ଧର୍ମଶାଳା,୨୩।୧(ଡି.ଏନ.ଏ.): ଯାଜପୁର ଜିଲା ଧର୍ମଶାଳା ବ୍ଲକ ଅଧୀନ କେଲୁଅ ନଦୀର ରମାପୁରଠାରେ ହୋଇଥିବା ଘାଇ ଘଟଣାର ଭିଜିଲାନ୍ସ ତଦନ୍ତ ଆରମ୍ଭ ହୋଇଛି। ଶୁକ୍ରବାର କଟକ ଭିଜିଲାନ୍ସ ସେଲ୍ର ଏକ ୫ ଜଣିଆ ବୈଷୟିକ ଟିମ୍ ଘାଇ ସ୍ଥଳକୁ ଆସି ମାପଚୁପ କରି ଫେରିଛନ୍ତି। କଟକ ଭିଜିଲାନ୍ସ ସେଲ୍ ପକ୍ଷରୁ ଅତିରିକ୍ତ ଏସ୍ପି ହରନାରାୟଣ ପତିଙ୍କ ନେତୃତ୍ୱରେ ଅତିରିକ୍ତ ଏସ୍ପି ରଞ୍ଜନ କୁମାର ଦାସ, ଜଳସେଚନ ବିଭାଗ ମୁଖ୍ୟଯନ୍ତ୍ରୀ ଶିଶିର କୁମାର ପଟ୍ଟନାୟକ ପ୍ରମୁଖ ତଦନ୍ତରେ ସାମିଲ ହୋଇଛନ୍ତି। ତେବେ ଭିଜିଲାନ୍ସ ଟିମ୍ ଗସ୍ତ ସମ୍ପର୍କରେ ଜଳସେଚନ, ପୂର୍ତ୍ତ ବିଭାଗ ଓ ଧର୍ମଶାଳା ପୋଲିସକୁ ସୂଚନା ଦିଆଯାଇ ନ ଥିବା ଜଣାପଡ଼ିଛି।
ସୂଚନାଯୋଗ୍ୟ, ଗତ ଅଗଷ୍ଟ ୨୮ରେ ବ୍ରାହ୍ମଣୀ ନଦୀରେ ବଡ଼ ଧରଣର ବନ୍ୟା ଆସିବା ଯୋଗୁ ରମାପୁରଠାରେ ୩୦୦ ଫୁଟରୁ ଊର୍ଦ୍ଧ୍ୱର ଘାଇ ହୋଇଥିଲା। ଫଳରେ ସ୍ଥାନୀୟ ୫ ପଞ୍ଚାୟତର ଲୋକେ ପ୍ରଭାବିତ ହୋଇଥିଲେ। ହେକ୍ଟର ହେକ୍ଟର ଫସଲ ନଷ୍ଟ ହୋଇଥିଲା। ତେବେ ଏହା ଏକ ମନୁଷ୍ୟକୃତ ଘାଇ ବୋଲି ଅଭିଯୋଗ ହେବା ସହ ଜାରକା ଜଳସେଚନ ବିଭାଗ ପକ୍ଷରୁ ଥାନାରେ ଅଭିଯୋଗ ହୋଇଥିଲା। ସ୍ଥାନୀୟ ବିଧାୟକ ପ୍ରଣବ ବଳବନ୍ତରାୟ ଓ ତାଙ୍କ ମାମୁ ଆର୍ଏଣ୍ଡ୍ବି ଜେଇ ନରେନ ଜେନା ଷଡ଼ଯନ୍ତ୍ର କରି ଘାଇ କରିଥିବା ବିରୋଧୀ ଅଭିଯୋଗ କରିଥିଲେ। ଏପରି କି ଡିନାମାଇଟ ସାହାଯ୍ୟରେ ଘାଇ କରାଯାଇଥିବା କୁହାଯାଇଥିଲା। ଏହି ଘଟଣା ରାଜ୍ୟବ୍ୟାପୀ ତୁମ୍ବିତୋଫାନ ସୃଷ୍ଟି କରିଥିବା ବେଳେ ଭାଜପା ଓ କଂଗ୍ରେସ ଦଳର ଏକ ଟିମ୍ ଆସି ସ୍ଥିତି ପରଖିବା ସହ ଘଟଣାର ଉଚ୍ଚସ୍ତରୀୟ ତଦନ୍ତ ଦାବି କରିଥିଲେ। ପରେ ଘଟଣାକୁ ନେଇ ସ୍ଥାନୀୟ ଅଞ୍ଚଳର ସୂଚନା ଅଧିକାର କର୍ମୀ ସର୍ବେଶ୍ୱର ବେହୁରା ଲୋକାୟୁକ୍ତଙ୍କ ନିକଟରେ ଅଭିଯୋଗ କରିଥିଲେ। ଘଟଣାରେ ଲୋକାୟୁକ୍ତ ସ୍ଥାନୀୟ ବିଧାୟକ ଓ ତାଙ୍କ ମାମୁଙ୍କ ସମେତ ୬ ଜଣଙ୍କୁ ନୋଟିସ୍ କରିଥିଲେ। ପରବର୍ତ୍ତୀ ସମୟରେ ଲୋକାୟୁକ୍ତ ଭିଜିଲାନ୍ସ ସେଲ୍କୁ ଘଟଣାର ତଦନ୍ତ କରି ୨ ମାସ ମଧ୍ୟରେ ରିପୋର୍ଟ ଦେବାକୁ ନିର୍ଦ୍ଦେଶ ଦେଇଥିଲେ।