ବିଭିନ୍ନ ଗଣମାଧ୍ୟମରେ ଖବର ପ୍ରସାରଣ ପରେ ଶୁକ୍ରବାର ଶିକ୍ଷକ ଜଣକ ସ୍କୁଲର ଛାତ୍ରୀମାନଙ୍କୁ ଦୀର୍ଘ ୧୦ କିଲୋମିଟର ଚଲାଇ ସରପଞ୍ଚଙ୍କ ନାମରେ ଏତଲା ଦେବା ପାଇଁ ଯାଇଥିଲେ।
ଏହି ସମୟର ଭିଡିଓ ଭାଇରାଲ୍ ହେବା ପରେ ଅଭିଭାବକ ମହଲରେ ଆଲୋଚନାର ବିଷୟ ହୋଇଥିଲା। ଭିଡିଓ ଭାଇରାଲ୍ ଖବର ପାଇ ବ୍ଲକ ମଙ୍ଗଳ ସମ୍ପ୍ରସାରଣ ଅଧିକାରୀ ପଙ୍କଜ ବଳିଆର ସିଂ ବାଣୀପଙ୍ଗା ବାଳିକା ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷକଙ୍କୁ ଅବଗତ କରାଇଥିଲେ। ପରେ ପ୍ରଧାନ ଶିକ୍ଷକ କହିବା ପରେ ସମ୍ପୃକ୍ତ ଶିକ୍ଷକ ଛାତ୍ରୀମାନଙ୍କୁ ସ୍କୁଲକୁ ଫେରାଇ ଆଣିଥିଲେ। ହେଲେ ଛାତ୍ରୀମାନଙ୍କୁ ମାନଙ୍କୁ ଚଳାଇ ନେବା ନେଇ ଶନିବାର ଅଭିଭାବକ ମାନେ ବିଦ୍ୟାଳୟ ମୁଖ୍ୟ ଫାଟକ ଆଗରେ ଧାରଣାରେ ବସିଥିଲେ।
ଖବର ପାଇ ଜିଲା ମଙ୍ଗଳ ଅଧୂକାରୀ ଅନ୍ତର୍ଯାମୀ କହଁର, ଅତିରିକ୍ତ ଜିଲା ମଙ୍ଗଳ ଅଧିକାରୀ କଳକୀ ବଲ୍ଲଭ ସାମନ୍ତରାୟ, ଲାଞ୍ଜିଗଡ ବିଡିଓ ଶଶାଙ୍କ ପାତ୍ର, ଲାଞ୍ଜିଗଡ ପଞ୍ଚାୟତ ସମିତି ଅଧ୍ଯକ୍ଷା କମଳା ପାତ୍ର, ବ୍ଲକ ମଙ୍ଗଳ ସମ୍ପ୍ରସାରଣ ଅଧିକାରୀ ପଙ୍କଜ ବଳିଆର ସିଂ ପ୍ରମୁଖ ଘଟଣା ସ୍ଥଳରେ ପହଞ୍ଚି ତଦନ୍ତ କରିବା ସହିତ ଅଭିଭାବକ ଓ ପରିଚାଳନା କମିଟି ସଦସ୍ୟ ଓ ସରପଞ୍ଚଙ୍କ ସହ ଆଲୋଚନା କରିଥିଲେ।
ଏ ବିଷୟରେ ଜିଲା ମଙ୍ଗଳ ଅଧିକାରୀ କହଁରଙ୍କୁ ପଚାରିବାରୁ ସେ କହିଥିଲେ, ମୁଁ ଘଟଣାସ୍ଥଳକୁ ଯାଇ ସ୍ଥିତି ଅନୁଧ୍ୟାନ କରିଥିଲି। ଜିଲାପାଳଙ୍କୁ ଏହାର ରିପୋର୍ଟ ଦିଆଯିବ ଏବଂ କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି ପ୍ରକାଶ କରିଥିଲେ। ଏହାସହ ଅଭିଭାବକଙ୍କୁ ବୁଝାଶୁଝା କରିବା ପରେ ଧାରଣାରୁ ଉଠିଥିବା ପ୍ରକାଶ କରିଥିଲେ। ଏହାର ତଦନ୍ତ କରି କଳାହାଣ୍ଡି ଜିଲାପାଳ ପତ୍ର ସଂଖ୍ୟା ୩୪୧ ତାରିଖ ୪/୨ /୨୦୨୫ ଅନୁଯାୟୀ ଶିକ୍ଷକଙ୍କୁ କଳାହାଣ୍ଡି ଜିଲା ମଦନପୁର ରାମପୁର ବ୍ଲକର ଲୁବେନଗଡ ସରକାରୀ ଏସ୍ଏସ୍ଡି ଉଚ୍ଚ ବିଦ୍ୟାଳୟକୁ ବଦଳି କରିଥିବା ଜିଲା ମଙ୍ଗଳ ଅଧୂକାରୀ ଅନ୍ତର୍ଯ୍ୟାମୀ କହଁରଙ୍କ ଠାରୁ ସୂଚନା ମିଳିଛି।
