ଜେନାପୁର,୧୪ା୪(ଡି.ଏନ.ଏ.): ବିଶୁଦ୍ଧ ପାନୀୟ ଜଳ ପ୍ରତି ଗ୍ରାମକୁ ପହଞ୍ଚାଇବା ପାଇଁ କେନ୍ଦ୍ର ଓ ରାଜ୍ୟ ସରକାର ବିପୁଳ ଟଙ୍କା ଖର୍ଚ୍ଚ କରୁଛନ୍ତି। ଏଥିରେ ପାନୀୟ ଜଳ ପ୍ରକଳ୍ପ ଓ ସୋଲାର ପାଣି ଟାଙ୍କି ନିର୍ମାଣ କରାଯାଉଛି। ହେଲେ ଏସବୁ ପ୍ରକଳ୍ପ ଥାଇ ମଧ୍ୟ ଲୋକଙ୍କୁ ଠିକ୍ରେ ପିଇବା ପାଣି ମିଳି ପାରୁନାହିଁ। ଏପରି ଦୃଶ୍ୟ ଦେଖିବାକୁ ମିଳିଛି ଧର୍ମଶାଳା ବ୍ଲକ ତାଳଜଙ୍ଗ ପଞ୍ଚାୟତ ଅଧୀନ ବଳରାମପୁର ୯ ନମ୍ବର ୱାର୍ଡର ପଥୁରିଆ ସାହି ଗ୍ରାମରେ। ଏଠାରେ ୪-୫ ବର୍ଷ ହେଲା ସୌରଚାଳିତ ପାଣି ପମ୍ପ ଅଚଳ ହୋଇ ପଡ଼ିରହିଛି। ପାହାଡ଼ ପାଦଦେଶରେ ଗାଁ ରହିଥିବାରୁ ଗ୍ରୀଷ୍ମଦିନରେ ନଳକୂପରୁ ପାଣି ବାହାରୁ ନାହିଁ। ଯେତିକି ବାହାରୁଛି ତାହା ସମୁଦ୍ରକୁ ଶଙ୍ଖେ ସଦୃଶ୍ୟ ହୋଇଛି। ଅନ୍ୟ ଏକ ନଳକୂପ ଖୋଳା ଯାଇଥିଲେ ମଧ୍ୟ ତାହା ଅଧାପନ୍ତରିଆ ହୋଇ ରହିଛି। ଏପଟେ ଲକ୍ଷଲକ୍ଷ ଟଙ୍କାର ପ୍ରକଳ୍ପ ଖତ ଖାଇବାକୁ ବସିଲାଣି। ଏହି ଗ୍ରାମରେ ଦୁଇ ଶହରୁ ଅଧିକ ଲୋକ ବସବାସ କରନ୍ତି। ଗ୍ରୀଷ୍ମଦିନରେ ଜଳ ସଙ୍କଟ ଦେଖା ଦେବାରୁ ଗ୍ରାମବାସୀ ଏକ ପୋଖରୀ ଉପରେ ନିର୍ଭର କରୁଛନ୍ତି। ହେଲେ ଉକ୍ତ ଜଳ ବ୍ୟବହାର କରିବା ଦ୍ୱାରା ଲୋକେ ବିଭିନ୍ନ ରୋଗରେ ପୀଡ଼ିତ ହେଉଥିବା ଦେଖିବାକୁ ମିଳୁଛି। ଗ୍ରାମବାସୀ ପାନୀୟ ଜଳ ପ୍ରକଳ୍ପ ମରାମତି ପାଇଁ ବିଭାଗୀୟ ଅଧିକାରୀଙ୍କୁ ଜଣାଇଥିଲେ ମଧ୍ୟ କୌଣସି ସୁଫଳ ମିଳୁନାହିଁ। ତେଣୁ ଉଚ୍ଚ କର୍ତ୍ତୃପକ୍ଷ ତୁରନ୍ତ ଏହା ଉପରେ ପଦକ୍ଷେପ ନେବାକୁ ଦାବି ହୋଇଛି। ଏ ସଂକ୍ରାନ୍ତରେ ବିଭାଗୀୟ ଯନ୍ତ୍ରୀ ରୁଦ୍ରନାରାୟଣ ସେଠୀଙ୍କୁ ପଚାରିବାରୁ ସେ କହିଛନ୍ତି, ସୌରଚାଳିତ ପ୍ରକଳ୍ପ ମରାମତି ପାଇଁ କାରିଗରଙ୍କୁ ଡକାଯାଇଛି। ଖୁବ୍ଶୀଘ୍ର ଏହାର ମରାମତି କରାଯିବ।