ଡେରାବିଶ,୨୫।୨(ବେବର୍ତ୍ତା ଅଜୟ ଦାସ): ସାଧାରଣ ନିର୍ବାଚନ ପାଖେଇ ଆସୁଥିବା ବେଳେ କେନ୍ଦ୍ରାପଡ଼ା ଜିଲାର ପାଟକୁରା ବିଧାନସଭା କ୍ଷେତ୍ରର ରାଜନୈତିକ ବାତାବରଣ ଉଷ୍ମ ହେବାରେ ଲାଗିଛି। ଏକଦା ଏହି ନିର୍ବାଚନମଣ୍ଡଳୀରୁ ପ୍ରତିନିଧିତ୍ୱ କରୁଥିବା ପୂର୍ବତନ ବିଧାୟକ ତଥା ପୂର୍ବତନ ମନ୍ତ୍ରୀ ବିଜୟ ମହାପାତ୍ର କେବଳ କେନ୍ଦ୍ରାପଡ଼ା ଜିଲା ନୁହେଁ, ରାଜ୍ୟ ରାଜନୀତିରେ ସ୍ବତନ୍ତ୍ର ପରିଚୟ ସୃଷ୍ଟି କରିଥିଲେ। ୨୦୦୯ ସାଧାରଣ ନିର୍ବାଚନ ଓ ୨୦୧୯ ଉପନିର୍ବାଚନରେ ଭାଜପାରୁ ଲଢ଼ି ସେ ବିଜେଡି ପ୍ରାର୍ଥୀଙ୍କୁ କଡ଼ା ଟକ୍କର ଦେଇଥିେଲେ। ଏପରି କି ୨୦୧୯ ନିର୍ବାଚନ ପରେ ନିର୍ବାଚନମଣ୍ଡଳୀର ବିଭିନ୍ନ ସମସ୍ୟା ସହ ଜଡ଼ିତ ଥିବା ବିଜୟ ନିଜର ଦଳୀୟ ଓ ସାମାଜିକ କାର୍ଯ୍ୟକ୍ରମରେ ସକ୍ରିୟ ଅଂଶଗ୍ରହଣ କରୁଥିଲେ। ହେଲେ ଆସନ୍ତା ନିର୍ବାଚନରେ ସେ କେଉଁ ଦଳରୁ ପ୍ରାର୍ଥୀ ହେବେ ସେ ନେଇ ନିର୍ବାଚନମଣ୍ଡଳୀରେ କଳ୍ପନାଜଳ୍ପନା ପ୍ରକାଶ ପାଉଥିବା ବେଳେ ସେ ବେଶି କିଛି ସାଧାରଣରେ ପ୍ରକାଶ ନ କରି ନିଜ ସମର୍ଥକ ଓ ଶୁଭେଚ୍ଛୁଙ୍କ ସହ ବୈଠକ କରୁଥିବା ଦେଖିବାକୁ ମିଳୁଛି। ସମର୍ଥକଙ୍କ ପ୍ରସ୍ତାବ ଓ ପରାମର୍ଶକୁ ପାଥେୟ କରି ସେ ପରବର୍ତ୍ତୀ ପଦକ୍ଷେପ ନେଇପାରନ୍ତି ବୋଲି ରାଜନୈତିକ ସମୀକ୍ଷକମାନେ ମତ ଦେଉଛନ୍ତି।
ଶୁକ୍ରବାର ଡେରାବିଶ ବ୍ଲକର ନିଶ୍ଚିତକୋଇଲିଠାରେ ବିଜୟ ସମର୍ଥକଙ୍କ ସହ ବୈଠକ କରିଥିଲେ। ପୁଅ ଅରବିନ୍ଦଙ୍କୁ ବିଜେଡିରୁ ପ୍ରାର୍ଥୀ କରାଯିବା ସଂକ୍ରାନ୍ତ ହେଉଥିବା ଆଲୋଚନା ପରିପ୍ରେକ୍ଷୀରେ ସେ କାଳେ ସମସ୍ତଙ୍କ ସହଯୋଗ ଲୋଡ଼ିଥିଲେ ବୋଲି କଥା ପଦାକୁ ଆସିଥିଲା। ଶନିବାର ଗରଦପୁର ବ୍ଲକ ତଳକୁସୁମାସ୍ଥିତ ତାଙ୍କ ବାସଭବନରେ ନିଜ ଅନୁଗତଙ୍କୁ ନେଇ ହୋଇଥିବା ଅନୁରୂପ ବୈଠକ ପୁଣି ଚର୍ଚ୍ଚାକୁ ଆସିଛି। ଏ ବିଷୟରେ ବିଜୟଙ୍କୁ ଯୋଗାଯୋଗ କରାଯାଇଥିଲା।
ତେବେ ଏ ନେଇ ସେ କୌଣସି ସ୍ପଷ୍ଟ ସୂଚନା ଦେଇ ନ ଥିବା ବେଳେ ପାଟକୁରାର ସ୍ବାଭିମାନ ପାଇଁ ସେ ସବୁବେଳେ ସଂଗ୍ରାମ କରି ଆସିଥିବା କହିଛନ୍ତି। ରାଜନୈତିକ କାର୍ଯ୍ୟକ୍ରମ ନେଇ ତାଙ୍କର ଭୂମିକା କ’ଣ ରହିବ ବୋଲି ପଚରାଯିବାରୁ ସବୁ ସମୟରେ ତାଙ୍କ ସମର୍ଥକ ଓ ହିତୈଷୀମାନଙ୍କ ସହ ସେ ପରାମର୍ଶ କରିଥାନ୍ତି ବୋଲି କହିଛନ୍ତି। ଆସନ୍ତା ନିର୍ବାଚନ ପାଇଁ ମଧ୍ୟ ନିର୍ବାଚନମଣ୍ଡଳୀ ଅଧୀନରେ ଥିବା ସମସ୍ତ ବ୍ଲକ ଅଞ୍ଚଳର ସମର୍ଥକଙ୍କ ସହ ଏ ବିଷୟରେ ମତ ଲୋଡ଼ୁଛନ୍ତି ବୋଲି କହିଛନ୍ତି। ଭାଜପା ଛାଡ଼ି ବିଜେଡିରେ ମିଶିବା ନେଇ ହେଉଥିବା ଚର୍ଚ୍ଚା ବିଷୟରେ ବିଜୟଙ୍କୁ ପଚାରିବାରୁ ସେ କହିଛନ୍ତି, ଏଭଳି କୌଣସି ସୂଚନା ସେ କାହାରିକୁ ଦେଇନାହାନ୍ତିି। ସେହିପରି ଉତ୍ତରାଧିକାରୀ ଭାବେ ପୁଅ ଅରବିନ୍ଦଙ୍କ ବିଜେଡି ପ୍ରାର୍ଥିତ୍ୱ ନେଇ ହେଉଥିବା ଚର୍ଚ୍ଚା ସଂକ୍ରାନ୍ତରେ ପଚାରିବାରୁ ସେ ଉପରୋକ୍ତ ଉତ୍ତରକୁ ଦୋହରାଇଛନ୍ତି। ଏଭଳି ସ୍ଥଳେ ବିଜୟଙ୍କ ଭୂମିକା କ’ଣ ରହୁଛି ତାହା ନିର୍ବାଚନମଣ୍ଡଳୀ ବାସିନ୍ଦା ଅପେକ୍ଷାରେ ରହିବା ସ୍ବାଭାବିକ।