ପାଟନା, ୨୩।୮ : ବିହାର ବିଧାନସଭା ବାଚସ୍ପତି ବିଜୟ କୁମାର ସିହ୍ନା ଏହି ପଦରୁ ଇସ୍ତଫା ଦେବାକୁ ସମ୍ପୂର୍ଣ୍ଣ ଭାବେ ମନା କରି ଦେଇଛନ୍ତି। ସେ କହିଛନ୍ତି ଯେ ତାଙ୍କ ବିରୁଦ୍ଧରେ ଅବିଶ୍ୱାସ ପ୍ରସ୍ତାବ ଅଣାଯିବା ଯୋଗୁ ଯଦି ସେ ଇସ୍ତଫା ଦିଅନ୍ତି, ତେବେ ଏହା ତାଙ୍କ ଆତ୍ମବିଶ୍ୱାସକୁ କ୍ଷତି ପହଞ୍ଚାଇବ।
ବିହାରରେ ମହାମେଣ୍ଟ ସରକାର ଗଠନ ହେବା ପରେ ବିହାର ବିଧାନସଭା ବାଚସ୍ପତି ବିଜୟ କୁମାର ସିହ୍ନାଙ୍କୁ ହଟାଇବାକୁ ଦାବି ଆରମ୍ଭ ହେବାରେ ଲାଗିଛି। ଏହି କ୍ରମରେ ରାଷ୍ଟ୍ରୀୟ ଜନତା ଦଳ ପକ୍ଷରୁ ସୋମବାର ପୁଣି ଥରେ ତାଙ୍କ ଇସ୍ତଫା ଦାବି କରାଯାଇଛି। ଆରଜେଡି ମୁଖପାତ୍ର ଶକ୍ତି ସିଂ ଯାଦବ କହିଛନ୍ତି ଯେ ବିହାର ବାଚସ୍ପତି ତଥା ଭାଜପା ନେତା ବିଜୟ କୁମାର ସିହ୍ନା ଚଳିତ ମାସ ଆରମ୍ଭରେ ତାଙ୍କ ବିରୋଧରେ ମହାମେଣ୍ଟ ଦ୍ୱାରା ଅଣାଯାଇଥିବା ଅବିଶ୍ୱାସ ପ୍ରସ୍ତାବକୁ ଦୃଷ୍ଟିରେ ରଖି ତୁରନ୍ତ ଇସ୍ତଫା ଦେବା ଉଚିତ।
ସିହ୍ନା ଦାବି କରିଛନ୍ତି ଯେ ତାଙ୍କ ବିରୋଧରେ ଅଣାଯାଉଥିବା ଅବିଶ୍ୱାସ ପ୍ରସ୍ତାବ ମିଥ୍ୟା ଉପରେ ଆଧାରିତ। ସେ କହିଛନ୍ତି ଯେ ବିଧାନସଭା ନିୟମ ଅନୁଯାୟୀ ଏହି ପ୍ରସ୍ତାବ ଅଣାଯାଉଛି। ବିଧାନସଭାର ବାଚସ୍ପତି କହିଛନ୍ତି ମୋ ବିରୋଧରେ ପକ୍ଷପାତିତା ଏବଂ ଏକଛତ୍ରବାଦୀ ଶାସନ ଅଭିଯୋଗ ହୋଇଛି। ଉଭୟ ଅଭିଯୋଗ ସମ୍ପୂର୍ଣ୍ଣ ମିଥ୍ୟା। ତେଣୁ ଇସ୍ତଫା ଦେବା ଦ୍ୱାରା ମୋର ଆତ୍ମ ସମ୍ମାନକୁ କ୍ଷତି ପହଞ୍ଚିବ।
ବୁଧବାର ବିଧାନସଭାରେ ତାଙ୍କ ଦଳର ପକ୍ଷ କ’ଣ ହେବ ତାହା ବାଚସ୍ପତି ସ୍ପଷ୍ଟ କରି ନାହାଁନ୍ତି। ସେ କେବଳ କହିଛନ୍ତି ଯେ ମୁଁ ମୋ ଚେୟାରରେ ଗୃହରେ ଉପସ୍ଥିତ ରହିବି, କାରଣ ମୁଁ ଏକ ସାମ୍ବିଧାନିକ ପଦବୀ ସହିତ ଜଡିତ। ମୋର ପ୍ରାଥମିକତା ହେବ ଯେ ମୁଁ ନିୟମ ଅନୁଯାୟୀ ମୋର ଦାୟିତ୍ୱ ପୂରଣ କରିବି ।
