ନୂଆଦିଲ୍ଲୀ,୧୩।୨ : କେରଳର ମୁଖ୍ୟମନ୍ତ୍ରୀ ପିନାରାଇ ବିଜୟନ କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଅମିତ ଶାହାଙ୍କୁ କଡ଼ା ସମାଲୋଚନା କରିଛନ୍ତି। ସେ କହିଛନ୍ତି ଯେ ଶାହା କେରଳରେ କି ପ୍ରକାର ବିପଦ ଦେଖୁଛନ୍ତି ତାହା ବିସ୍ତୃତ ଭାବରେ ବ୍ୟାଖ୍ୟା କରିବା ଉଚିତ। ଶାହ ଶନିବାର କର୍ନାଟକର ଦକ୍ଷିଣ କନ୍ନଡ ଜିଲା ଗସ୍ତ ସମୟରେ କେରଳର ପପୁଲାର ଫ୍ରଣ୍ଟ ଅଫ ଇଣ୍ଡିଆ (ପିଏଫଆଇ) ବିରୋଧରେ ଏନଆଇଏ ଦ୍ୱାରା ନିଆଯାଇଥିବା ପଦକ୍ଷେପ ବିଷୟରେ ଉଲ୍ଲେଖ କରିଛନ୍ତି। ସେ ଲୋକମାନଙ୍କୁ କହିଛନ୍ତି ଯେ ପଡୋଶୀ କେରଳର ବିପଜ୍ଜନକ ଅବସ୍ଥାକୁ ଦୃଷ୍ଟିରେ ରଖି କର୍ନାଟକର ଲୋକମାନେ ଭାଜପାକୁ ଭୋଟ ଦେବା ଉଚିତ।
ଏହାର ଜବାବରେ କେରଳ ମୁଖ୍ୟମନ୍ତ୍ରୀ ରବିବାର କୋଟାୟାମରେ ଅନୁଷ୍ଠିତ ଏକ ସିପିଆଇ (ଏମ) କାର୍ଯ୍ୟକ୍ରମରେ କହିଛନ୍ତି ଯେ ବାମପନ୍ଥୀ ଶାସନରେ ସଂଖ୍ୟାଲଘୁମାନେ କେରଳରେ ଶାନ୍ତିପୂର୍ଣ୍ଣ ଭାବରେ ଜୀବନଯାପନ କରୁଥିବାବେଳେ ଭାଜପା ଶାସିତ ରାଜ୍ୟରେ ସେମାନଙ୍କୁ ଟାର୍ଗେଟ କରାଯାଉଛି। କେରଳର ପରିସ୍ଥିତିକୁ ସମସ୍ତେ ଜାଣନ୍ତି ବୋଲି ସେ କହିଛନ୍ତି। ଏଠାରେ କ’ଣ ଭୁଲ ଅଛି ତାହା ଅମିତ ଶାହା ସ୍ପଷ୍ଟ ଭାବରେ କହିବା ଉଚିତ। ସଂଖ୍ୟାଲଘୁ ସମ୍ପ୍ରଦାୟମାନେ କେରଳରେ ସମ୍ପୂର୍ଣ୍ଣ ସୁରକ୍ଷିତ ଥିବାବେଳେ କର୍ନାଟକରେ ବ୍ୟାପକ ଆକ୍ରମଣର ସମ୍ମୁଖୀନ ହେଉଛନ୍ତି। ସେ କହିଛନ୍ତି, ’କେରଳ ହେଉଛି ଏକମାତ୍ର ରାଜ୍ୟ ଯେଉଁଠାରେ ସଂଘ ପାରିବାରର ପ୍ରଚାର କାମ କରୁନାହିଁ।