ଭୋପାଳ,୬।୭: ଗାଁରେ ବର୍ତ୍ତମାନ ସମୟରେ ରାଜନୈତୀକ ପରିବେଶ ସାଙ୍ଗକୁ କିଭଳି ଭାବେ ଭିନ୍ନ ଧରଣ ପରିବେଶ ସୃଷ୍ଟି ହୁଏ ତାହା ଅଳ୍ପ ବହୁତେ ସମସ୍ତଙ୍କୁ ଜଣାଥିବ। ଏଭଳି ପରିସ୍ଥିତିରେ ଯଦି କେହି ମହିଳା ଶାସନ ଭାର ନେଇଛନ୍ତି ତେବେ ସେ ନିଜେ ନିଜର ସୁରକ୍ଷା ନେବା ଭଲ ବୋଲି କୁହାଯାଉଛି। ଭୋପାଳ ଜିଲା ମୁଖ୍ୟାଳୟରୁ ପ୍ରାୟ ୨୦ କିଲୋମିଟର ଦୂର ବରଖେଡିରେ ଅବଦୁଲ୍ଲା ଗ୍ରାମପଞ୍ଚାୟତ ମହିଳା ସରପଞ୍ଚଙ୍କୁ କିଏ ବା ନ ଚିହ୍ନେ। ଭକ୍ତି ଶର୍ମା ୨୦୧୫-୧୬ରେ ନିଜ ପିତା ଓ ସ୍ଥାନୀୟ ଲୋକଙ୍କ ସହମତିରେ ସରପଞ୍ଚ ପାଇଁ ପ୍ରାର୍ଥିପତ୍ର ଦାଖଲ କରିଥିଲେ। ବିଜୟୀ ମଧ୍ୟ ହୋଇଥିଲେ। ସେ ଆମେରିକାର ଟେକ୍ସାସରେ କାମ କରୁଥିବା ବେଳେ ବାପାଙ୍କ ଅନୁରୋଧ କ୍ରମରେ ସେଠାରୁ ଚାକିରି ଛାଡି ଚାଲି ଆସିଥିଲେ। ଆଉ ଏବେ ସେ ସରପଞ୍ଚ ଭାବେ ତାଙ୍କ ପଞ୍ଚାୟତର ଛବି ଯେମିତି ବଦଳାଇ ଦେଇଛନ୍ତି। ସବୁବେଳେ ନିଜ ସହ ଏକ ପିସ୍ତଲ ବା ଛୋଟ ବନ୍ଧୁକ ନେଇ ବୁଲୁଥିବା ଜ୍ୟୋତି ସର୍ବଦା ସମସ୍ତଙ୍କ ଦୃଷ୍ଟି ଆକର୍ଷଣ କରିଥାଆନ୍ତି। ନିଜ ପଞ୍ଚାୟତରେ ବିଭିନ୍ନ ଉନ୍ନତିମୂଳକ କାମ କରିଥିବା ଜ୍ୟୋତି କୃଷକଙ୍କ ପାଇଁ କିଛି କିଛି ନୂଆ ଯୋଜନା ଆଣିଛନ୍ତି। ଯାହାଦ୍ୱାରା କୃଷକମାନେ ଲାଭାନ୍ବିତ ହେଉଛନ୍ତି। ଭକ୍ତି ରାଜନୀତିରେ ଡିଗ୍ରୀ ହାସଲ କରିଥିବା ବେଳେ ଏବେ ଓକିଲାତି କରୁଛନ୍ତି। ସେ ନିଜ ପାଖରେ ପିସ୍ତଲ ରଖିବା ସହ ଟ୍ରାକ୍ଟର ମଧ୍ୟ ଚଲାଇ ଜାଣନ୍ତି। ଆଉ ତାଙ୍କର ଉତ୍ତମ ବ୍ୟବହାର ପାଇଁ ସେ ଯେ କୌଣସି ଅଧିକାରୀଙ୍କ ସହ ବିନା ଦ୍ୱିଧାରେ କଥାବାର୍ତ୍ତା କରି ପାରନ୍ତି ବୋଲି କୁହାଯାଏ। ମହିଳା ହୋଇ ମଧ୍ୟ ପୁରୁଷଙ୍କ ଭଳି ତାଙ୍କ ଆଚାର ବ୍ୟବହାର ସମସ୍ତଙ୍କ ଦୃଷ୍ଟି ଆକର୍ଷଣ କରିଥାଏ। ସରପଞ୍ଚ ହେବା ପରେ ଭକ୍ତି ପ୍ରଥମେ ଗାଁରେ ଝିଅ ଜନ୍ମ ହେଲେ ୧୦ଟି ଗଛ ଲଗାଇବା ସହ ନିଜ ଦୁଇ ମାସର ଦରମା ଉକ୍ତ ଶିଶୁର ମା’ଙ୍କୁ ପ୍ରଦାନ କରିବାକୁ ଘୋଷଣା କରି ସମସ୍ତଙ୍କ ପାଇଁ ଉଦାହରଣ ସୃଷ୍ଟି କରିଛନ୍ତି। ତାଙ୍କ ପଞ୍ଚାୟତରେ ପ୍ରାୟ ସମସ୍ତଙ୍କର ରାଶନ କାର୍ଡ, ବ୍ୟାଙ୍କ ଆକାଉଣ୍ଟ ଓ ହେଲ୍ଥ କାର୍ଡ ଥିବା କୁହନ୍ତି ଭକ୍ତି। ଏବେ ତାଙ୍କ ପଞ୍ଚାୟତ ମଧ୍ୟ ଅନ୍ୟମାନଙ୍କ ପାଇଁ ପ୍ରେରଣା ପାଲଟି ଯାଇଛି।
