ଭୁବନେଶ୍ୱର,୨୫ା୧୧: ସର୍ବଭାରତୀୟ ବିଜୟ ହଜାରେ ଟ୍ରଫିରେ ଓଡ଼ିଶାର ପ୍ରଥମ ପରାଜୟ। ବର୍ଷା କାରଣରୁ ଭିଜେଡି(ଭି. ଜୟଦେବନ ସିଷ୍ଟମ)ରେ ଫଳାଫଳ ନିର୍ଣ୍ଣୟ ହୋଇଥିବା ବେଳେ ରେଲଓ୍ବେ ବିପକ୍ଷ ମ୍ୟାଚ୍କୁ ଦଳ ୨୪ ରନ୍ରେ ହାରି ଯାଇଥିଲା। ପ୍ରଥମେ ବ୍ୟାଟିଂ କରି ରେଲଓ୍ବେ ୪୦ ଓଭରରେ ୧୯୩ ରନ୍ରେ ଅଲଆଉଟ ହୋଇଥିଲା। ଜବାବରେ ଓଡ଼ିଶା ୨୦.୨ ଓଭରରେ ୪ ଉଇକେଟ ହରାଇ ୬୭ ରନ୍ କରିଥିବା ବେଳେ ବର୍ଷା ହୋଇଥିଲା। ଭିଜେଡି ନିୟମ ଅନୁସାରେ ଓଡ଼ିଶା ୨୪ ରନ୍ ପଛରେ ରହି ମ୍ୟାଚ ହାରିଯାଇଥିଲା।
ଆଲୁରରେ ଖେଳାଯାଇଥିବା ମ୍ୟାଚ୍ରେ ଟସ୍ ଜିତି ରେଲ୍ଓ୍ବେ ପ୍ରଥମେ ବ୍ୟାଟିଂ ନେଇଥିଲା। ତେବେ ଦେବବ୍ରତ ପ୍ରଧାନ ଓ ରାଜେଶ ମହାନ୍ତଙ୍କ ଘାତକ ବୋଲିଂ ବଳରେ ଦଳ ୧୯୩ ରନ୍ରେ ଅଲଆଉଟ ହୋଇଥିଲା। ରେଲଓ୍ବେ ୭୩ ରନ୍ରେ ୬ ଉଇକେଟ ହରାଇଥିଲେ ମଧ୍ୟ ପ୍ରଥମ ସିଂଙ୍କ ୫୦ ଓ କର୍ନ ଶର୍ମାଙ୍କ ୭୨ ରନ୍ ବଳରେ ଦଳ ଲଢୁଆ ୧୯୩ ରନ୍ କରିଥିଲା। କର୍ନ ଶର୍ମା ୬୭ ବଲ୍ ଖେଳି ୫ ଚୌକା ଓ ୬ ଛକା ମାରିଥିଲେ। ଓଡ଼ିଶା ପକ୍ଷରୁ ଦେବବ୍ରତ ପ୍ରଧାନ ୪ ଓ ରାଜେଶ ମହାନ୍ତି ୩ ଉଇକେଟ ନେଇଥିଲେ।
ପ୍ରଥମ ମ୍ୟାଚ୍ ପରି ଓଡ଼ିଶାର ଆରମ୍ଭ ଅତ୍ୟନ୍ତ ଦୟନୀୟ ରହିଥିଲା। ଦଳର ଟପ୍ ୪ ବ୍ୟାଟର ଦୁଇ ଅଙ୍କ ଛୁଇଁ ପାରି ନ ଥିଲେ। ଅନୁରାଗ ଷଡଙ୍ଗୀ(୯), ଶାନ୍ତନୁ ମିଶ୍ର(୨), ଶୁଭ୍ରାଂଶୁ ସେନାପତି(୪) ଓ କାର୍ତ୍ତିକ ବିଶ୍ୱାଳ(୬) ବିଫଳ ହୋଇଥିଲେ। ୧୭ ରନ୍ରେ ଦଳ ୩ ଉଇକେଟ ହରାଇଥିବା ବେଳେ ୬୩ ରନ୍ରେ ଚତୁର୍ଥ ଉଇକେଟ ହରାଇଥିଲା। ମ୍ୟାଚ୍ର ୨୦.୨ ଓଭରରେ ବର୍ଷା ହେବାରୁ ଓଡ଼ିଶା ୨୪ ରନ୍ ପଛରେ ରହି ଯାଇଥିଲା। ଅଧିନାୟକ ବିପ୍ଲବ ସାମନ୍ତରାୟ ଅପରାଜିତ ୪୧ ରନ୍ ସ୍କୋର କରିଥିଲେ। ରେଲଓ୍ବେ ପକ୍ଷରୁ ରାହୁଲ ଶର୍ମା ୨ ଉଇକେଟ ନେଇଥିବା ବେଳେ ଯୁବରାଜ ସିଂ ଓ ଆକାଶ ପାଣ୍ଡେ ଗୋଟିଏ ଲେଖାଏ ଉଇକେଟ ନେଇଥିଲେ।
ସଂକ୍ଷିପ୍ତ ସ୍କୋର: ରେଲଓ୍ବେ ୪୦ ଓଭରରେ ୧୯୩/୧୦(କର୍ନ ଶର୍ମା-୭୨, ପ୍ରଥମ ସିଂ-୫୦, ଦେବବ୍ରତ ପ୍ରଧାନ-୪/୩୫, ରାଜେଶ ମହାନ୍ତି-୩/୩୫, ପ୍ରୟାସ ସିଂ-୨/୪୦)।
ଓଡ଼ିଶା ୨୦.୨ ଓଭରରେ ୬୭/୪(ବିପ୍ଲବ ସାମନ୍ତରାୟ-୪୧*, ରାହୁଲ ଶର୍ମା-୨/୧୧, ଯୁବରାଜ ସିଂ-୧/୨୦, ଆକାଶ ପାଣ୍ଡେ-୧/୬)।