ଭୁବନେଶ୍ୱର,୩୦।୧୦: ସାଧାରଣ ଜୀବନରେ ସ୍ୱଚ୍ଛତା ଓ ଉତ୍ତରଦାୟିତ୍ୱ ସହ ଦୁର୍ନୀତି ବାବଦରେ ଲୋକଙ୍କୁ ସଚେତନ କରାଇବା ଲାଗି ଆଜିଠାରୁ ଆସନ୍ତା ୫ ତାରିଖ ପର୍ଯ୍ୟନ୍ତ ଦୁର୍ନୀତି ନିବାରଣ ସଚେତନତା ସପ୍ତାହ ପାଳନ କରାଯାଉଛି। ଏହି ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବାର୍ତ୍ତା ଦେଇ କହିଛନ୍ତି, ଦୁର୍ନୀତି ସମାଜର ବିକାଶ ଏବଂ ସୁଶାସନର ପରିପନ୍ଥୀ। ଦୁର୍ନୀତିମୁକ୍ତ ସମାଜ ଓ ସଶକ୍ତ ଓଡ଼ିଶା ଗଠନ ପାଇଁ ରାଜ୍ୟବାସୀ ସାମୂହିକ ଭାବେ ସଂକଳ୍ପବଦ୍ଧ ହୋଇ କାର୍ଯ୍ୟ କରିବା ପାଇଁ ମୁଖ୍ୟମନ୍ତ୍ରୀ ଆହ୍ୱାନ ଦେଇଛନ୍ତି।
ସେ କହିଛନ୍ତି, ପ୍ରଶାସନିକ ବ୍ୟବସ୍ଥା ତଥା ମୌଳିକ ସେବା ପ୍ରଦାନକୁ ଦୁର୍ନୀତିମୁକ୍ତ କରିବା ପାଇଁ ଫାଇଭ୍-ଟି ଉପକ୍ରମରେ ସ୍ୱଚ୍ଛତାକୁ ଅଗ୍ରାଧିକାର ଦିଆଯାଇଛି। ଶାସନ ବ୍ୟବସ୍ଥାରେ ରୂପାନ୍ତରଣ ଆଣି ‘ମୋ ସରକାର’ ସାଧାରଣ ଲୋକଙ୍କର ମତାମତକୁ ଗୁରୁତ୍ୱ ଦେଇ କାମ କରୁଛି ବୋଲି ସେ କହିଛନ୍ତି। ଏହି ଅବସରରେ ମୁଖ୍ୟମନ୍ତ୍ରୀ ସୋମବାର ଭୁବନେଶ୍ୱରସ୍ଥିତ ଲୋକସେବା ଭବନରେ ସ୍ୱତନ୍ତ୍ର କାର୍ଯ୍ୟକ୍ରମରେ ଯୋଗଦେଇ ରାଉରକେଲା ଏବଂ
ବାଲେଶ୍ୱରର ଭିଜିଲାନ୍ସ କାର୍ଯ୍ୟାଳୟକୁ ଲୋକାର୍ପଣ କରିଛନ୍ତି।
ସେହିଭଳି ଦୁର୍ନୀତି ରୋକିବା ଦିଗରେ କଟକ ଦୁର୍ନୀତି ନିବାରଣ ଡିଭିଜନକୁ ଶ୍ରେଷ୍ଠ ଡିଭିଜନ ଭାବେ ସମ୍ମାନିତ କରାଯାଇଛି। ଦୁର୍ନୀତି ନିର୍ବାଚଣ ସଚେତନତା ସପ୍ତାହ ପାଳନ ଅବସରରେ ସରକାରୀ କାର୍ଯ୍ୟାଳୟମାନଙ୍କରେ କର୍ମଚାରୀମାନେ ଦୁର୍ନୀତି ନିବାରଣ ଶପଥ ପାଠ କରିବା ସହିତ ବିଭିନ୍ନ ସାମାଜିକ ଅନୁଷ୍ଠାନଗୁଡ଼ିକ ଦୁର୍ନୀତି ବାବଦରେ ଲୋକଙ୍କୁ ସଚେତନ କରାଇବା ଲାଗି କାର୍ଯ୍ୟକ୍ରମମାନ ଆୟୋଜନ କରୁଛନ୍ତି।