ଭୁବନେଶ୍ୱର,୮।୧୨ (ବ୍ୟୁରୋ):ମନୋରଞ୍ଜନର ଅନ୍ୟତମ ମାଧ୍ୟମ ହେଉଛି ସିନେମା। ଟେଲିଭିଜନ ମାଧ୍ୟମରେ ଯେତେ ଚଳଚ୍ଚିତ୍ର ଦେଖିଲେ ବି ହଲ୍ରେ ବସି ଦେଖିବାର ମଜା ନିଆରା। ତେବେ କରୋନା ମହାମାରୀ ଯୋଗୁ ସିନେମା ଶିଳ୍ପ ପ୍ରଭାବିତ ହୋଇଛି। ଅର୍ଥାଭାବ ଯୋଗୁ ଅନେକ ସିନେମା ହଲ୍ ବନ୍ଦ ହୋଇଗଲାଣି। ତେଣୁ ବଡ଼ପରଦାରେ ସିନେମା ଦେଖିବା ଏବେ ଏକପ୍ରକାର ସ୍ବପ୍ନ ପାଲଟିଲାଣି। ଆଗଭଳି ଆଉ ଦର୍ଶକ ଆସୁ ନ ଥିବାରୁ ହଲ୍ଗୁଡିକ କ୍ଷତିରେ ଚାଲିଛି। କୋଭିଡ୍ ସ୍ଥିତିରେ ସାମାନ୍ୟ ସୁଧାର ଆସିବା ପରେ ରାଜ୍ୟ ସରକାର ପ୍ରଥମେ ୫୦ପ୍ରତିଶତ ଦର୍ଶକଙ୍କୁ ନେଇ ହଲ୍ ଖୋଲିବାକୁ ଅନୁମତି ଦେଇଥିଲେ। ଏହାର କିଛିଦିନ ପରେ ପୂର୍ଣ୍ଣ ମାତ୍ରାରେ ଦର୍ଶକ ହଲ୍କୁ ଯାଇ ପାରିବେ ବୋଲି ନିର୍ଦ୍ଦେଶ ଦିଆଯାଇଥିଲା। ଏଥିରେ ହଲ୍ ମାଲିକଙ୍କଠାରୁ ଆରମ୍ଭ କରି ଏଥି ସହିତ ଜଡିତ ଥିବା କର୍ମଚାରୀ ଏବଂ ଦର୍ଶକ ସମସ୍ତେ ଖୁସି ହୋଇଥିଲେ। ଧିରେ ଧିରେ ପୂର୍ବ ସ୍ଥିତି ଫେରି ଆସିବ ବୋଲି ମାଲିକମାନେ ଆଶା ବାନ୍ଧିଥିଲେ। ମାତ୍ର ପୁଣି କରୋନା ସେମାନଙ୍କ ଖୁସିରେ ଗ୍ରହଣ ସାଜିଲା। ସଂକ୍ରମଣ ଆଶଙ୍କାରେ ରାଜ୍ୟ ସରକାର ପୁନର୍ବାର ୫୦ ପ୍ରତିଶତ ଦର୍ଶକରେ ହଲ୍ ଖୋଲିବାକୁ ନିର୍ଦ୍ଦେଶ ଦେଇଛନ୍ତି। ଅପରପକ୍ଷେ କରୋନା ପରେ ଦର୍ଶକଙ୍କ ସଂଖ୍ୟାରେ ଦ୍ରୁତ ହ୍ରାସ ପାଇଛି। ମହାମାରୀ ସମୟରେ ଅଧିକାଂଶ ପ୍ରଯୋଜକ ଓଟିଟି ପ୍ଲାଟଫର୍ମରେ ଫିଲ୍ମ ରିଲିଜ୍ କଲେ। ଯାହାକି ଦର୍ଶକ ବିଶେଷକରି ଯୁବପିଢ଼ିଙ୍କ ଦ୍ୱାରା ଆଦୃତ ହେଲା। ସେହିପରି ଅନେକ ଓଡ଼ିଆ ଫିଲ୍ମ ମଧ୍ୟ ଟେଲିଭିଜନ୍ ଜରିଆରେ ରିଲିଜ୍ କରାଗଲା। ଘରେ ବସି ମାଗଣାରେ ନୂଆ ଫିଲ୍ମର ମଜା ନେବା ପରେ ଲୋକେ ହଲ୍ଠାରୁ ମୁହଁ ଫେରାଇବାରେ ଲାଗିଛନ୍ତି। ଫଳରେ ହଲ୍ ଚଳାଇବା ପାଇଁ ଆବଶ୍ୟକୀୟ ଅର୍ଥ ମିଳିବା କଷ୍ଟସାଧ୍ୟ ହୋଇପଡୁଛି। ଏପରି ଚାଲିଲେ ଆଉ କିଛିଦିନ ମଧ୍ୟରେ ହଲ୍ ଶିଳ୍ପ ବୁଡ଼ିଯିବା ଆଶଙ୍କା କରାଯାଉଛି।