ବାସୁଦେବପୁର, ୨୭।୫(ଡି.ଏନ.ଏ.): ଫେସ୍ବୁକରୁ ପ୍ରେମ ଓ ପରେ ବିବାହ। ଜଣେ ଛଦ୍ମବେଶୀ ଯୁବକଙ୍କୁ ମହଙ୍ଗା ପଡ଼ିଛି ପ୍ରେମ କରିବା କିଛି ଏଭଳି ଦୃଶ୍ୟ ଦେଖିବାକୁ ମିଳିଛି କେନ୍ଦ୍ରାପଡ଼ା ଜିଲାରେ। ସୂଚନାଯୋଗ୍ୟ, ଜମ୍ବୁ ରାମନଗର ଗ୍ରାମର ମେଘନା ଓରଫ ମେଘନାଦ ମଣ୍ଡଳ ନିଜକୁ ଯୁବତୀ ପରିଚୟ ଦେଇ ଫେସ୍ବୁକରେ ପଶ୍ଚିମବଙ୍ଗର ଉତ୍ତରଚବିଶପ୍ରଗଣା ଜିଲାର ଆଲୋକ ମିସ୍ତ୍ରୀଙ୍କୁ ପ୍ରେମ ଜାଲରେ ଫସାଇଥିଲେ। ପରେ ଉଭୟ ବିବାହ କରିବାକୁ ନିଷ୍ପତ୍ତି ନେଇଥିଲେ। ଗତ କିଛି ଦିନ ତଳେ ଆଲୋକ ତାଙ୍କର ସମ୍ପର୍କୀୟଙ୍କୁ ଧରି କେନ୍ଦ୍ରାପଡ଼ାରେ ପହଞ୍ଚିଥିଲେ। ଠିକଣା ସ୍ଥାନରେ ଛଦ୍ମବେଶୀ ଯୁବକ ମେଘନାଦ ଝିଅ ବେଶରେ ସଜ୍ଜିତ ହୋଇ ମେଘନା ପରିଚୟ ଦେଇ ଆଲୋକଙ୍କ ସହିତ ପଳାଇ ଆସିଥିଲେ। ଉଭୟ ଆଲୋକ ମେଘନା ନବବିବାହିତ ବର କନ୍ୟା ହୋଇ ବାସୁଦେବପୁରର କଷିଆ ଗ୍ରାମର ଆଲୋକଙ୍କ ସମ୍ପର୍କୀୟଙ୍କ ଘରେ ଗତ ୨୫ତାରିଖରେ ପହଞ୍ଚିଥିଲେ। ହେଲେ ୨୬ ତାରିଖରେ ଛଦ୍ମବେଶୀ କନ୍ୟା ସାଜିଥିବା ମେଘନା ଯୁବତୀ ନୁହେଁ ଜଣେ ଯୁବକ ବୋଲି ଜଣାପଡ଼ିଥିଲା। ତେବେ କେଉଁ ଉଦ୍ଦେଶ୍ୟରେ ସେ ଯୁବତୀ ବେଶ ହୋଇ ବିବାହ କରିଥିଲେ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇପାରିନାହିଁ। ଏହି ଘଟଣା ଜଣାପଡ଼ିବା ପରେ ଗାଁ ଲୋକ ଓ ଆଲୋକର ସମ୍ପର୍କୀୟମାନେ ମେଘନାଙ୍କ ପୋଷାକ ଫାଡ଼ି ନିସ୍ତୁକ ମାଡ଼ ମାରିବା ସହିତ ତାଙ୍କ ଲମ୍ବାଚୁଟିକୁ କାଟି ଦେଇଛନ୍ତି। ତେବେ ଛଦ୍ମବେଶୀ କନ୍ୟାର ଏପରି ରୂପ ଦେଖି ବର ସାଜିଥିବା ପ୍ରେମିକ ଆଲୋକ ମିସ୍ତ୍ରୀ ମଧ୍ୟ ନିରାଶ ହୋଇଛନ୍ତି। ଘଟଣାସ୍ଥଳରେ କଷିଆ ପୋଲିସ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି।
