ନିଆମେ,୨୩।୩: ପଶ୍ଚିମ ଆଫ୍ରିକୀୟ ଦେଶ ନାଇଜରର ମାଲି ସୀମାରେ ଥିବା ତାହୁଆ ଅଞ୍ଚଳରେ କେତେକ ଅଜଣା ବନ୍ଧୁକଧାରୀଙ୍କ ଆଖିବୁଜା ଗୁଳିମାଡ଼ରେ ୧୩୭ ଜଣ ସାଧାରଣ ଲୋକଙ୍କ ମୃତ୍ୟୁ ଘଟିଛି। ବାଇକରେ ଆସି ବନ୍ଧୁକଧାରୀମାନେ ଏକାଧିକ ଗାଁରେ ପଶି ଲୋକଙ୍କ ଉପରେ ଗୁଳି ଚାଳନା କରିଛନ୍ତି। ସେମାନେ ୩ ଘଣ୍ଟା ଧରି ଗୁଳି ଚାଳନା କରିଥିଲେ। ଏହାଯୋଗୁ କେତେକ ଗାଁ ଏବେ ଶ୍ମଶାନରେ ପରିଣତ ହୋଇଛି। ତେବେ ଏହି ନରସଂହାର ପଛରେ କାହାର ହାତ ରହିଛି ତାହାର ସୂଚନା ସରକାରଙ୍କୁ ମିଳି ପାରିନାହିଁ। ବର୍ତ୍ତମାନ ସୁଦ୍ଧା କୌଣସି ଆତଙ୍କବାଦୀ ସଂଗଠନ ଏଥି ପାଇଁ ନିଜକୁ ଦାୟୀ ମଧ୍ୟ କରି ନ ଥିବା ସରକାର କହିଛନ୍ତି। ଏହି ଅଞ୍ଚଳରେ କିଛି ଆତଙ୍କବାଦୀ ସଂଗଠନ ସକ୍ରିୟ ରହିଛନ୍ତି। ସେଥିମଧ୍ୟରୁ ଇସଲାମିକ୍ ଷ୍ଟେଟ୍ ପ୍ରତି କିଛି ସଂଗଠନ ନିଜର ଆନୁଗତ୍ୟ ପ୍ରକାଶ କରିଥିବାବେଳେ ଅନ୍ୟ ସଂଗଠନଗୁଡ଼ିକ ଅଲକାଇଦା ସହିତ ଜଡ଼ିତ ରହିଥିବା ସ୍ଥାନୀୟ ପ୍ରଶାସନ ପକ୍ଷରୁ କୁହାଯାଇଛି। ପୂର୍ବରୁ ଏହି ଘଟଣାରେ ୬୦ ଜଣଙ୍କ ମୃତ୍ୟୁ ଘଟିଥିବା ତାହୁଆ ପ୍ରଶାସନ ପକ୍ଷରୁ ସୂଚନା ଦିଆଯାଇଥିଲା। ତେବେ ଏବେ ସରକାରୀ ଭାବେ ମୃତ୍ୟୁ ସଂଖ୍ୟା ୧୩୭ ବୋଲି ପ୍ରକାଶ ପାଇଛି।