ପଟ୍ଟାଙ୍ଗି,୨୦।୧୨(ଡି.ଏନ.ଏ.): କୋରାପୁଟ ଜିଲା ପଟ୍ଟାଙ୍ଗି ବ୍ଲକ ଅନ୍ତର୍ଗତ ଅମ୍ପାବାଲି ପଞ୍ଚାୟତ ସ୍ଥିତ ଇଡିକଲ କମ୍ପାନୀର କାର୍ଯ୍ୟରତ ଡେପୁଟି ମ୍ୟାନେଜର ଗୟା ସାନ୍ତରାଙ୍କ ବିରୋଧରେ ଆୟ ବହୁର୍ଭୂତ ସମ୍ପତ୍ତି ଠୁଳ ଅଭିଯୋଗକୁ ନେଇ ଚଢାଉ ଜାରି ରହିଛି। କଟକରୁ ଆସିଥିବା ଦୁଇଟି ଭିଜିଲାନ୍ସ ଦଳ ଚଢ଼ାଉ କରି ବିଭିନ୍ନ କାଗଜପତ୍ର ଜବତ କରିଥିବା ଜଣାପଡିଛି।
ସୂଚନାଯୋଗ୍ୟ, କଟକରୁ ଭିଜିଲାନ୍ସ ବିଭାଗର ଦୁଇ ଡିଏସ୍ପି ପ୍ରଦ୍ୟୁମ୍ନ ଦିବେଦୀ ଏବଂ ଡିଏସ୍ପି ଶକୁନ୍ତଳା ଦେବୀଙ୍କ ସମେତ ୭ ଜଣ ଓ ୪ ଜଣ ସାକ୍ଷୀଙ୍କୁ ନେଇ ପଟ୍ଟାଙ୍ଗି ବ୍ଲକର ସୁଙ୍କି ପଞ୍ଚାୟତ ସ୍ଥିତ ତଥା ହାଇସ୍କୁଲ ନିକଟସ୍ଥ ଇଡିକଲ କମ୍ପାନୀର ଡେପୁଟି ମ୍ୟାନେଜରଙ୍କ ଉପସ୍ଥିତିରେ ତାଙ୍କ ବାସଗୃହ ସହ କାର୍ଯ୍ୟାଳୟରେ ଚଢାଉ କରାଯାଇଛି। ଏଥିରେ କିଛି ଗୁରୁତ୍ୱପୂର୍ଣ୍ଣ କାଗଜପତ୍ର ଜବତ କରି ତଦନ୍ତ ଆରମ୍ଭ କରିଛି ଭିଜିଲାନ୍ସ। ଅନ୍ୟପକ୍ଷରେ ଉକ୍ତ ଅଞ୍ଚଳରେ ଏହି ପରି ଏକ କମ୍ପାନୀର ଡେପୁଟି ମ୍ୟାନେଜରଙ୍କ ବାସଗୃହ ତଥା କାର୍ଯ୍ୟାଳୟ ସମେତ ବିଭିନ୍ନ ସ୍ଥାନ ଯଥା ମୁନିଗୁଡା, ରାୟଗଡ଼ା ସହ ଭୁବନେଶ୍ୱରର ତିନୋଟି ସ୍ଥାନ ଏବଂ ସୁନାବେଡା ପ୍ରମୁଖ ୭ଟି ସ୍ଥାନରେ ଏକକାଳୀନ ଚଢାଉ ଜାରି ରହିଛି। ତେବେ ସୁଙ୍କିରେ ପ୍ରଥମ ଥର ଏହିପରି ଭିଜିଲାନ୍ସ ଚଢାଉ ହେଉଥିବା ସହ ଏହା ପଛରେ କମ୍ପାନୀର ଅନେକ କର୍ମଚାରୀ ଓ ସ୍ଥାନୀୟ ଅଞ୍ଚଳର ଲୋକଙ୍କ ସମ୍ପୃକ୍ତି ରହିଛି। ସେମାନଙ୍କୁ ମଧ୍ୟ ତଦନ୍ତ ଘେରକୁ ଅଣାଯିବା ସହ ଅମ୍ପାବାଲି ପଞ୍ଚାୟତର ଗଜପତି ସିମେଣ୍ଟ କାରଖାନାରେ ବ୍ୟବହୃତ ହେଉଥିବା ଚୂନ ପଥର ନେଇ କାମ କରୁଥିବା ବେଳେ ଉକ୍ତ ସିମେଣ୍ଟ କାରଖାନାକୁ ମଧ୍ୟ ତଦନ୍ତ ପରିସରରକୁ ଅଣାଯିବା ଉଚିତ ବୋଲି ଅଞ୍ଚଳବାସୀ ଦାବି କରିଛନ୍ତି ।