ଭୁବନେଶ୍ୱର,୨୬।୧୦: ବିଧାନସଭା ସମ୍ମୁଖ ଲୋୟର ପିଏମ୍ଜି ଧାରଣାସ୍ଥଳରେ ପୁଣି ଏକାଠି ହେଲେ ଗାଁସାଥୀ। ଗାଁସାଥୀ(ମେଟ୍) କମିଟି ସଂଘ ମିଳିତ କ୍ରିୟାନୁଷ୍ଠାନ କମିଟି ଓଡିଶା ପ୍ରଦେଶର ଶତାଧିକ କର୍ମକର୍ତ୍ତା ଓ ସଭ୍ୟାସଭ୍ୟ ଆନ୍ଦୋଳନରେ ସାମିଲ ହୋଇଛନ୍ତି। ପର୍ଯ୍ୟାପ୍ତ ନିଯୁକ୍ତିର ଅଭାବ ଓ ଆର୍ଥିକ ଅନଟନକୁ ସହ୍ୟ କରି ନ ପାରି ସୋମବାର ସେମାନେ ପାଟିରେ ଘାସ ଚୋବାଇ ସରକାରଙ୍କୁ ଦାବି ଜଣାଇଛନ୍ତି।
ରାଜ୍ୟ ସାଧାରଣ ସମ୍ପାଦକ ଲକ୍ଷ୍ମୀଧର ବିଶ୍ୱାଳ କହିଛନ୍ତି, କୋଭିଡ୍ ସହାୟତା, ମାସିକ ପ୍ରୋତ୍ସାହନ, ମାସକୁ ୧୦ଦିନର ଗ୍ୟାରେଣ୍ଟି ପାଉଣା ସହ କାମ, ଜବ୍କାର୍ଡଧାରୀଙ୍କ ନିଶ୍ଚିତ କର୍ମଯୋଗାଣ ବର୍ଷକୁ ୧୦୦ ଦିନ ପରିବର୍ତ୍ତେ ୨୦୦ ଦିନ, ଦୈନିକ ମଜୁରି ବୃଦ୍ଧି ପାଇଁ ସଂଘ ଦାବି କରି ଆସୁଛି। ଏନେଇ ଗତ ସେପ୍ଟେମ୍ବର ୭ରେ ପଞ୍ଚାୟତିରାଜ ମନ୍ତ୍ରୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ବିଭାଗୀୟ ଶାସନ ସଚିବ ଓ ନିର୍ଦ୍ଦେଶକ ଏବଂ ସଂଘ ପ୍ରତିନିଧିଙ୍କ ମଧ୍ୟରେ ଆଲୋଚନା ହୋଇଥିଲା। ମନ୍ତ୍ରୀ ଏଥିପାଇଁ ୧୫ ଦିନ ସମୟ ନେଇଥିଲେ। ମନ୍ତ୍ରୀ, ସଚିବଙ୍କୁ ବାରମ୍ବାର ଜଣାଇଲେ ମଧ୍ୟ ଏଯାଏ ଦାବି ପୂରଣ କରାଯାଉ ନ ଥିବାରୁ ସଂଘ ବିଧାନସଭା ଆଗରେ ଅନିର୍ଦ୍ଦିଷ୍ଟ କାଳ ପାଇଁ ଆନ୍ଦୋଳନ ଜାରି ରଖିବ ବୋଲି ସେ ପ୍ରକାଶ କରିଛି। ଦାବି ପୂରଣ ନ ହେବା ଯାଏ ନଭେମ୍ବର ୨୪ ପର୍ଯ୍ୟନ୍ତ ଏପରି ଅନ୍ଦୋଳନ ଜାରି ରହିବ ସଂଘ ଜଣାଇଛି। ଧାରଣାସ୍ଥଳରେ ଗାଁସାଥୀ ସଙ୍ଗଠକ ଲକ୍ଷ୍ମୀଧର ବିଶ୍ୱାଳ, ସୌଭାଗ୍ୟ ମିଶ୍ର, କୁଳମଣି ମେଣ୍ଟା, ରବୀନ୍ଦ୍ର ଗୌଡଙ୍କ ସମେତ ବଲାଙ୍ଗୀର ଜିଲାର ବ୍ଲକ ଓ ସମସ୍ତ ପଞ୍ଚାୟତର ଗାଁସାଥୀ(ମେଟ୍) ସଙ୍ଗଠକମାନେ ଉପସ୍ଥିତ ଥିଲେ।