ଦଶମନ୍ତପୁର, ୨୭ା୨ ( ଡି.ଏନ.ଏ.):କୋରାପୁଟ ଜିଲ୍ଲା ଦଶମନ୍ତପୁର ବ୍ଲକ ଅନ୍ତର୍ଗତ ଡୁମ୍ବାଗୁଡ଼ା ପଞ୍ଚାୟତ ଭିତରବାଗ୍ରି ଗ୍ରାମରେ ଗ୍ରାମବାସୀ ନିଜ ଅଞ୍ଚଳରେ କୌଣସି କାମ ନ ପାଇ ଶେଷରେ ଭିଟାମାଟି ଛାଡ଼ି ବାହାର ରାଜ୍ୟକୁ ଦାଦନ ଖଟିବାକୁ ଯାଉଥିବା ଦେଖିବାକୁ ମିଳୁଛି। ଏହି ଗ୍ରାମରେ ୩୦ରୁ ଊର୍ଦ୍ଧ୍ୱ ଆଦିବାସୀ ପରିବାର ବସବାସ କରନ୍ତି। ସେମାନଙ୍କ ମୁଖ୍ୟ ଜୀବିକା ପଡୁ ଚାଷ କରି ଚଳିଥାନ୍ତି। ଦୀର୍ଘ ବର୍ଷ ଧରି ଗ୍ରାମରେ ସେମାନଙ୍କୁ କିଛି କାମ ନମିଳିବାରୁ କ୍ରମେ ପରିବାର ଚଳାଇବା ସେମାନଙ୍କ ପକ୍ଷରେ କଷ୍ଟକର ହୋଇପଡିଲା। କେତେକ ଗ୍ରାମବାସୀ ଜଣେ ଠିକାଦାରଙ୍କ ଅଧୀନରେ କିଛି କାର୍ଯ୍ୟ କରି ପାରିଶ୍ରମିକ ପାଇଲେ ନାହିଁ। ଶେଷରେ ସେମାନେ ଭିଟାମାଟି ଛାଡ଼ି ଦାଦନ ଖଟିବାକୁ ଆନ୍ଧ୍ର ପ୍ରଦେଶର ବିଶାଖାପାଟଣାକୁ ଦାଦନ ଖଟିବାକୁ ଯାଇଛନ୍ତି। ଆମକୁ କାମ କରି ପାରିଶ୍ରମିକ ନ ମିଳିବାରୁ ବାଧ୍ୟ ହୋଇ ଗ୍ରାମ ଛାଡିଲୁ ବୋଲି ଗ୍ରାମର ସାଦୁ ସାଉଁନ୍ତା, ଈଶ୍ୱର ମୁଦୁଲି, ଉପେନ୍ଦ୍ର ସାଉଁନ୍ତା, ଲୁକିଆ ଜାନି, ପୂର୍ଣ୍ଣ ସାଉଁନ୍ତା, କାଳିଆ ପରଜା, ଲବି ହିକକା ପ୍ରମୁଖ କହିଛନ୍ତି। ଏଥିପ୍ରତି ଜିଲା ପ୍ରଶାସନ ଦୃଷ୍ଟି ଦେଇ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି।