ବ୍ରହ୍ମପୁର ଅଫିସ,୨୦ା୬: ସ୍ବତନ୍ତ୍ର ଭିଜିଲାନ୍ସ ଜଜ୍ଙ୍କ ସର୍ଚ୍ଚ ଓ୍ବାରେଣ୍ଟ ବଳରେ ଭୁବନେଶ୍ୱର ହେଡ୍ କ୍ୱାର୍ଟରରେ ଥିବା ଯୋଗାଣ ଅଧିକାରୀ ଅନାଦି ଚରଣ ସେଠୀ୍ଙ୍କ ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ୫ଟି ସ୍ଥାନରେ ବ୍ରହ୍ମପୁର ଭିଜିଲାନ୍ସ ଟିମ୍ ସୋମବାର ସକାଳୁ ଚଢ଼ାଉ କରିଛି। ବ୍ରହ୍ମପୁର ଖାରବେଳ ନଗରସ୍ଥିତ ଦୁଇ ମହଲା କୋଠା ସମେତ, ଛତ୍ରପୁର ରାମନଗରସ୍ଥିତ ଦୁଇ ମହଲା କୋଠା , ରାମନଗରରେ ଥିବା ଏକ ମାର୍କେଟ କମ୍ପ୍ଲେକ୍ସ , ଅନାଦିଙ୍କ ପୁଅଙ୍କ ନାମରେ ଭୁବନେଶ୍ୱର ଚନ୍ଦ୍ରଶେଖରପୁରଠାରେ ଥିବା ମା’ରେସିଡେନ୍ସି ନାମକ ଏକ ଓୟା ହୋଟେଲ ଓ ତାଙ୍କ ଝିଅ ରହୁଥିବା ବାଲେଶ୍ୱରସ୍ଥିତ ବାସଭବନରେ ଏକକାଳୀନ ଚଢ଼ାଉ ଜାରି ରହିଛି। ଏହି ଚଢ଼ାଉରେ ଭିଜିଲାନ୍ସର ଜଣେ ଅତିରିକ୍ତ ଏସ୍ପି , ୪ ଡିଏସ୍ପି, ୧୦ ଜଣ ଇନ୍ସପେକ୍ଟର ସାମିଲ ଅଛନ୍ତି ବୋଲି ଭିଜିଲାନ୍ସ ଏସପି ତ୍ରିଲୋଚନ ସ୍ବାଇଁ ପ୍ରାଥମିକ ସୂଚନା ଦେଇଛନ୍ତି। ଚଢ଼ାଉ ଜାରି ରହିଥିବାରୁ ସବିଶେଷ ତଥ୍ୟ ଜଣାପଡ଼ି ନ ଥିବା ଏସ୍ପି ସ୍ବାଇଁ କହିଛନ୍ତି। ଯୋଗାଣ ଅଧିକାରୀ ଅନାଦି ସେଠି ପୂର୍ବରୁ ଗଜପତି ଜିଲାରେ ଯୋଗାଣ ଅଧିକାରୀ ଭାବେ ଥିଲେ। ତାଙ୍କ ନାମରେ ଅଭିଯୋଗ ଆସିବା ପରେ ଏହି ଚଢ଼ାଉ କରାଯାଇଛି ବୋଲି ବିଭାଗୀୟ ସୂତ୍ରରୁ ପ୍ରକାଶ।