ନୂଆପଡ଼ା ଅଫିସ,୭।୧୧:କେନ୍ଦ୍ର ଓ ରାଜ୍ୟ ସରକାର ଅନେକ ଯୋଜନା କରିଛନ୍ତି। ଏହିସବୁ ଯୋଜନା ଲୋକଙ୍କ ପାଖରେ ପହଞ୍ଚଇବା ପାଇଁ ପଞ୍ଚାୟତରୁ ଜିଲାସ୍ତର ପର୍ଯ୍ୟନ୍ତ ଅଧିକାରୀ ଓ କର୍ମଚାରୀ ନିଯୁକ୍ତ ହୋଇଛନ୍ତି। ସେମାନଙ୍କ ଅବହେଳା ଯୋଗୁ ସବୁ ଯୋଜନା ଫେଲ ହୋଇଯାଉଛି। ଶିକ୍ଷା, ସ୍ବାସ୍ଥ୍ୟ, ଗମନା ଗମନା ଉପରେ ସରାକାର ଅଧିକ ଗୁରୁତ୍ୱ ଦେଇ ଯୋଜନା ପ୍ରଣୟନ କରୁଥିବା ବେଳେ ତାହା ଉପାନ୍ତ ଆଦିବାସୀ ଅଞ୍ଚଳଗୁଡିକୁ ପହଞ୍ଚତ୍ ପାରୁନାହିଁ। ସ୍ବାଧୀନତାର ଦୀର୍ଘ ବର୍ଷ ପରେ ମଧ୍ୟ ନୂଆପଡା ସଦର ବ୍ଲକ ଭାନପୁର ପଞ୍ଚାୟତ ଟିକରପଡାବାସୀ ମୌଳିକ ସୁବିଧାରୁ ବଞ୍ଚତ୍ତ ହେଉଛନ୍ତି। ୩୦୦ରୁ ଊର୍ଦ୍ଧ୍ୱ ଜନସଂଖ୍ୟ ବିଶିଷ୍ଟ ଗାଁରେ ୩୦ରୁ ଊର୍ଦ୍ଧ୍ୱ ଆଦିବାସୀ ପରିବାର ବାସ କରନ୍ତି। ଗାଁରେ ଅଙ୍ଗନୱାଡି କେନ୍ଦ୍ର ନ ଥିବାରୁ କୁନିକୁନି ପିଲାମାନେ ପ୍ରାକ ଶିକ୍ଷାରୁ ବଞ୍ଚତ୍ତ ହେଉଛନ୍ତି। ଯେଉଁଠାରୁ ପିଲାଙ୍କ ପ୍ରାକ୍ ଶିକ୍ଷା ଆରମ୍ଭ ହୋଇଥାଏ। ତାହା ହେଉ ନାହିଁ କିମ୍ବା ପୁଷ୍ଟିକର ଖାଦ୍ୟ ପାଉନାହାନ୍ତି। ଅପୁଷ୍ଟିକର ରୋଗର ଶିକାର ହେବାର ଆଶଙ୍କା ରହିଛି। ଗାଁକୁ ଯିବା ପାଇଁ ଭଲ ରାସ୍ତା ନାହିଁ। ଯିବା ବାଟରେ ଏକ ନାଳା ପଡେ। ଖରାଦିନେ ଚଳିଯାଏ। ହେଲେ ବର୍ଷାଦିନରେ ନାଳରେ ବହୁତ ପାଣି ବୋହୁଥିବାରୁ ଅସୁବିଧାର ସମ୍ମୁଖୀନ ହୋଇଥାନ୍ତି ପଡ଼ାବାସୀ। ଏହି ରାସ୍ତା ଦେଇ କୌଣସି ଯାନବାହନ ଯିବା କଷ୍ଟକର। କୌଣସି ଲୋକ ରୋଗରେ ପଡିଲେ, ଖଟିଆରେ କିମ୍ବା ଭାରରେ ବୋହି ନାଳ ପାର କରିବାକୁ ପଡିଥାଏ। ନାଳା ପାର ହେବା ପରେ ଗାଡିରେ ଚିକିତ୍ସାଳୟକୁ ନେଇଥାନ୍ତି। ଏହି ଅସୁବିଧା ଯୋଗୁ ଅନେକ ଜୀବନ ଚାଲି ଗଲାଣି ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ଗାଁରେ ଅନେକ ବୃଦ୍ଧା, ବୃଦ୍ଧ, ଦିବ୍ୟାଙ୍ଗ, ବିଧବା ଥାଇ ମଧ୍ୟ ଭତ୍ତା ପାଇବାରୁ ବଞ୍ଚତ୍ତ ହୋଇରହିଛନ୍ତି। ଗାଁରେ ଅଙ୍ଗନୱାଡି କେନ୍ଦ୍ର, ସବୁ ଦିନିକିଆ ପକ୍କା ରାସ୍ତା, ନାଳ ଉପରେ ପୋଲ ପାଇଁ ବାରମ୍ବାର ଦାବି କରିବା ପରେ ମଧ୍ୟ କୌଣସି ପଦାଧିକାରୀ ଗୁରୁତ୍ୱ ଦେଉନାହାନ୍ତି। ଏଥିପାଇଁ ଅସୁବିଧାର ସମ୍ମୁଖିନ ହେବାକୁ ପଡୁଛି ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ଏ ସଂକ୍ରାନ୍ତରେ ଜିଲାପାଳ ହେମାକାନ୍ତ ସାଏଙ୍କୁ ପଚାରିବାରୁ ଆମେ ସରକାରଙ୍କ ସମସ୍ତ ଯୋଜନା ଲୋକ ପାଖକୁ ପହଞ୍ଚାଇବା ପାଇଁ ଚେଷ୍ଟା କରୁଛୁ। ଆଗାମୀ ଦିନରେ ସମସ୍ତ ସମସ୍ୟାର ସମାଧାନ କରାଯିବ ବୋଲି କହିଛନ୍ତି।