ଆଜିକାଲି ଲୋକମାନେ ଚପଲ ବିନା ଗୋଟିଏ ପାଦ ମଧ୍ୟ ଚାଲିପାରିବେ ନାହିଁ, କିନ୍ତୁ ଆପଣ ସବୁଦିନ ପାଇଁ ଜୋତା ଏବଂ ଚପଲ ବିନା ବଞ୍ଚିପାରିବେ କି? ବୋଧ୍ହୁଏ ଆପଣ ଏହାକୁ କଳ୍ପନା ମଧ୍ୟ କରିପାରିବେ ନାହିଁ। କିନ୍ତୁ ଭାରତରେ ଏପରି ଏକ ଗାଁ ଅଛି, ଯେଉଁଠାରେ ଚପଲ ପିନ୍ଧିବା ସମ୍ପୂର୍ଣ୍ଣ ନିଷେଧ। ଏହା ବିଶ୍ୱାସ ନ ହେଲେ ମଧ୍ୟ ସତ।
ଏପରି ଗାଁ ଭାରତର ତାମିଲନାଡୁରେ ରହିଛି। ଏହା ତାମିଲନାଡୁର ପ୍ରସିଦ୍ଧ ସହର ମଦୁରାଇଠାରୁ ୨୦ କିଲୋମିଟର ଦୂରରେ ଅବସ୍ଥିତ କଲିମାୟନ ଗାଁ। ଏହି ଗାଁର ଲୋକମାନେ ନିଜ ପିଲାମାନଙ୍କୁ ଚପଲ ଏବଂ ଜୋତା ପିନ୍ଧିବାକୁ ମଧ୍ୟ ଦିଅନ୍ତି ନାହିଁ। ଯଦି ଏହି ଗାଁର କେହି ଭୁଲ୍ରେ ଜୋତା କିମ୍ବା ଚପଲ ପିନ୍ଧନ୍ତି, ତେବେ ତାଙ୍କୁ କଠୋର ଦଣ୍ଡ ଦିଆଯାଏ।
କୁହାଯାଏ, ଏହି ଗାଁର ଲୋକମାନେ ଶତାବ୍ଦୀ ଧରି ‘ଆପାଛି’ ନାମକ ଦେବତାଙ୍କୁ ପୂଜା କରିଆସୁଛନ୍ତି। ସେମାନେ ବିଶ୍ୱାସ କରନ୍ତି ଯେ, କେବଳ ଏହି ଦେବତା ସେମାନଙ୍କୁ ସୁରକ୍ଷା ଦିଅନ୍ତି। ସେମାନଙ୍କର ଦେବତାଙ୍କ ଉପରେ ବିଶ୍ୱାସ ଥିବାରୁ ଗାଁ ସୀମା ଭିତରେ ଜୋତା ଏବଂ ଚପଲ ପିନ୍ଧିବାକୁ ବାରଣ କରାଯାଇଛି।
ଜାଣି ଆଶ୍ଚର୍ଯ୍ୟ ହେବେ ଏହି ଗାଁରେ ରହୁଥିବା ଲୋକମାନେ ଶତାବ୍ଦୀ ଧରି ଏହି ଅଦ୍ଭୁତ ପରମ୍ପରାକୁ ଅନୁସରଣ କରି ଆସୁଛନ୍ତି। ଯଦି କାହାକୁ ବାହାରକୁ ଯିବାକୁ ପଡ଼େ, ସେ ହାତରେ ଜୋତା ଏବଂ ଚପଲ ନେଇ ଗାଁର ସୀମା ସରିବା ପରେ ପିନ୍ଧନ୍ତି। ଯେବେ ଫେରନ୍ତି ପୁଣି ଗାଁ ସୀମା ପୂର୍ବରୁ ଚପଲ କାଢ଼ି ଆସନ୍ତି।
ଏହି ପରମ୍ପରା କେବେଠାରୁ ଚାଲିଆସିଛି ସେ ବିଷୟରେ କେହି ଜାଣି ନାହାନ୍ତି, ମାତ୍ର ଏଠାକାର ଲୋକମାନେ ବିଶ୍ୱାସ କରନ୍ତି ଯେ ଏହି ଗାଁର ଲୋକମାନେ ବହୁ ପିଢ଼ି ଧରି ଏହି ପରମ୍ପରାକୁ ଅନୁସରଣ କରୁଛନ୍ତି। ଏଠାକାର ପିଲାମାନେ ମଧ୍ୟ ଖାଲି ପାଦରେ ସ୍କୁଲ ଯାଆନ୍ତି। ଚପଲ ନାଁ ଶୁଣିଲେ ଲୋକେ ରାଗିଯାଆନ୍ତି।