ପଟ୍ଟାମୁଣ୍ଡାଇ,୧୨।୩(ସ୍ବ.ପ୍ର.): ସରକାର ଗ୍ରାମପଞ୍ଚାୟତ ଲୋକମାନଙ୍କୁ ସ୍ବାସ୍ଥ୍ୟସେବା ଯୋଗାଇ ଦେବା ପାଇଁ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଓ ଏଏନ୍ଏମ୍ କେନ୍ଦ୍ର ସ୍ଥାପନ କରିଛନ୍ତି। ଲୋକଙ୍କୁ ନିଜ ଘର ପାଖରେ ଉପଯୁକ୍ତ ସ୍ବାସ୍ଥ୍ୟସେବା ଯୋଗାଇ ଦେବା ପାଇଁ ଏହି ବ୍ୟବସ୍ଥା କରାଯାଇଛି। ହେଲେ ଦାୟିତ୍ୱରେ ଥିବା କେତେଜଣ ବିଭାଗୀୟ ଅଧିକାରୀ ଓ କର୍ମଚାରୀଙ୍କ ଦାୟିତ୍ୱହୀନ କାର୍ଯ୍ୟାନୁଷ୍ଠାନ ଯୋଗୁ ଲୋକମାନେ ପ୍ରାଥମିକ ସ୍ବାସ୍ଥ୍ୟସେବା ପାଇବାରୁ ବଞ୍ଚତ୍ତ ହେଉଛନ୍ତି। ସରକାରଙ୍କ ପକ୍ଷରୁ ଲୋକଙ୍କ ଚିକିତ୍ସା ନିମନ୍ତେ ଆବଶ୍ୟକ ଔଷଧ, ସ୍ବାସ୍ଥ୍ୟ ବିଭାଗ ବା ଏଏନ୍ଏମ୍ କେନ୍ଦ୍ରର କର୍ମଚାରୀଙ୍କ ରହିବା ପାଇଁ ଗୃହ ଓ ଅନ୍ୟାନ୍ୟ ସମସ୍ତପ୍ରକାର ସୁବିଧା ସୁଯୋଗ ଯୋଗାଇ ଦିଆଯାଇଛି। ହେଲେ ପ୍ରାଥମିକ ଚିକିତ୍ସା ସେବା ପାଇବାରୁ ଗ୍ରାମବାସୀ ବଞ୍ଚତ୍ତ ହେଉଥିବା ଅଭିଯୋଗ ହୋଇଛି।
ଏଠାରେ ପଟ୍ଟାମୁଣ୍ଡାଇ ବ୍ଲକର ଖଡ଼ଇଣ୍ଟା ଗ୍ରାମ ପଞ୍ଚାୟତକୁ ଉଦାହରଣ ଭାବେ ନିଆଯାଇଛି । ଉକ୍ତ ପଞ୍ଚାୟତର ୬ ଖଣ୍ଡ ଗ୍ରାମର ଲୋକେ ଖଡିଅଣ୍ଟା ଏଏନ୍ଏମ୍ କେନ୍ଦ୍ର ଉପରେ ନିର୍ଭର କରନ୍ତି। ଏହି କେନ୍ଦ୍ରକୁ ଦାୟିତ୍ୱରେ ଥିବା କର୍ମଚାରୀ ଆସୁ ନ ଥିବା ବେଳେ ସୁପରଭାଇଜର ପରିଚାଳନା କରୁଛନ୍ତି। ସୁପରଭାଇଜର ବି ନିୟମିତ ଆସୁ ନ ଥିବାରୁ ଉକ୍ତ କେନ୍ଦ୍ର ପରିତ୍ୟକ୍ତ ଅବସ୍ଥାରେ ରହିଛି। ଗତ ୪୦ ବର୍ଷ ତଳେ ଲୋକମାନଙ୍କୁ ପ୍ରାଥମିକ ସ୍ବାସ୍ଥ୍ୟସେବା ଯୋଗାଇ ଦେବା ପାଇଁ ଏହି କେନ୍ଦ୍ର ସ୍ଥାପନ କରାଯାଇଥିଲା। ଦାୟିତ୍ୱରେ ଥିବା କର୍ମଚାରୀମାନେ ସେହି କେନ୍ଦ୍ରକୁ ପରିଚାଳନା କରି ଆସୁଥିଲେ। ହେଲେ ଗତ ୨ ବର୍ଷ ହେବ ଉକ୍ତ କେନ୍ଦ୍ରରେ ଅବ୍ୟବସ୍ଥା ଲାଗି ରହିଛି। ଦାୟିତ୍ୱରେ ଥିବା କର୍ମଚାରୀ ନିୟମିତ ସ୍ବାସ୍ଥ୍ୟକେନ୍ଦ୍ରକୁ ଆସୁନାହାନ୍ତି ା ଫଳରେ ଗର୍ଭବତୀ ଓ ପ୍ରାଥମିକ ଚିକିତ୍ସା ପାଇଁ ଲୋକମାନେ ହଇରାଣ ହେଉଛନ୍ତି। ଜରୁରୀ ଆବଶ୍ୟକ ପଡିଲେ ଲୋକମାନେ ୮ କି.ମି. ଦୂର ପଟ୍ଟାମୁଣ୍ଡାଇ ଉପଖଣ୍ଡସ୍ତରୀୟ ଡାକ୍ତରଖାନାକୁ ଯାଉଥିବା ଅଭିଯୋଗ ହୋଇଛି। ଏସମ୍ପର୍କରେ ପଟ୍ଟାମୁଣ୍ଡାଇ ଉପଖଣ୍ଡ ଚିକିତ୍ସା ଅଧିକାରୀ ଡାକ୍ତର ନିରାକାର ପରିଡ଼ାଙ୍କୁ ଏହି ଅଭିଯୋଗ ସମ୍ପର୍କରେ ପ୍ରଶ୍ନ କରିବାରୁ ସେ କୁହନ୍ତି, ଉକ୍ତ ଅଞ୍ଚଳର ରୋଗୀ ଏଠାରେ ଆସି ଭଲ ଚିକିତ୍ସା ସୁବିଧା ପାଉଛନ୍ତି। ଏଏନ୍ଏମ୍ ଦିଦି କିଛିଦିନ ଛୁଟିରେ ଥିଲେ। ଏଏନ୍ଏମ୍ କେନ୍ଦ୍ରକୁ ସେ ନିୟମିତ ଯିବାଆସିବା କରିବା କୌଣସି ଆବଶ୍ୟକତା ନାହିଁ।