କେନ୍ଦୁଝର,୩୦।୪(ସ୍ବ.ପ୍ର.): କେନ୍ଦୁଝର ଜିଲା ବାଂଶପାଳ ବ୍ଲକ ଅଧୀନ କରଙ୍ଗାଡିହି ଗ୍ରାମର ରଙ୍ଗାଧର ମହାକୁଡଙ୍କ ପୁଅ ଫକିର ମହାକୁଡ(୮) ମୃତ୍ୟୁର କାରଣ ଅଦ୍ୟାବଧି ଜଣାପଡିନାହିଁ। ଏଭଳିସ୍ଥିତିରେ ପୋଲିସ ଅଭିଯୁକ୍ତଙ୍କୁ ଧରିବାରେ ବିଫଳ ହେଉଥିବାରୁ ଗ୍ରାମବାସୀ ଅସନ୍ତୋଷ ପ୍ରକାଶ କରିଆସୁଥିଲେ। ଫକିରଙ୍କୁ ହତ୍ୟା କରାଯାଇଥିବା ଏବଂ ଏହା ପଛରେ ଗ୍ରାମର କେତେକ ବ୍ୟକ୍ତି ସମ୍ପୃକ୍ତିକୁ ନେଇ ଗ୍ରାମବାସୀ ସନ୍ଦେହ ପ୍ରକଟ କରିଥିଲେ। ରବିବାର ଗ୍ରାମବାସୀ ସନ୍ଦେହ କରୁଥିବା ମୃତ ଶିଶୁଙ୍କ ବାପା ଓ ଅନ୍ୟ ଜଣେ ପଡୋଶୀଙ୍କୁ ଅଟକ ରଖି ପୋଲିସ ଜିମା ଦେଇଥିଲେ। ଏନେଇ ଗାଁରେ ଉତ୍ତେଜନା ପରିସ୍ଥିତି ସୃଷ୍ଟି ହୋଇଥିଲା। ଖବର ପାଇ ପୋଲିସ ପହଞ୍ଚି ଅଟକ ଦୁଇ ଜଣଙ୍କୁ ଉଦ୍ଧାର କରି ଥାନାକୁ ନେଇ ଅଧିକ ପଚରାଉଚରା କରୁଛି।
ଗ୍ରାମବାସୀ ରବିବାର ସକାଳେ ମୃତ ନାବାଳକଙ୍କ ପିତା ରଙ୍ଗାଧର ଏବଂ ପଡୋଶୀ ବିଦ୍ୟାଧର ଦେହୁରୀଙ୍କୁ ଗାଁ ମଣ୍ଡପ ଅସମ୍ପୂର୍ଣ୍ଣ ଏକ ପିଲାରରେ ବାନ୍ଧି ଅଟକ ରଖି ପୋଲିସକୁ ସୂଚନା ଦେଇଥିଲେ। ଖବର ପାଇ କାଞ୍ଜିପାଣି ପୋଲିସ ଘଟଣା ସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରିଥିଲା।
ସୂଚନା ଯୋଗ୍ୟ, ରଙ୍ଗାଧାରଙ୍କ ସ୍ତ୍ରୀଙ୍କ ମୃତ୍ୟୁ ପରେ କିଛି ମାସ ତଳେ ପୁଣି ଜଣେ ମହିଳାଙ୍କୁ ବିବାହ କରିଥିଲେ। ଏନେଇ ପୁଅକୁ ମାରି ଦେଇଥିବା ଗ୍ରାମବାସୀ ସନ୍ଦେହ କରୁଥିଲେ। ଏ ରବିବାର ଗ୍ରାମବାସୀ ନାବାଳକଙ୍କ ପିତା ରଙ୍ଗାଧର ଏବଂ ପଡୋଶୀ ବିଦ୍ୟାଧରଙ୍କୁ ଅଟକ ରଖିଥିଲେ। ଏପରିକି ମୃତ ନାବାଳଙ୍କ ସାବତ ମା’ଙ୍କୁ ମଧ୍ୟ ପୋଲିସ ଜିମା ଦେଇଥିଲେ।
ପ୍ରକାଶ ଯେ, ନିଖୋଜ ହେବାର ୩ ଦିନ ପରେ ନାବାଳକ ଫକିରଙ୍କ ଗଳିତ ମୃତଦେହ ଘରଠାରୁ ପ୍ରାୟ ୫୦୦ମିଟର ଦୂରରୁ ଜବତ ହୋଇଥିଲା। ଏନେଇ କରଙ୍ଗାଡିହି ସରପଞ୍ଚ ବରୁଣ ଦେହୁରୀ ପୋଲିସକୁ ଖବର ଦେଇଥିଲେ। ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇ ପଠାଇଥିଲ। ସେତିକିବେଳେ ବାପା ରଙ୍ଗାଧର ପୁଅଙ୍କୁ ବଳି ପାଇଁ ହତ୍ୟା କରାଯାଇଥିବା ଅଭିଯୋଗ କରିଥିଲେ।
ଅନ୍ୟପକ୍ଷେ ନାବାଳକଙ୍କ ଦେହର ପିଠି ଭାଗରେ ଗଭୀର ଆଘାତ ଲାଗି ଥିବାରୁ ଏହା ସୁପରିକଳ୍ପତି ହତ୍ୟାକାଣ୍ଡ ବୋଲି ଅଭିଯୋଗ ହୋଇଥିଲା। ଏନେଇ କାଞ୍ଜିପାଣି ପୋଲିସ ଏକ ମାମଲା(ନଂ.୩୬/୨୩) ରୁଜୁ କରିଥିଲା। ଘଟଣା ସମ୍ପର୍କରେ କାଞ୍ଜିପାଣି ଥାନା ଅଧିକାରୀ ସେଖ୍ ଆଜାରୁଦ୍ଦିନଙ୍କୁ ପଚାରିବାରୁ ଗ୍ରାମବାସୀଙ୍କଠାରୁ ୨ଜଣଙ୍କୁ ପୋଲିସ ଉଦ୍ଧାର କରି ତଦନ୍ତ କରୁଥିବା କହିଛନ୍ତି।