ନୂଆଦିଲ୍ଲୀ, ୧୨।୩-ଚଳିତ ବିଜୟ ହଜାରେ ଟ୍ରଫି ଘରୋଇ ଦିନିକିଆ କ୍ରିକେଟ ଟୁର୍ନାମେଣ୍ଟର ଫାଇନାଲ ଉତ୍ତର ପ୍ରଦେଶ ଓ ମୁମ୍ବାଇ ମଧ୍ୟରେ ଅନୁଷ୍ଠିତ ହେବ। ଗୁରୁବାର ଅନୁଷ୍ଠିତ ୨ଟି ସେମିଫାଇନାଲରେ ଗୁଜରାଟକୁ ଉତ୍ତର ପ୍ରଦେଶ ଓ କର୍ନାଟକକୁ ମୁମ୍ବାଇ ହରାଇ ଫାଇନାଲରେ ପ୍ରବେଶ କରିଛନ୍ତି। ୧୪ ତାରିଖରେ ଫାଇନାଲ ଖେଳାଯିବ।
ଆକାଶଦୀପଙ୍କ ଅଲରାଉଣ୍ଡ ପ୍ରଦର୍ଶନ
ପ୍ରଥମ ସେମିଫାଇନାଲରେ ଉତ୍ତର ପ୍ରଦେଶ ୫ ଉଇକେଟରେ ଗୁଜରାଟକୁ ହରାଇ ଦେଇଛି। ପ୍ରଥମେ ବ୍ୟାଟିଂ କରିଥିବା ଗୁଜରାଟ ୪୮.୧ ଓଭରରେ ୧୮୪ ରନକରି ଅଲଆଉଟ ହୋଇଥିଲା। ଦଳ ପକ୍ଷରୁ ହିତ୍ ପଟେଲ ସର୍ବାଧିକ ୬୦ ରନ କରିଥିବାବେଳେ ବିପକ୍ଷ ଦଳର ୟଶ ଦୟାଲ ୩ଟି, ଆକ୍ୱିବ ଖାଁ ୨ଟି ଏବଂ ଶିବମ୍ ଶର୍ମା ଓ ଆକାଶଦୀପ ନାଥ ଗୋଟିଏ ଲେଖାଏ ଉଇକେଟ ନେଇଥିଲେ। ଉତ୍ତର ପ୍ରଦେଶ ୪୨.୪ ଓଭରରେ ୫ ଉଇକେଟ ହରାଇ ୧୮୮ ରନ ସଂଗ୍ରହ କରି ନେଇଥିଲା। ଆକାଶଦୀପ ସର୍ବାଧିକ ୭୧, କର୍ନ ଶର୍ମା ୩୮ ଓ ଉପେନ୍ଦ୍ର ଯାଦବ ୩୧* ରନ କରିଥିଲେ। ଅଲରାଉଣ୍ଡ ପ୍ରଦର୍ଶନ ପାଇଁ ଆକାଶଦୀପ ମ୍ୟାନ ଅଫ୍ ଦି ମ୍ୟାଚ ବିବେଚିତ ହୋଇଥିଲେ।
ପୃଥ୍ବୀ ଶ’ ୧୬୫
ଦ୍ୱିତୀୟ ସେମିଫାଇନାଲରେ ମୁମ୍ବାଇ ପୃଥ୍ବୀ ଶ’ଙ୍କ ଶତକ ବଳରେ କର୍ନାଟକକୁ ୭୨ ରନରେ ପରାସ୍ତ କରିଛି। ମୁମ୍ବାଇ ୪୯.୨ ଓଭରରେ ୩୨୨ ରନ କରି ସମସ୍ତ ଉଇକେଟ ହରାଇଥିଲା। ପୃଥ୍ବୀ ୧୨୨ ବଲ୍ରୁ ୧୭ ଚୌକା ଓ ୭ ଛକା ସହାୟତାରେ ବିସ୍ଫୋରକ ୧୬୫ ରନ ସ୍କୋର କରିଥିଲେ। ସାମ୍ସ ମୁଲାନି ୪୫ ରନ କରିଥିଲେ। ପ୍ରତିପକ୍ଷ ଦଳର ବିଜୟ କୁମାର ୪ଟି ଓ ପ୍ରସିଦ୍ଧ କ୍ରିଷ୍ଣା ୩ଟି ଉଇକେଟ ନେଇଥିଲେ। ବଡ଼ ସ୍କୋର ବିଜୟ ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇଥିବା କର୍ନାଟକ ୪୨.୪ ଓଭରରେ ୨୫୦ ରନକରି ଅଲଆଉଟ ହୋଇଯାଇଥିଲା। ଦେବଦତ୍ତ ପଡିକାଲ ସର୍ବାଧିକ ୬୪, ଶରତ ବି.ଆର. ୬୧, ଶ୍ରେୟାସ ଗୋପାଳ ୩୩ ରନ କରିଥିଲେ। ମୁମ୍ବାଇର ତୁଷାର ଦେଶପାଣ୍ଡେ, ତନୁଶ କୋଟିଆନ, ପ୍ରଶାନ୍ତ ସୋଲାଙ୍କି ଓ ସାମ୍ସ ମୁଲାନି ୨ଟି ଲେଖାଏ ଉଇକେଟ ନେଇଥିଲେ। ପୃଥ୍ବୀ ମ୍ୟାନ ଅଫ୍ ଦି ମ୍ୟାଚ ପୁରସ୍କାର ପାଇଥିଲେ।