ପାଟଣା,୧୩।୪(ବୀର କିଶୋର ଦାଶ): କେନ୍ଦୁଝର ଜିଲାର ଉଭୟ ପାଟଣା ଅବକାରୀ ପୋଲିସ ନିଷ୍କ୍ରିୟତା ଯୋଗୁ ଗାଁଗାଁରେ ଚୋରା ମଦ କାରବାର ବୃଦ୍ଧି ପାଉଥିବା ବେଳେ ଜଣେ ମହିଳା ଜନ ପ୍ରତିନିଧି ନିଜ ଦୋକାନରେ ଚୋରା ବିଦେଶୀ ମଦକୁ ଚଢା ରେଟରେ ବିକ୍ରି କରୁଥିବା ଭିଡିଓ ଭାଇରାଲ ହୋଇଛି। ଭିଡିଓରେ ଚୋରା ମଦ ବିକ୍ରି କରୁଥିବା ମହିଳା ଜଣଙ୍କ ହେଲେ ପାଟଣା ବ୍ଲକ ଏରେଣ୍ଡେଇ ପଞ୍ଚାୟତ ୭ ନମ୍ବର ୱାର୍ଡର ୱାର୍ଡ ମେମ୍ବର ବିଦ୍ୟୁତ ପ୍ରଭା ବେଜ। ସେ ଏରେଣ୍ଡେଇ ସିଂହ ସାହିର ଘରେ ଥିବା ଭେରାଇଟି ଷ୍ଟୋରରେ ବିଦେଶୀ ମଦ ବିକ୍ରି କରୁଥିବା ଭଡିଓରେ ଦେଖିବାକୁ ମିଳୁଛି। ଭଡ଼ିଓ ଭାଇରାଲ ପରେ ଘଟଣାକୁ ନେଇ ପାଟଣା ବ୍ଲକ ଅଞ୍ଚଳରେ ବେଶ ଚର୍ଚ୍ଚା ହୋଇଛି। ଜଣେ ମହିଳା ୱାର୍ଡ ମେମ୍ବର ଚୋରା ମଦ କାରବାରରେ ଲିପ୍ତ ରହିଲେ ଲୋକଙ୍କ ସମସ୍ୟା କିପରି ଦୂର ହେବ ସେ ନେଇ ଆଲୋଚନା ହେଉଛି । ଏନେଇ ମହିଳା ୱାର୍ଡ ମେମ୍ବରଙ୍କ ପ୍ରତିକ୍ରିୟା ମିଳି ପାରି ନାହିଁ । ପାଟଣା ଅବକାରୀ ପୋଲିସ ଚୋରା ମଦ ବିକ୍ରି କରୁଥିବା ବ୍ୟବସାୟୀଙ୍କ ଠାରୁ ମାସିକିଆ ଚାନ୍ଦା ନେଇ କୌଣସି କାର୍ଯ୍ୟାନୁଷ୍ଠାନ ନେଉ ନ ଥିବା ଅଞ୍ଚଳରେ ଚର୍ଚ୍ଚା ହେଉଛି।
