ମାଲକାନଗିରି,୪ା୧୨(ଡି.ଏନ୍.ଏ.): ମାଲକାନଗିରି ଜିଲା ମାନଚିତ୍ରରେ ନ ଥିବା ଗାଁ ଚିହ୍ନଟ କରିଛନ୍ତି ତହସିଲଦାର। ଏହି ନୂତନ ଗ୍ରାମ ହେଲା ଖଇରପୁଟ ବ୍ଲକ ରାସବେଡ଼ା ପଞ୍ଚାୟତ ଅଧୀନ ଘାସିଙ୍ଗବେଡ଼ା।
ଗାଁରେ ୭୦ରୁ ଊର୍ଦ୍ଧ୍ୱ ଡିଡାଇ ସମ୍ପ୍ରଦାୟର ଲୋକେ ବସବାସ କରୁଛନ୍ତି। ହେଲେ ଜିଲା ପ୍ରଶାସନର ନଜରରୁ ବହୁ ଦୂରରେ ଥିଲା। କିଛିଦିନ ତଳେ ଖାଇରପୁଟ ତହସିଲଦାର ରାମକୃଷ୍ଣ ନାୟକ ଉକ୍ତ ଗ୍ରାମ ବିଷୟରେ ସୂଚନା ପାଇଥିଲେ। ଶୁକ୍ରବାର ତହସିଲ କର୍ମଚାରୀଙ୍କୁ ନେଇ ସେ ନିଜେ ୧୪ କି.ମି. ଘାଟିରାସ୍ତା ଚଢ଼ି ଘାସିଙ୍ଗବେଡ଼ାରେ ପହଞ୍ଚିଥିଲେ। ପ୍ରଥମ ଥର ପାଇଁ ସରକାରୀ ଅଧିକାରୀଙ୍କୁ ଦେଖି ପାରମ୍ପରିକ ଶୈଳୀରେ ଗ୍ରାମବାସୀ ସ୍ବାଗତ କରିଥିଲେ। ତେବେ ଉକ୍ତ ଗାଁକୁ ରାସ୍ତା ନ ଥିବାବେଳେ କୌଣସି ସରକାରୀ ସୁବିଧା ମଧ୍ୟ ପାଉ ନ ଥିବା ଗ୍ରାମବାସୀ ତହସିଲଦାରଙ୍କୁ ଜଣାଇଥିଲେ। ରାଜ୍ୟ ସରକାର ଡିଡାଇ ଓ ବଣ୍ଡା ସମ୍ପ୍ରଦାୟର ଲୋକଙ୍କ ଉନ୍ନତି ପାଇଁ ଅନେକ ଯୋଜନା କରୁଛନ୍ତି। ହେଲେ ଜିଲା ମାନଚିତ୍ରରେ ନ ଥିବା ଏହି ଗାଁକୁ ବିକାଶ ଅପହଞ୍ଚ ହୋଇଛି। ତହସିଲଦାର ପହଞ୍ଚିବା ପରେ ଏବେ ଗ୍ରାମବାସୀ ବିକାଶର ସ୍ବପ୍ନ ଦେଖିବା ଆରମ୍ଭ କରିଛନ୍ତି।
