କାଏମା,୧୦ା୭( ଶିବପ୍ରସାଦ ମହାନ୍ତି) : ଜଳ ହିଁ ଜୀବନ। ହେଲେ ଗ୍ରୀଷ୍ମ ପ୍ରବାହ ଯୋଗୁ ଦିନକୁ ଦିନ ଜଳସ୍ତର କମି ଚାଲିଥିବାରୁ ବିଭିନ୍ନ ଗ୍ରାମରେ ଦେଖା ଦେଇଛି ଜଳ ସଙ୍କଟ। ଅନେକ ଗାଁରେ ସ୍ବଚ୍ଛ ପାନୀୟ ଜଳ ମିଳୁନାହିଁ। ଏପରି ସମସ୍ୟାରେ ଯାଜପୁର ଜିଲା ଧର୍ମଶାଳା ବ୍ଲକ ଉତ୍ତରପ୍ରତାପ ପଞ୍ଚାୟତ ଅଲଣିସାହୁ ଗ୍ରାମବାସୀ ହନ୍ତସନ୍ତ ହେଉଛନ୍ତି। ଉକ୍ତ ଗ୍ରାମର ୧୦ରୁ ଊର୍ଦ୍ଧ୍ୱ ପରିବାର ପାଣି ବାଲ୍ଟିଏ ପାଇଁ ଡହଳବିକଳ ହେଉଥିବା ଅଭିଯୋଗ ହୋଇଛି। ସ୍ବଚ୍ଛ ପାନୀୟ ଜଳ ପାଇଁ ଗାଁଠାରୁ ବହୁ ଦୂରକୁ ଯିବାକୁ ପଡୁଛି। ଏବେ ଗ୍ରୀଷ୍ମ ପ୍ରବାହ ଶେଷ ହୋଇଛି। ଆଷାଢ଼ ସରି ଶ୍ରାବଣ ମାସ ଆରମ୍ଭ ହୋଇଥିଲେ ମଧ୍ୟ ଆବଶ୍ୟକ ଅନୁଯାୟୀ ବର୍ଷା ହେଉନି। ଫଳରେ ଗାଁରେ ଜଳସ୍ତର ହ୍ରାସ ପାଇ ଚାଲିଛି। ପ୍ରଶାସନ ପକ୍ଷରୁ ପାନୀୟ ଜଳ ଯୋଗାଣର କୌଣସି ବ୍ୟବସ୍ଥା ନ ଥିବାରୁ ତାହା ଗ୍ରାମବାସୀଙ୍କ ପାଇଁ ମୁଣ୍ଡବ୍ୟଥାର କାରଣ ହୋଇଛି। ସୂଚନାଯୋଗ୍ୟ, ଗାଁ ମଙ୍ଗଳା ମନ୍ଦିର ପାଖରେ ଗତ ୧୨ ବର୍ଷ ତଳେ ସରକାରଙ୍କ ତରଫରୁ ଏକ କୂଅ ଖୋଳାଯାଇଥିଲା। ସେହି କୂଅ ପାଣିରେ ମନ୍ଦିର ପୂଜା କାର୍ଯ୍ୟ ହେବା ସହ ୧୦ରୁ ଅଧିକ ପରିବାର ଉପକୃତ ହେଉଥିଲେ। କିନ୍ତୁ ଦୀର୍ଘଦିନ ହେବ ସେ କୂଅ ଶୁଖି ଯାଇଛି। ଏବେ ଟୋପାଏ ବି ପାଣି କୂଅରେ ନାହିଁ । ଏ ସଂକ୍ରାନ୍ତରେ ବାରମ୍ବାର ଅଭିଯୋଗ ପରେ ୨ ମାସ ହେବ ପ୍ରଶାସନ ପକ୍ଷରୁ ଏକ ନଳକୂପ ଖୋଳା ଯାଇଥିଲା କିନ୍ତୁ ତାହା ଆଜି ପର୍ଯ୍ୟନ୍ତ ସମ୍ପୂର୍ଣ୍ଣ ହୋଇପାରିନାହିଁ। ନଳକୂପ ୨୦୦ଫୁଟରୁ ଅଧିକ ଖୋଳା ଯାଇଛି। କାମ ଶେଷ ହୋଇ ନ ଥିବାରୁ ତାହା ବିପଦପୂର୍ଣ୍ଣ ଅବସ୍ଥାରେ ଅଛି। ଏ ସଂକ୍ରାନ୍ତରେ ତୁରନ୍ତ ପଦକ୍ଷେପ ନେବାକୁ ଗ୍ରାମବାସୀ ନିବେଦନ କରିଛନ୍ତି। ଏ ନେଇ ଧର୍ମଶାଳା ବ୍ଲକ ଉନ୍ନୟନ ଅଧିକାରୀ ଦେବେନ୍ଦ୍ର ପ୍ରସାଦ ବଳଙ୍କୁ ପଚାରିବାରୁ ଏ ସଂକ୍ରାନ୍ତରେ ଅନୁଧ୍ୟାନ କରି କାର୍ଯ୍ୟାନୁଷ୍ଠାନ ଗ୍ରହଣ କରିବି ବୋଲି ମତ ଦେଇଛନ୍ତି। ଆବଶ୍ୟକ ଯନ୍ତ୍ରାଂଶ ବ୍ଲକ୍ରେ ନ ଥିବାରୁ ନଳକୂପ କାର୍ଯ୍ୟକ୍ଷମ ହୋଇ ପାରୁନାହିଁ ବୋଲି ବିଭାଗୀୟ ଯନ୍ତ୍ରୀ କହିଛନ୍ତି।