ବରୀ,୩ା୧୦(ମହେନ୍ଦ୍ର ସ୍ବାଇଁ): ଗତ ୨୫ ତାରିଖରୁ ରାଜ୍ୟବ୍ୟାପୀ ସରପଞ୍ଚ ସଂଘ ତରଫରୁ ୧୫ ଦଫା ଦାବି ନେଇ ଆନ୍ଦୋଳନ ଜାରି ରହିଛି। ମୁଖ୍ୟତଃ ଗାନ୍ଧୀ ଜୟନ୍ତୀ, ସ୍ବାଧୀନତା ଦିବସ ଓ ସାଧାରଣତନ୍ତ୍ର ଦିବସରେ ପଞ୍ଚାୟତ କାର୍ଯ୍ୟାଳୟରେ ଗ୍ରାମସଭା ହେବ ବୋଲି ନିୟମ ରହିଛି। ସରପଞ୍ଚମାନେ ଆନ୍ଦୋଳନରତ ଥିବାରୁ ବରୀ ବ୍ଲକର ୨୯ ପଞ୍ଚାୟତ କାର୍ଯ୍ୟାଳୟରେ ତାଲା ଝୁଲୁଛି ।ଫଳରେ ଗ୍ରାମସଭା ହୋଇ ନ ଥିବା ସୂଚନା ମିଳିଛି।
ରବିବାର ସ୍ବଚ୍ଛ ଭାରତ ଅଭିଯାନ କାର୍ଯ୍ୟକ୍ରମରେ ସରପଞ୍ଚମାନେ ଯୋଗ ନ ଦେବା ଓ ସୋମବାର ଗ୍ରାମସଭାରେ ସରପଞ୍ଚଙ୍କ ଅନୁପସ୍ଥିତ ଯୋଗୁ ଏହି ଦୁଇ କାର୍ଯ୍ୟକ୍ରମ ହୋଇନାହିଁ । ହେଲେ ବ୍ଲକ ପ୍ରଶାସନ ତରଫରୁ ପଞ୍ଚାୟତ ଦାୟିତ୍ୱରେ ଥିବା ନିର୍ବାହୀ ଅଧିକାରୀମାନେ ସ୍ବଚ୍ଛ ଭାରତ ଅଭିଯାନ ଓ ଗ୍ରାମସେବା କରାଯାଇଛି ବୋଲି ଦାବି କରିଛନ୍ତି । ହେଲେ ବରୀ ବ୍ଲକ ସରପଞ୍ଚ ସଂଘ ତରଫରୁ ମଣ୍ଡଳ ଉନ୍ନୟନ ଅଧିକାରୀଙ୍କୁ ଲିଖିତ ଭାବେ ଏ ସଂକ୍ରାନ୍ତରେ ଅଭିଯୋଗ କରାଯାଇଛି ା ଗ୍ରାମସଭା କି ସ୍ବଚ୍ଛ ଭାରତ ଅଭିଯାନ କାର୍ଯ୍ୟକ୍ରମ ହୋଇନାହିଁ । ମିଥ୍ୟା କାଗଜପତ୍ରରେ ଉପରୋକ୍ତ ୨ଟି କାର୍ଯ୍ୟକ୍ରମ ହୋଇଛି ବୋଲି ଦର୍ଶାଯାଇଛି । ବ୍ଲକ ପ୍ରଶାସନ ଅତ୍ୟନ୍ତ ନିର୍ଲଜ ଭାବେ କାମ କରୁଛି ବୋଲି ସରପଞ୍ଚ ସଂଘର ସଭାପତି ସବିତା ସାମଲ ଓ ସମ୍ପାଦକ ମାନସ ଜେନା କହିଛନ୍ତି ।
ଗ୍ରାମ ପଞ୍ଚାୟତ ଆକ୍ଟ-୭୩ ଅନୁଯାୟୀ ପଞ୍ଚାୟତ ସମସ୍ତ କ୍ଷମତା ସରପଞ୍ଚମାନଙ୍କୁ ପ୍ରଦାନ ନ କରିବା ପର୍ଯ୍ୟନ୍ତ ସରପଞ୍ଚ ସଂଘ ଆନ୍ଦୋଳନରୁ ଓହରିବ ନାହିଁ ବୋଲି ଚେତାବନୀ ଦେଇଛନ୍ତି। ଏ ବିଷୟରେ ସରପଞ୍ଚ ସଂଘର ସଭାପତି ସାମଲ ଓ ସମ୍ପାଦକ ଜେନା କହିଛନ୍ତି, ଆନ୍ଦୋଳନରେ ଥିବାରୁ ସଂଘର ନିଷ୍ପତ୍ତିକୁ ମାନି ସ୍ବଚ୍ଛ ଭାରତ ଅଭିଯାନ ଓ ଗ୍ରାମସଭାରେ ଯୋଗ ଦେଇ ନାହୁଁ । ଅପରପକ୍ଷେ ବରୀ ମଣ୍ଡଳ ଉନ୍ନୟନ ଅଧିକାରୀ ନମିତା ବାରିକ ଫୋନ ନ ଉଠାଇବାରୁ ତାଙ୍କ ପ୍ରତିକ୍ରିୟା ମିଳିପାରି ନାହିଁ ।