ଇସ୍ତାନବୁଲ୍, ୧୧ା୧୧ (ଏପି)- ଆସନ୍ତାବର୍ଷ ୨୦୨୧ରେ ରେକର୍ଡ ୨୩ଟି ରେସ୍ ଆୟୋଜନ ଲାଗି ଫର୍ମୁଲା ଓ୍ବାନ୍ ଯୋଜନା ରଖିଛି। ଏପ୍ରିଲ୍ରେ ଭିଏତ୍ନାମରେ ଏହାର ଉଦ୍ଘାଟନୀ ରେସ୍ ବାଦ୍ ଦେବା ସହ କ୍ୟାଲେଣ୍ଡରରେ ସାଉଦି ଆରବକୁ ସାମିଲ କରିଛି। ଚଳିତବର୍ଷ ପ୍ରଥମଥର ପାଇଁ ଭିଏତନାମ ଫର୍ମୁଲା ଓ୍ବାନ୍ ରେସ୍ ଆୟୋଜନ କରାଯାଇଥାନ୍ତା। ମାତ୍ର କରୋନା ଭାଇରସ ଯୋଗୁ ଏହାକୁ ବାତିଲ କରାଯାଇଥିଲା। ପ୍ରଥମ ଥର ସାଉଦି ଆରବ ଗ୍ରାଁ ପ୍ରି ହେବ। ଏହା ଲୋହିତ ସାଗର ସହର ଜିଦାହଠାରେ ହେବ। କରୋନାବେଳେ ବାତିଲ ହୋଇଥିବା ବହୁ ରେସ୍ କିନ୍ତୁ ଏଥର ଆୟୋଜନ ହେବ। କରୋନା ଯୋଗୁ ଚଳିତବର୍ଷ ମୁଗେଲୋ, ପୋର୍ଟିମାଓ ଏବଂ ଇମୋଲା ଭଳି ୟୁରୋପର କେତୋଟି ଟ୍ରାକ୍ରେ ରେସ୍ର ଆୟୋଜନ କରାଯାଇଥିଲା। ଆସନ୍ତାବର୍ଷ ଏହି ସ୍ଥାନଗୁଡ଼ିକରେ ରେସ୍ ଅନୁଷ୍ଠିତ ହେବ ନାହିଁ। ବ୍ରାଜିଲିଆନ ଗ୍ରାଁ ପ୍ରି ସାଓପାଓଲୋରେ ହେବ। ୧୯୮୫ ପରେ ପ୍ରଥମଥର ଡଚ୍ ଗ୍ରାଁ ପ୍ରି ପ୍ରତ୍ୟାବର୍ତ୍ତନ କରିବାକୁ ଯାଉଛି। ଚଳିତବର୍ଷ ଯଦିଓ ଏହାକୁ ବାତିଲ କରାଯାଇଥିଲା। ଆସନ୍ତାବର୍ଷ ଏଥିପାଇଁ ସେପ୍ଟେମ୍ବର ୫ ଦିନ ଧାର୍ଯ୍ୟ କରାଯାଇଛି। ସିଜନର ଶେଷ ରେସ୍ ଡିସେମ୍ବର ୫ରେ ଆବୁଧାବିଠାରେ ହେବ। ଫର୍ମୁଲା ଓ୍ବାନ୍ ଇତିହାସରେ ୨୩ ରେସ୍ ବିଶିଷ୍ଟ କ୍ୟାଲେଣ୍ଡର ହେଉଛି ସର୍ବ ବୃହତ୍। ୨୦୨୦ରେ ୨୨ଟି ରେସର୍ ଆୟୋଜନ ଯୋଜନା ଥିଲା।