ବାରଙ୍ଗ,୨୩।୯(ଡି.ଏନ୍.ଏ.): ଭୁବନେଶ୍ୱର ବ୍ଲକ ଦାଢ଼ା ପଞ୍ଚାୟତ ଅଧୀନ ବଡ଼ବାଲିପଡ଼ା ଗ୍ରାମର ଗୋଟିଏ ପରିବାର କରୋନା ଆକ୍ରାନ୍ତ ହେବା ପରେ ପ୍ରଶାସନର ସହଯୋଗ ମିଳୁ ନ ଥିବା ନେଇ ଅଭିଯୋଗ ହୋଇଛି। ଏ ନେଇ ପରିବାରର କିଶୋର ରାଉତ କରିଥିବା ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଗତ ୧୪ତାରିଖରେ ତାଙ୍କ ପରିବାରର ୩ଜଣ ମହିଳା ସ୍ଥାନୀୟ ଅଞ୍ଚଳରେ କୋଭିଡ୍ ପରୀକ୍ଷା କରିବାରୁ ନେଗେଟିଭ ଆସିଥିଲା। ହେଲେ ୧୬ତାରିଖରେ ଅଙ୍ଗନଓ୍ବାଡ଼ି କର୍ମୀ ଆସି ସେମାନଙ୍କ ରିପୋର୍ଟ ପଜିଟିଭ ଥିବା କହିଥିଲେ। ପରେ ପ୍ରଶାସନର ନିର୍ଦ୍ଦେଶକ୍ରମେ ସରପଞ୍ଚ ଉକ୍ତ ଅଞ୍ଚଳକୁ କଣ୍ଟେନମେଣ୍ଟ ଜୋନ ଘୋଷଣା କରି ବାଉଁଶ ବାଡ଼ ଦେଇ ବନ୍ଦ କରିଛନ୍ତି। ଏହି ପରିବାର ଏପର୍ଯ୍ୟନ୍ତ ହୋମ କ୍ୱାରାଣ୍ଟାଇନରେ ଥିବାବେଳେ ଜରୁରୀ ସାମଗ୍ରୀ ପାଇ ପାରୁନାହାନ୍ତି। ଏ ନେଇ ସରପଞ୍ଚଙ୍କୁ ଫୋନ କଲେ ଦେହ ଖରାପ ଥିବା କହି ପ୍ରତିନିଧି ଅରୁଣ ସେନାପତିଙ୍କ ସହ କଥା ହେବାକୁ କହୁଛନ୍ତି। ଅନ୍ୟପଟେ କୌଣସି ଅଧିକାରୀ ଆକ୍ରାନ୍ତଙ୍କ ସାମାନ୍ୟ କଥା ବୁଝୁ ନ ଥିବାରୁ ଆତ୍ମହତ୍ୟା କରିବାକୁ ନିଷ୍ପତ୍ତି ନେଇଥିବା ସେ ଅଭିଯୋଗ କରିଛନ୍ତି। ଏ ସର୍ମ୍ପକରେ ସରପଞ୍ଚ ପ୍ରତିନିଧି ସେନାପତି କହିଛନ୍ତି, ୩ ମହିଳାଙ୍କ ପ୍ରଥମେ ନେଗେଟିଭ ଓ ୨ଦିନ ପରେ ପଜିଟିଭ ଆସିଥିବା ବ୍ଲକ ପକ୍ଷରୁ ଆମକୁ ଜଣାପଡ଼ିଥିଲା। ତେବେ ହୋମ କ୍ୱାରାଣ୍ଟାଇନରେ ରହୁଥିବା ପରିବାରକୁ ରାଶନ ଯୋଗାଇଦେବା କୌଣସି ନିୟମ ନାହିଁି।
